ସୋସିଆଲ ମିଡିଆରେ ଅପ୍ରମାଣିତ ବାତ୍ୟା ସୂଚନା ପ୍ରଚାର ନକରିବାକୁ ପରାମର୍ଶ
ବିପର୍ଯ୍ୟୟ ପରିଚାଳନା ଆଇନ ଅନୁଯାୟୀ ହୋଇପାରେ ଦଣ୍ଡାତ୍ମକ କାର୍ଯ୍ୟାନୁଷ୍ଠାନ
ଭୁବନେଶ୍ୱର, ୨୬ ଅକ୍ଟୋବର (ହି.ସ.) : ବାତ୍ୟା ଏବଂ ଅନ୍ୟାନ୍ୟ ଗୁରୁତର ପାଣିପାଗ ସ୍ଥିତିକୁ ନେଇ ସୋସିଆଲ ମିଡିଆ, ଡିଜିଟାଲ୍ ପ୍ଲାଟଫର୍ମ ଓ କେତେକ ଗଣମାଧ୍ୟମରେ ଅପ୍ରମାଣିତ, ଭ୍ରମାତ୍ମକ ଏବଂ କଳ୍ପନାପ୍ରସୂତ ସୂଚନା ପ୍ରସାରଣକୁ ନେଇ ଉଦ୍ବେଗ ପ୍ରକାଶ କରିଛନ୍ତି ଓଡ଼ିଶା ସରକାର। ଏଭଳି ସୂଚନା ଜନସାଧାରଣଙ୍କ ମଧ୍ୟରେ ଅଯଥା ଭୟ ଓ ଆତଙ୍କ ସୃଷ୍ଟି କରିବା ସହ ସାଧାରଣ ଜୀବନ ଏବଂ ସରକାରଙ୍କ ବିପର୍ଯ୍ୟୟ ପରିଚାଳନା ପ୍ରସ୍ତୁତିକୁ ପ୍ରଭାବିତ କରିପାରେ ବୋଲି ସରକାର ସତର୍କ କରାଇଛନ୍ତି।
ଏ ନେଇ ସ୍ୱତନ୍ତ୍ର ରିଲିଫ୍ କମିଶନର (ଏସ୍ଆର୍ସି)ଙ୍କ କାର୍ଯ୍ୟାଳୟ ପକ୍ଷରୁ ଅକ୍ଟୋବର ୨୬ ତାରିଖରେ ଏକ ସରକାରୀ ପରାମର୍ଶନାମା ଜାରି କରାଯାଇଛି। ଏଥିରେ ବାତ୍ୟାର ଗତିପଥ, ସ୍ଥଳଭାଗ ଛୁଇଁବାର ସମ୍ଭାବ୍ୟ ସ୍ଥାନ, ସମୟ ଏବଂ ପ୍ରଭାବ ସମ୍ପର୍କରେ ବୈଜ୍ଞାନିକ ଆଧାର ବିନା ପୂର୍ବାନୁମାନ ପ୍ରଚାର କରୁଥିବା ବ୍ୟକ୍ତି, ନିଜକୁ ପାଣିପାଗ ବିଶେଷଜ୍ଞ ବୋଲି ଦାବି କରୁଥିବା ଲୋକ ଏବଂ ଡିଜିଟାଲ୍ କଣ୍ଟେଣ୍ଟ କ୍ରିଏଟରମାନଙ୍କୁ ସତର୍କ କରାଯାଇଛି।
ଚାଷୀଙ୍କଠାରୁ ସାଧାରଣ ଲୋକଙ୍କ ପର୍ଯ୍ୟନ୍ତ ପଡ଼ିପାରେ ପ୍ରଭାବ
ସରକାରଙ୍କ ପରାମର୍ଶନାମା ଅନୁଯାୟୀ, ମିଥ୍ୟା ଓ ଅତିରଞ୍ଜିତ ବାତ୍ୟା ପୂର୍ବାନୁମାନ ଯୋଗୁଁ ବିଭିନ୍ନ ପ୍ରକାରର ସମସ୍ୟା ସୃଷ୍ଟି ହୋଇପାରେ।
ଅମଳ ହେବାକୁ ଥିବା ଫସଲ ନଷ୍ଟ ହେବା ଭୟରେ ଚାଷୀମାନେ ଆଗୁଆ ଫସଲ କାଟିବାକୁ ବାଧ୍ୟ ହୋଇପାରନ୍ତି। ଫଳରେ ଅନାବଶ୍ୟକ ଫସଲ କ୍ଷତି ସହ ଆର୍ଥିକ ହାନି ହେବାର ଆଶଙ୍କା ରହିଛି।
ସେହିପରି, ଭ୍ରମାତ୍ମକ ସୂଚନା ଯୋଗୁଁ ଲୋକେ ଅତ୍ୟାବଶ୍ୟକ ସାମଗ୍ରୀ କିଣିବା ପାଇଁ ଅଯଥା ଭିଡ଼ ଜମାଇବା, ସାମଗ୍ରୀ ମହଜୁଦ ରଖିବା ଏବଂ କୃତ୍ରିମ ଅଭାବ ସୃଷ୍ଟି ହେବା ଭଳି ପରିସ୍ଥିତି ଉପୁଜିପାରେ। ଏହାଦ୍ୱାରା ଅତ୍ୟାବଶ୍ୟକ ସାମଗ୍ରୀର ଦର ବୃଦ୍ଧି ହେବାର ମଧ୍ୟ ଆଶଙ୍କା ରହିଛି।
ଏଭଳି ବିଭ୍ରାନ୍ତିକର ଚେତାବନୀ ସରକାରଙ୍କ ବାତ୍ୟା ପ୍ରସ୍ତୁତି, ଲୋକଙ୍କ ସ୍ଥାନାନ୍ତରଣ ଏବଂ ଜରୁରୀକାଳୀନ ସହାୟତା କାର୍ଯ୍ୟରେ ବାଧା ସୃଷ୍ଟି କରିପାରେ ବୋଲି ଏସ୍ଆର୍ସି କାର୍ଯ୍ୟାଳୟ ପକ୍ଷରୁ କୁହାଯାଇଛି।
ପାଣିପାଗ ସୂଚନା ପାଇଁ ଆଇଏମ୍ଡିର ବୁଲେଟିନ୍କୁ ବିଶ୍ୱାସ କରିବାକୁ ପରାମର୍ଶ
ଭାରତୀୟ ପାଣିପାଗ ବିଭାଗ (ଆଇଏମ୍ଡି) ହେଉଛି ଦେଶରେ ପାଣିପାଗ ପୂର୍ବାନୁମାନ, ବାତ୍ୟା ସମ୍ବନ୍ଧୀୟ ବୁଲେଟିନ୍ ଏବଂ ଗୁରୁତର ପାଣିପାଗ ସତର୍କ ସୂଚନା ଜାରି କରିବା ପାଇଁ ନିର୍ଦ୍ଦିଷ୍ଟ ଜାତୀୟ ସଂସ୍ଥା। ଏସ୍ଆର୍ସି କାର୍ଯ୍ୟାଳୟ ଆଇଏମ୍ଡି ଏବଂ ଅନ୍ୟ ସମ୍ପୃକ୍ତ କର୍ତ୍ତୃପକ୍ଷଙ୍କ ସହ ସମନ୍ୱୟ ରକ୍ଷା କରି ରାଜ୍ୟରେ ବିପର୍ଯ୍ୟୟ ସମ୍ବନ୍ଧୀୟ ସରକାରୀ ପରାମର୍ଶ ଜାରି କରିବା ସହ ପ୍ରସ୍ତୁତି, ସ୍ଥାନାନ୍ତରଣ ଏବଂ ମୁକାବିଲା କାର୍ଯ୍ୟର ସମନ୍ୱୟ କରିଥାଏ।
ତେଣୁ ବାତ୍ୟା ଓ ଅନ୍ୟ ଗୁରୁତର ପାଣିପାଗ ସମ୍ବନ୍ଧୀୟ ସୂଚନା ପ୍ରଚାର କରିବା ପୂର୍ବରୁ ଏହାର ସତ୍ୟତା ଯାଞ୍ଚ କରିବାକୁ ସମସ୍ତ ବ୍ୟକ୍ତି, ଗଣମାଧ୍ୟମ ସଂସ୍ଥା, ଡିଜିଟାଲ୍ କଣ୍ଟେଣ୍ଟ କ୍ରିଏଟର ଏବଂ ସୋସିଆଲ ମିଡିଆ ପ୍ଲାଟଫର୍ମକୁ ପରାମର୍ଶ ଦିଆଯାଇଛି। ପାଣିପାଗ ସମ୍ବନ୍ଧୀୟ ସୂଚନା ପ୍ରସାରଣ ପୂର୍ବରୁ ଆଇଏମ୍ଡିର ସରକାରୀ ବୁଲେଟିନ୍ ଏବଂ ଏସ୍ଆର୍ସି କିମ୍ବା ଅନ୍ୟ ସକ୍ଷମ କର୍ତ୍ତୃପକ୍ଷଙ୍କ ପରାମର୍ଶ ସହ ତାହାକୁ ମେଳ କରି ଯାଞ୍ଚ କରିବା ଆବଶ୍ୟକ।
ମିଥ୍ୟା ବିପର୍ଯ୍ୟୟ ସତର୍କ ସୂଚନା ପ୍ରଚାର କଲେ ହୋଇପାରେ ଦଣ୍ଡ
ପରାମର୍ଶନାମାରେ ବିପର୍ଯ୍ୟୟ ପରିଚାଳନା ଆଇନ, ୨୦୦୫ର ବିଭିନ୍ନ ବ୍ୟବସ୍ଥା ସମ୍ପର୍କରେ ମଧ୍ୟ ଉଲ୍ଲେଖ କରାଯାଇଛି।
ଆଇନର ଧାରା ୫୪ ଅନୁଯାୟୀ, ବିପର୍ଯ୍ୟୟ କିମ୍ବା ଏହାର ତୀବ୍ରତା ସମ୍ପର୍କରେ ମିଥ୍ୟା ସତର୍କ ସୂଚନା କିମ୍ବା ଚେତାବନୀ ଜାରି କରିବା ବା ପ୍ରସାରଣ କରିବା ଦ୍ୱାରା ଯଦି ଜନସାଧାରଣଙ୍କ ମଧ୍ୟରେ ଆତଙ୍କ ସୃଷ୍ଟି ହୁଏ, ତେବେ ଦୋଷୀ ସାବ୍ୟସ୍ତ ବ୍ୟକ୍ତିଙ୍କୁ ଏକ ବର୍ଷ ପର୍ଯ୍ୟନ୍ତ ଜେଲ୍ ଦଣ୍ଡ କିମ୍ବା ଜରିମାନା ହୋଇପାରେ।
ସେହିପରି ଧାରା ୫୧ ଅନୁଯାୟୀ, ଯଥାର୍ଥ କାରଣ ବିନା ବିପର୍ଯ୍ୟୟ ପରିଚାଳନା ଆଇନ ଅନୁଯାୟୀ ଅଧିକୃତ ଅଧିକାରୀଙ୍କ କାର୍ଯ୍ୟରେ ବାଧା ସୃଷ୍ଟି କରିବା କିମ୍ବା ସକ୍ଷମ କର୍ତ୍ତୃପକ୍ଷଙ୍କ ଆଇନସମ୍ମତ ନିର୍ଦ୍ଦେଶ ପାଳନ ନକରିବା କ୍ଷେତ୍ରରେ ଆଇନ ଅନୁଯାୟୀ ଦଣ୍ଡବିଧାନ ହୋଇପାରେ।
ଜାଣିଶୁଣି ମିଥ୍ୟା ବିପର୍ଯ୍ୟୟ ସତର୍କ ସୂଚନା ପ୍ରସାରଣ କରିବା, ଜନସାଧାରଣଙ୍କ ମଧ୍ୟରେ ଆତଙ୍କ ସୃଷ୍ଟି କରିବା କିମ୍ବା ସରକାରୀ ବିପର୍ଯ୍ୟୟ ପରିଚାଳନା କାର୍ଯ୍ୟରେ ବାଧା ଦେବା ଭଳି ଘଟଣାରେ ପ୍ରଯୁଜ୍ୟ ଆଇନ ଏବଂ ନିର୍ଦ୍ଧାରିତ ପ୍ରକ୍ରିୟା ଅନୁଯାୟୀ ଉପଯୁକ୍ତ ଆଇନଗତ ପଦକ୍ଷେପ ନିଆଯିବ ବୋଲି ସରକାର ସ୍ପଷ୍ଟ କରିଛନ୍ତି।
ନାଗରିକ, ଗଣମାଧ୍ୟମ ଓ ଡିଜିଟାଲ୍ ପ୍ଲାଟଫର୍ମ ପାଇଁ ପରାମର୍ଶ
ସାଧାରଣ ଲୋକଙ୍କୁ ଆଇଏମ୍ଡିର ସରକାରୀ ପାଣିପାଗ ବୁଲେଟିନ୍ ଏବଂ ଏସ୍ଆର୍ସି, ଜିଲ୍ଲା ପ୍ରଶାସନ ଓ ଅନ୍ୟ ସକ୍ଷମ କର୍ତ୍ତୃପକ୍ଷଙ୍କ ଦ୍ୱାରା ଜାରି ପରାମର୍ଶ ଉପରେ ଭରସା କରିବାକୁ କୁହାଯାଇଛି। ସୋସିଆଲ ମିଡିଆରେ ପ୍ରସାରିତ ଅପ୍ରମାଣିତ ବାର୍ତ୍ତା, ବାତ୍ୟାର ଗତିପଥ ଏବଂ ଆତଙ୍କ ସୃଷ୍ଟିକାରୀ ପୂର୍ବାନୁମାନକୁ ଯାଞ୍ଚ ନକରି ଅନ୍ୟମାନଙ୍କୁ ପଠାଇବାରୁ ଦୂରେଇ ରହିବା ଆବଶ୍ୟକ।
ମୁଦ୍ରିତ, ଇଲେକ୍ଟ୍ରୋନିକ୍ ଓ ଡିଜିଟାଲ୍ ଗଣମାଧ୍ୟମ ସଂସ୍ଥାଗୁଡ଼ିକୁ ବାତ୍ୟା ସମ୍ବନ୍ଧୀୟ ଖବର ପ୍ରକାଶ କରିବା ସମୟରେ ତଥ୍ୟର ସତ୍ୟତା ଯାଞ୍ଚ କରିବା, ପୂର୍ବାନୁମାନର ଉତ୍ସ ସ୍ପଷ୍ଟ କରିବା ଏବଂ କଳ୍ପନାପ୍ରସୂତ ସୂଚନାକୁ ନିଶ୍ଚିତ ସତର୍କ ସୂଚନା ଭାବେ ଉପସ୍ଥାପନ ନକରିବାକୁ ପରାମର୍ଶ ଦିଆଯାଇଛି।
ୟୁଟ୍ୟୁବ୍ ଚ୍ୟାନେଲ୍, ଫେସ୍ବୁକ୍ ପେଜ୍, ହ୍ୱାଟ୍ସଆପ୍ ଗ୍ରୁପ୍ ଏବଂ ଅନ୍ୟ ଡିଜିଟାଲ୍ ପ୍ଲାଟଫର୍ମ ପରିଚାଳନା କରୁଥିବା ବ୍ୟକ୍ତିମାନଙ୍କୁ ମନଗଢ଼ା ବାତ୍ୟା ଗତିପଥ, ସ୍ଥଳଭାଗ ଛୁଇଁବାର ପୂର୍ବାନୁମାନ, ଅତିରଞ୍ଜିତ ପ୍ରଭାବ ଆକଳନ ଏବଂ ମିଥ୍ୟା ବିପର୍ଯ୍ୟୟ ସତର୍କ ସୂଚନା ପ୍ରଚାର ନକରିବାକୁ ଚେତାବନୀ ଦିଆଯାଇଛି।
ଏଥିସହ ଆଇନ ପ୍ରବର୍ତ୍ତନକାରୀ ସଂସ୍ଥା ଓ ସାଇବର ଅପରାଧ ନିୟନ୍ତ୍ରଣ କର୍ତ୍ତୃପକ୍ଷଙ୍କୁ ଏଭଳି ମିଥ୍ୟା ସୂଚନାର ପ୍ରସାର ଉପରେ ନଜର ରଖିବା ଏବଂ ଆଇନ ଅନୁଯାୟୀ ଆବଶ୍ୟକ ପଦକ୍ଷେପ ନେବାକୁ କୁହାଯାଇଛି। ଜିଲ୍ଲାପାଳ ଓ ଜିଲ୍ଲା ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷଙ୍କୁ ମଧ୍ୟ ସରକାରୀ ଯୋଗାଯୋଗ ମାଧ୍ୟମରେ ପ୍ରାମାଣିକ ପାଣିପାଗ ସୂଚନା ଓ ବିପର୍ଯ୍ୟୟ ପରାମର୍ଶ ସମୟୋଚିତ ଭାବେ ପ୍ରସାରଣ କରିବା ସହ ଗୁଜବର ମୁକାବିଲା କରିବାକୁ ନିର୍ଦ୍ଦେଶ ଦିଆଯାଇଛି।
ସଠିକ୍ ସୂଚନା, ସମୟୋଚିତ ସତର୍କବାଣୀ ଏବଂ ସମନ୍ୱିତ ଜନସହଯୋଗ ହିଁ ପ୍ରଭାବଶାଳୀ ବିପର୍ଯ୍ୟୟ ପରିଚାଳନାର ମୁଖ୍ୟ ଆଧାର ବୋଲି ଓଡ଼ିଶା ସରକାର ପୁନର୍ବାର ସ୍ପଷ୍ଟ କରିଛନ୍ତି। ବାତ୍ୟା ଓ ଅନ୍ୟ ବିପର୍ଯ୍ୟୟ ସମୟରେ ଗୁଜବ ପ୍ରସାରଣ ରୋକିବା ଏବଂ ଦାୟିତ୍ୱପୂର୍ଣ୍ଣ ସୂଚନା ଆଦାନପ୍ରଦାନ ପାଇଁ ସମସ୍ତଙ୍କ ସହଯୋଗ ଲୋଡ଼ାଯାଇଛି।
---------------
ହିନ୍ଦୁସ୍ଥାନ ସମାଚାର / ସମନ୍ୱୟ
