ପାରା ଆଥଲେଟିକ୍ସରେ ଭାରତକୁ ଦ୍ୱିଗୁଣ ସଫଳତା

ଆଇଚି-ନାଗୋୟା, ୨୩ ଅକ୍ଟୋବର (ହି.ସ.)। ପାରା ଏସୀୟ କ୍ରୀଡ଼ା-୨୦୨୬ରେ ଭାରତୀୟ ପାରା ଆଥଲେଟ୍ମାନେ ଚମତ୍କାର ପ୍ରଦର୍ଶନ କରି ବିଶ୍ୱ ରେକର୍ଡ ସହ ଦୁଇଟି ସ୍ୱର୍ଣ୍ଣ ପଦକ ଜିତିଛନ୍ତି। ସନ୍ଦୀପ ପୁରୁଷ ୪୦୦ ମିଟର ଦୌଡ଼ରେ ବିଶ୍ୱ ରେକର୍ଡ ସ୍ଥାପନ କରିଥିବା ବେଳେ ହେନି ଜାଭେଲିନ୍ ଥ୍ରୋରେ ନୂଆ ବିଶ୍ୱ ରେକର୍ଡ କରି ସ୍ୱର୍ଣ୍ଣ ପଦକ ହାସଲ କରିଛନ୍ତି। ଏହାବ୍ୟତୀତ ଅଜୟ କୁମାର ୪୦୦ ମିଟର ଦୌଡ଼ରେ କାଂସ୍ୟ ପଦକ ଜିତିଛନ୍ତି। ପାରା ଟେବୁଲ୍ ଟେନିସ୍ରେ ଜେହାନ ଦୋରାବ ମଦାନ ଓ ଶୁଭମ ୱାଧୱା ମଧ୍ୟ କାଂସ୍ୟ ପଦକ ଜିତି ଭାରତର ପଦକ ସଂଖ୍ୟାରେ ଯୋଗଦାନ ଦେଇଛନ୍ତି।

ପୁରୁଷ ୪୦୦ ମିଟର ଟି-୪୪ ବର୍ଗରେ ସନ୍ଦୀପ ୫୨.୨୮ ସେକେଣ୍ଡ ସମୟ ନେଇ ଦୌଡ଼ ଶେଷ କରିବା ସହ ସ୍ୱର୍ଣ୍ଣ ପଦକ ଜିତିଥିଲେ ଏବଂ ବିଶ୍ୱ ରେକର୍ଡ ସ୍ଥାପନ କରିଥିଲେ। ସାଉଦି ଆରବର ନୂର ଅଲସାନା ୫୩.୧୩ ସେକେଣ୍ଡ ସମୟ ସହ ରୌପ୍ୟ ପଦକ ହାସଲ କରିଥିଲେ। ଭାରତର ଅଜୟ କୁମାର ୫୩.୬୧ ସେକେଣ୍ଡରେ ଦୌଡ଼ ଶେଷ କରି କାଂସ୍ୟ ପଦକ ଜିତିଥିଲେ। ଏହିପରି ଭାବେ ଭାରତ ଏହି ଇଭେଣ୍ଟରେ ଦୁଇଟି ପଦକ ହାସଲ କରିଥିଲା। ଅଜୟ ନିଜର ଏହି ପ୍ରଦର୍ଶନ ସହ କ୍ରୀଡ଼ାର ରେକର୍ଡ ମଧ୍ୟ ସ୍ଥାପନ କରିଥିଲେ।

ପୁରୁଷ ଜାଭେଲିନ୍ ଥ୍ରୋ ଏଫ୍-୩୭ ବର୍ଗରେ ଭାରତର ହେନି ୬୦.୪୯ ମିଟର ଦୂରତାକୁ ଭାଲା ଫିଙ୍ଗି ସ୍ୱର୍ଣ୍ଣ ପଦକ ଜିତିବା ସହ ବିଶ୍ୱ ରେକର୍ଡ ସ୍ଥାପନ କରିଥିଲେ। ସେ ନିଜର ଶେଷ ପ୍ରୟାସରେ ଏହି ଶ୍ରେଷ୍ଠ ପ୍ରଦର୍ଶନ କରିଥିଲେ। ହେନି ୧୧୧୬ ରେଟିଂ ପଏଣ୍ଟ ହାସଲ କରିଥିଲେ। ଇରାନର ହୋରମୋଜ ସେଇଦିକାଜପୁଞ୍ଜି ୫୦.୬୮ ମିଟର ଦୂରତା ସହ ରୌପ୍ୟ ପଦକ ଜିତିଥିବା ବେଳେ ଚୀନ୍ର ଚେଙ୍ଗଜି ୟୁ ୫୩.୬୬ ମିଟର ଦୂରତାକୁ ଭାଲା ଫିଙ୍ଗି କାଂସ୍ୟ ପଦକ ଜିତିଥିଲେ ଏବଂ ଏସୀୟ ରେକର୍ଡ ସ୍ଥାପନ କରିଥିଲେ।

ପାରା ଟେବୁଲ୍ ଟେନିସ୍ର ପୁରୁଷ ଯୁଗଳ ଏମ୍ଡି-୪ ବର୍ଗରେ ଭାରତର ଜେହାନ ଦୋରାବ ମଦାନ ଓ ଶୁଭମ ୱାଧୱା କାଂସ୍ୟ ପଦକ ଜିତିଥିଲେ। ସେମିଫାଇନାଲରେ ଭାରତୀୟ ଯୋଡ଼ି ଦକ୍ଷିଣ କୋରିଆର ଜିନଚିଓଲ ପାର୍କ ଓ କ୍ୟୁଙ୍ଗ-ହ୍ୟୁନ କିମ୍ଙ୍କଠାରୁ ୦-୩ରେ ପରାସ୍ତ ହୋଇଥିଲେ। କୋରିଆ ଯୋଡ଼ି ୧୪-୧୨, ୧୧-୭ ଓ ୧୧-୫ ସେଟ୍ରେ ମ୍ୟାଚ୍ ଜିତିଥିଲେ। ବିଶ୍ୱ ରାଙ୍କିଂରେ ୧୫ତମ ସ୍ଥାନରେ ଥିବା ଭାରତୀୟ ଯୋଡ଼ିର ୫୦ ବର୍ଷୀୟ ଖେଳାଳି ଜେହାନ ମଦାନ ପାରା ଏସୀୟ କ୍ରୀଡ଼ା-୨୦୨୬ରେ ପଦକ ଜିତିଥିବା ଭାରତୀୟ ଦଳର ସବୁଠାରୁ ବୟସ୍କ ଖେଳାଳି ଅଟନ୍ତି।

ହିନ୍ଦୁସ୍ଥାନ ସମାଚାର / ସ୍ୱାଗତିକା