ମାଲକାନଗିରି,୨୮ ଅକ୍ଟୋବର (ହି.ସ.) ସମ୍ଭାବ୍ୟ ଘୂର୍ଣ୍ଣିଝଡ଼ ‘ଅର୍ଣ୍ଣବ’କୁ ଦୃଷ୍ଟିରେ ରଖି ମାଲକାନଗିରି ଜିଲ୍ଲା ପ୍ରଶାସନ ପକ୍ଷରୁ ବିଭିନ୍ନ ବ୍ଲକ୍ ଓ ସହରାଞ୍ଚଳରେ ଆଶ୍ରୟସ୍ଥଳ ଚିହ୍ନଟ କରାଯିବା ସହ ଆଶ୍ରୟ ନେଉଥିବା ଲୋକଙ୍କ ପାଇଁ ଖାଦ୍ୟ ବ୍ୟବସ୍ଥା କରାଯାଇଛି। ପ୍ରାଣୀ ମାନଙ୍କ ପାଇଁ ମଧ୍ୟ ସବୁଜ ଖାଦ୍ୟର ବ୍ୟବସ୍ଥା ମଧ୍ୟ କରାଯାଇଥିବା ଜିଲ୍ଲା ପ୍ରଶାସନ ସୂଚନା ଦେଇଛନ୍ତି l ଆଜି ଅତିରିକ୍ତ ଜିଲ୍ଲାପାଳ ଜାନିଗୁଡ଼ା ବିଦ୍ୟାଳୟ ପରିଦର୍ଶନ କରିଥିଲେ। କଚ୍ଚା ଘରେ ରହୁଥିବା ପରିବାରଗୁଡ଼ିକ ପାଇଁ ଏହି ବିଦ୍ୟାଳୟକୁ ଅସ୍ଥାୟୀ ଆଶ୍ରୟସ୍ଥଳ ଭାବେ ବ୍ୟବହାର କରାଯାଉଛି। ମୋଟୁସ୍ଥିତ ବହୁମୁଖୀ ବାତ୍ୟା ଆଶ୍ରୟସ୍ଥଳରେ ଆଶ୍ରୟ ନେଇଥିବା ଲୋକଙ୍କୁ ରନ୍ଧା ଖାଦ୍ୟ ପରିବେଷଣ କରାଯାଇଥିବା ବେଳେ କମାରଗୁଡ଼ା ବାତ୍ୟା ଆଶ୍ରୟସ୍ଥଳରେ ମଧ୍ୟାହ୍ନ ଭୋଜନ ବଣ୍ଟନ କରାଯାଇଛି।

ଜିଲ୍ଲା ପ୍ରଶାସନର ଖାଦ୍ୟ ବ୍ୟବସ୍ଥା ତାଲିକା ଅନୁଯାୟୀ, ମାଲକାନଗିରି ଜିଲ୍ଲାର ବିଭିନ୍ନ ବ୍ଲକ୍ ଓ ସହରାଞ୍ଚଳରେ ନିମ୍ନଲିଖିତ ସ୍ଥାନଗୁଡ଼ିକରେ ଆଶ୍ରୟ ଓ ଖାଦ୍ୟ ବ୍ୟବସ୍ଥା ଉଲ୍ଲେଖ ରହିଛି।

ମାଥିଲି ବ୍ଲକ୍ରର ଧୁଙ୍ଗିଆପୁଟସ୍ଥିତ ବିପର୍ଯ୍ୟୟ ପରିଚାଳନା କେନ୍ଦ୍ର, ଅମ୍ବାଗୁଡ଼ା ପ୍ରାଥମିକ ବିଦ୍ୟାଳୟ, ଚେଡ଼େଙ୍ଗା କରପଲ୍ଲୀ ଅଙ୍ଗନବାଡ଼ି କେନ୍ଦ୍ର , କାମାରପଲ୍ଲୀ ସୋଡ଼ିଗୁଡ଼ା ବିଦ୍ୟାଳୟ, କାମାରପଲ୍ଲୀ ଗ୍ରାମପଞ୍ଚାୟତ କାର୍ଯ୍ୟାଳୟ, କର୍ତ୍ତନପଲ୍ଲୀ ୟୁଜିଏଚ୍ଏସ୍, କର୍ତ୍ତନପଲ୍ଲୀ ଉଦୟଗିରି, କିଆଙ୍ଗ ବାଦସେରପଲ୍ଲୀ ପ୍ରାଥମିକ ବିଦ୍ୟାଳୟ, ମହୁପଦର ଗୁରୁଗୁଡ଼ା ପିଏସ୍, ମାଥିଲି ଟୋମେ ଅପର ପ୍ରାଇମେରୀ ସ୍କୁଲ୍, ନୟାଗୁଡ଼ା ଖଇରପଲ୍ଲୀ ପିଏସ୍, ସାଲିମି ପ୍ରାଥମିକ ବିଦ୍ୟାଳୟ, ଟେମୁରୁପଲ୍ଲୀ ୟୁଜିଏଚ୍ଏସ୍ ଏବଂ ଗଙ୍ଗରାଜଗୁମ୍ମା ୟୁପି ସ୍କୁଲ୍କୁ ତାଲିକାରେ ସାମିଲ କରାଯାଇଛି। ସେହିପରି ଖଇରପୁଟ ବ୍ଲକର କୁଡୁମୁଲୁଗୁମ୍ମା ଗ୍ରାମପଞ୍ଚାୟତ କାର୍ଯ୍ୟାଳୟ, ମାଲକାନଗିରି ପୌରାଞ୍ଚଳର ତାରିଣୀ ମନ୍ଦିରସ୍ଥିତ ଏମ୍ପିଏଚ୍ ଓ ବାଲିମେଳା ଏନ୍ଏସିର ସୁଷା କୁ ଖାଦ୍ୟ ବ୍ୟବସ୍ଥା ତାଲିକାରେ ରଖାଯାଇଛି। ଏହା ବ୍ୟତୀତ ମାଲକାନଗିରି, କାଲିମେଳା, ପଡ଼ିଆ, , ଚିତ୍ରକୋଣ୍ଡା ଓ କୋରୁକୋଣ୍ଡା ବ୍ଲକ୍ର ବିଭିନ୍ନ ଗ୍ରାମପଞ୍ଚାୟତ, ବିଦ୍ୟାଳୟ ଓ ବାତ୍ୟା ଆଶ୍ରୟସ୍ଥଳକୁ ମଧ୍ୟ ତାଲିକାରେ ସାମିଲ କରାଯାଇଛି। ତେବେ ଏହି ତାଲିକାରେ ସ୍ଥାନଗୁଡ଼ିକରେ ଖାଦ୍ୟ ବ୍ୟବସ୍ଥା ଉଲ୍ଲେଖ ଥିବାରୁ ପ୍ରତ୍ୟେକ ସ୍ଥାନରେ ରନ୍ଧା ଖାଦ୍ୟ ବଣ୍ଟନ ଆରମ୍ଭ ହୋଇସାରିଛି ବୋଲି ନିଶ୍ଚିତ କରାଯାଇପାରିବ ନାହିଁ। ଅକ୍ଟୋବର ୨୭ ତାରିଖରେ କାଲିମେଳା ଓ ପଡ଼ିଆ ଅଞ୍ଚଳର ଆଶ୍ରୟସ୍ଥଳଗୁଡ଼ିକରେ ମାଗଣା ରୋଷେଇ ବ୍ୟବସ୍ଥା ଆରମ୍ଭ ହୋଇଥିବା ଖବର ପ୍ରକାଶ ପାଇଥିଲା। ଅନ୍ୟପକ୍ଷରେ, ଜିଲ୍ଲା ଜରୁରୀକାଳୀନ କାର୍ଯ୍ୟାଳୟ ର ତଥ୍ୟ ଅନୁଯାୟୀ, ଅକ୍ଟୋବର ୨୭ ତାରିଖ ସକାଳ ୮ଟାରୁ ଅକ୍ଟୋବର ୨୮ ତାରିଖ ସକାଳ ୮ଟା ପର୍ଯ୍ୟନ୍ତ ଜିଲ୍ଲାରେ ମୋଟ ୧୬୬.୧ ମିଲିମିଟର ବର୍ଷା ରେକର୍ଡ ହୋଇଛି। ଜିଲ୍ଲାର ହାରାହାରି ବର୍ଷା ପରିମାଣ ୨୩.୭୨ ମିଲିମିଟର ରହିଛି। ବ୍ଲକ୍ୱାରି ବର୍ଷା ପରିମାଣ ଅନୁଯାୟୀ, ଚିତ୍ରକୋଣ୍ଡାରେ ସର୍ବାଧିକ ୪୫.୨ ମିଲିମିଟର, କାଲିମେଳାରେ ୩୧ ମିଲିମିଟର, କୋରୁକୋଣ୍ଡାରେ ୨୭.୩ ମିଲିମିଟର, ମାଲକାନଗିରିରେ ୨୦.୪ ମିଲିମିଟର, ଖଇରପୁଟରେ ୧୯ ମିଲିମିଟର ଏବଂ ମାଥିଲି ଓ ପଡ଼ିଆରେ ୧୧.୬ ମିଲିମିଟର ବର୍ଷା ହୋଇଛି। ବାତ୍ୟାର ସମ୍ଭାବ୍ୟ ପ୍ରଭାବକୁ ଦୃଷ୍ଟିରେ ରଖି ଆଶ୍ରୟସ୍ଥଳରେ ରହୁଥିବା ଲୋକଙ୍କୁ ଖାଦ୍ୟ ଓ ଆବଶ୍ୟକୀୟ ସହାୟତା ଯୋଗାଇବା ପାଇଁ ପ୍ରଶାସନ ପକ୍ଷରୁ ବ୍ୟବସ୍ଥା ଜାରି ରହିଛି।

---------------

ହିନ୍ଦୁସ୍ଥାନ ସମାଚାର / ଶିବବ୍ରତ