ନୂଆଦିଲ୍ଲୀ, ୩୦ ଅକ୍ଟୋବର (ହି.ସ.): ରାଜ୍ୟସଭାର ପୂର୍ବତନ ସଦସ୍ୟ ତଥା ପ୍ରସିଦ୍ଧ ସମାଜସେବୀ ରବୀନ୍ଦ୍ର କିଶୋର ସିହ୍ନା (ଆର୍କେ ସିହ୍ନା)ଙ୍କ ବିୟୋଗରେ ରାଷ୍ଟ୍ରୀୟ ସ୍ୱୟଂସେବକ ସଂଘ (ଆର୍ଏସ୍ଏସ୍) ଗଭୀର ଶୋକବ୍ୟକ୍ତ କରିଛି। ତାଙ୍କ ବିୟୋଗ ସାର୍ବଜନୀନ କ୍ଷେତ୍ର ପାଇଁ ଏକ ବଡ଼ କ୍ଷତି ବୋଲି ସଂଘ କହିଛି। ଘରୋଇ ସୁରକ୍ଷା ସେବା ଶିଳ୍ପକୁ ନୂଆ ପରିଚୟ ଦେବା ସହ ରାଷ୍ଟ୍ରସେବା, ସାମାଜିକ କାର୍ଯ୍ୟ ଓ ଗଣମାଧ୍ୟମ କ୍ଷେତ୍ରରେ ତାଙ୍କର ଅବଦାନ ସର୍ବଦା ସ୍ମରଣୀୟ ରହିବ ବୋଲି ସଂଘ ଉଲ୍ଲେଖ କରିଛି।
ସଂଘ ପକ୍ଷରୁ ଜାରି ଶୋକବାର୍ତ୍ତାରେ ସରସଂଘଚାଳକ ଡ. ମୋହନ ଭାଗବତ ଓ ସରକାର୍ଯ୍ୟବାହ ଦତ୍ତାତ୍ରେୟ ହୋସବାଲେ ଆର୍କେ ସିହ୍ନାଙ୍କୁ ଭାବପୂର୍ଣ୍ଣ ଶ୍ରଦ୍ଧାଞ୍ଜଳି ଜଣାଇଛନ୍ତି। ପ୍ରସିଦ୍ଧ ସମାଜସେବୀ ତଥା ପୂର୍ବତନ ରାଜ୍ୟସଭା ସାଂସଦ ରବୀନ୍ଦ୍ର କିଶୋର ସିହ୍ନାଙ୍କ ପରଲୋକରେ ସାର୍ବଜନୀନ କ୍ଷେତ୍ରର ଅପୂରଣୀୟ କ୍ଷତି ହୋଇଛି ବୋଲି ସେମାନେ କହିଛନ୍ତି। ଘରୋଇ ସୁରକ୍ଷା ସେବା କ୍ଷେତ୍ରକୁ ଏକ ନୂଆ ପରିଚୟ ଦେବା ସହ ରାଷ୍ଟ୍ରସେବା, ସାମାଜିକ କାର୍ଯ୍ୟ ଓ ଗଣମାଧ୍ୟମ ଜଗତରେ ତାଙ୍କର ଅବଦାନ ଅବିସ୍ମରଣୀୟ ରହିବ ବୋଲି ଶୋକବାର୍ତ୍ତାରେ ଉଲ୍ଲେଖ କରାଯାଇଛି।
ସଂଘ ପକ୍ଷରୁ ଦିବଂଗତ ଆତ୍ମାଙ୍କ ସଦ୍ଗତି କାମନା କରିବା ସହ ଶୋକସନ୍ତପ୍ତ ପରିବାରବର୍ଗଙ୍କୁ ଏହି ଦୁଃଖ ସହିବା ପାଇଁ ଈଶ୍ୱର ଶକ୍ତି ପ୍ରଦାନ କରନ୍ତୁ ବୋଲି ପ୍ରାର୍ଥନା କରାଯାଇଛି।
ଉଲ୍ଲେଖଯୋଗ୍ୟ, ଆର୍କେ ସିହ୍ନା ଭାରତୀୟ ଜନତା ପାର୍ଟିର ପ୍ରତିଷ୍ଠାତା ସଦସ୍ୟଙ୍କ ମଧ୍ୟରେ ଅନ୍ୟତମ ଥିଲେ। ସେ ୨୦୧୪ରୁ ୨୦୨୦ ପର୍ଯ୍ୟନ୍ତ ରାଜ୍ୟସଭାର ସଦସ୍ୟ ଥିଲେ। ଘରୋଇ ସୁରକ୍ଷା ସେବା କ୍ଷେତ୍ରର ପ୍ରମୁଖ କମ୍ପାନୀ ଏସ୍ଆଇଏସ୍ ଗ୍ରୁପ୍ର ସେ ପ୍ରତିଷ୍ଠାତା ଥିଲେ। ସାମ୍ବାଦିକତା, ସମାଜସେବା ଓ ରାଷ୍ଟ୍ରବାଦୀ କାର୍ଯ୍ୟକଳାପ ସହ ମଧ୍ୟ ସେ ଜଡ଼ିତ ଥିଲେ। ୨୦୧୬ରୁ ୨୦୨୨ ପର୍ଯ୍ୟନ୍ତ ସେ ହିନ୍ଦୁସ୍ଥାନ ସମାଚାର ବହୁଭାଷୀ ସମ୍ବାଦ ସଂସ୍ଥାର ଅଧ୍ୟକ୍ଷ ଥିଲେ।
ହିନ୍ଦୁସ୍ଥାନ ସମାଚାର / ସମନ୍ୱୟ
