ଝାରସୁଗୁଡ଼ା, ୨୬ ଅକ୍ଟୋବର (ହି.ସ.)
ଟ୍ରେନ୍ରେ ବିଭିନ୍ନ ସହରକୁ ଯାଇ ରେଳଷ୍ଟେସନ ନିକଟରେ କରୁଥିଲା ଚୋରି
: ଟ୍ରେନ୍ରେ ଯାତ୍ରା କରି ବିଭିନ୍ନ ସହରରେ ରେଳଷ୍ଟେସନ ନିକଟବର୍ତ୍ତୀ ଅଞ୍ଚଳରେ ଘରେ ପଶି ଚୋରି କରୁଥିବା ଜଣେ କଥିତ ଆନ୍ତଃରାଜ୍ୟ ଚୋରକୁ ଗିରଫ କରିଛି ଝାରସୁଗୁଡ଼ା ପୁଲିସ। ‘ଅପରେସନ୍ ନେତ୍ର’ ଅଭିଯାନ ଅଧୀନରେ ସେଫ୍ ସିଟି ପ୍ରକଳ୍ପର ସିସିଟିଭି ଫୁଟେଜ୍ ଯାଞ୍ଚ ଓ ବୈଷୟିକ ତଥ୍ୟର ବିଶ୍ଳେଷଣ ଆଧାରରେ ପୁଲିସ ଅଭିଯୁକ୍ତଙ୍କୁ ଚିହ୍ନଟ କରି ଗିରଫ କରିବାରେ ସଫଳ ହୋଇଛି। ଗିରଫ ଅଭିଯୁକ୍ତ ହେଲେ ଛତିଶଗଡ଼ର ସୁରେଶ ମହାନା (୪୬)।
ପୁଲିସ ସୂଚନା ଅନୁଯାୟୀ, ଝାରସୁଗୁଡ଼ା ଥାନାରେ କେସ୍ ନମ୍ବର ୫୭୪, ତାରିଖ ୨୫ ଅକ୍ଟୋବର ୨୦୨୬ରେ ବିଏନ୍ଏସ୍ର ଧାରା ୩୩୧(୪)/୩୦୫(ଏ) ଅନୁଯାୟୀ ଏକ ଚୋରି ମାମଲା ରୁଜୁ ହୋଇଥିଲା। ଅଭିଯୋଗକାରୀ ଓମ୍ପ୍ରକାଶ ଅଗ୍ରୱାଲଙ୍କ ଘରେ ଅକ୍ଟୋବର ୧୪ ଓ ୧୫ ତାରିଖ ମଧ୍ୟବର୍ତ୍ତୀ ରାତିରେ ଚୋରି ହୋଇଥିବା ନେଇ ସେ ଥାନାରେ ଅଭିଯୋଗ କରିଥିଲେ।
ଘଟଣାର ଗୁରୁତ୍ୱକୁ ଦୃଷ୍ଟିରେ ରଖି ବରିଷ୍ଠ ପୁଲିସ ଅଧିକାରୀଙ୍କ ନିର୍ଦ୍ଦେଶ ଓ ତତ୍ତ୍ୱାବଧାନରେ ଏକ ସ୍ୱତନ୍ତ୍ର ଟିମ୍ ଗଠନ କରାଯାଇଥିଲା। ଟିମ୍ ପକ୍ଷରୁ ସେଫ୍ ସିଟି ପ୍ରକଳ୍ପ ଅଧୀନରେ ଲାଗିଥିବା ସିସିଟିଭି କ୍ୟାମେରାର ଫୁଟେଜ୍ ଯାଞ୍ଚ କରାଯିବା ସହ ବିଭିନ୍ନ ବୈଷୟିକ ତଥ୍ୟର ବିଶ୍ଳେଷଣ କରାଯାଇଥିଲା। ଏହାଦ୍ୱାରା ଅଭିଯୁକ୍ତଙ୍କ ପରିଚୟ ମିଳିବା ପରେ ଅକ୍ଟୋବର ୨୬ ତାରିଖରେ ତାଙ୍କୁ ଗିରଫ କରାଯାଇଥିଲା।
ପୁଲିସର ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଅଭିଯୁକ୍ତ ଟ୍ରେନ୍ରେ ବିଭିନ୍ନ ସହରକୁ ଯାତ୍ରା କରି ରେଳଷ୍ଟେସନ ନିକଟବର୍ତ୍ତୀ ଅଞ୍ଚଳରେ ଘରେ ପଶି ଚୋରି କରୁଥିବା ଅଭିଯୋଗ ରହିଛି। ବାରମ୍ବାର ସ୍ଥାନ ପରିବର୍ତ୍ତନ କରି ଚୋରି କରୁଥିବାରୁ ତାଙ୍କୁ ଚିହ୍ନଟ କରିବା ପୁଲିସ ପାଇଁ ଏକ ଚ୍ୟାଲେଞ୍ଜ ଥିଲା। ତେବେ ସିସିଟିଭି ଫୁଟେଜ୍ ଓ ପ୍ରଯୁକ୍ତିବିଦ୍ୟାର ସହାୟତାରେ ପୁଲିସ ତାଙ୍କ ନିକଟରେ ପହଞ୍ଚିବାରେ ସଫଳ ହୋଇଥିଲା।
ଗିରଫ ସୁରେଶ ମହାନା ଛତିଶଗଡ଼ର ରାୟଗଡ଼ ଜିଲ୍ଲା ଅନ୍ତର୍ଗତ ପୁସୌର ଥାନା ଅଞ୍ଚଳର କୁମ୍ଭାରପଡ଼ା। ସେ ବର୍ତ୍ତମାନ ଜାଞ୍ଜଗିର-ଚାମ୍ପା ଜିଲ୍ଲାର ଚାମ୍ପା ଥାନା ଅନ୍ତର୍ଗତ ବଂଶୀ ବଜାର, ଓଲ୍ଡ କଲେଜ ରୋଡ୍ ରହୁଥିବା ଜଣାପଡ଼ିଛି।
ଅଭିଯୁକ୍ତଙ୍କଠାରୁ ପୁଲିସ ନଗଦ ୧,୪୦୦ ଟଙ୍କା, ତାଙ୍କ ନାମରେ ଥିବା ଏକ ଆଧାର କାର୍ଡ ଓ ପିନ୍ଧା ପୋଷାକ ଜବତ କରିଛି। ଗିରଫ ପରେ ତାଙ୍କୁ କୋର୍ଟଚାଲାଣ କରାଯାଇଛି।
ଅଭିଯୁକ୍ତଙ୍କର ଅନ୍ୟ କୌଣସି ଚୋରି ମାମଲାରେ ସମ୍ପୃକ୍ତି ରହିଛି କି ନାହିଁ ଏବଂ ଏହି ଘଟଣା ପଛରେ ଅନ୍ୟ କୌଣସି ଗୋଷ୍ଠୀ କାର୍ଯ୍ୟ କରୁଛି କି ନାହିଁ, ସେନେଇ ପୁଲିସ ତଦନ୍ତ ଜାରି ରଖିଛି।
---------------
ହିନ୍ଦୁସ୍ଥାନ ସମାଚାର / ସଞ୍ଜୟ
