ପାଟନା, ଅକ୍ଟୋବର ୩୦ (ହି.ସ.)। ଶିଳ୍ପପତି ତଥା ବିଜେପିର ବରିଷ୍ଠ ନେତା ରବୀନ୍ଦ୍ର କିଶୋର ସିହ୍ନାଙ୍କର ଶୁକ୍ରବାର ଦିନ ନୋଏଡାସ୍ଥିତ ତାଙ୍କ ବାସଭବନରେ ପରଲୋକ ଘଟିଛି। ବିହାରର ଭୋଜପୁର ଜିଲ୍ଲା ଅନ୍ତର୍ଗତ ବହିୟାରା ଗ୍ରାମର ବାସିନ୍ଦା ରବୀନ୍ଦ୍ର କିଶୋର ସିହ୍ନାଙ୍କ ଜନ୍ମ ୨୨ ସେପ୍ଟେମ୍ବର ୧୯୫୧ରେ ହୋଇଥିଲା।
ପୂର୍ବତନ ରାଜ୍ୟସଭା ସାଂସଦ ତଥା ବିଜେପିର ବରିଷ୍ଠ ନେତା ଆର୍କେ ସିହ୍ନା ନୋଏଡାସ୍ଥିତ ନିଜ ବାସଭବନରେ ଶେଷ ନିଃଶ୍ୱାସ ତ୍ୟାଗ କରିଛନ୍ତି। ତାଙ୍କ ବିୟୋଗ ଖବରରେ ରାଜନୈତିକ ଏବଂ ବ୍ୟବସାୟିକ ଜଗତରେ ଶୋକର ଛାୟା ଖେଳିଯାଇଛି। ଡ. ଆର୍କେ ସିହ୍ନା ଏସ୍ଆଇଏସ୍ ଗ୍ରୁପ୍ର ପ୍ରତିଷ୍ଠାତା ତଥା ଅଧ୍ୟକ୍ଷ ଥିଲେ। ରାଜନୀତି ସହିତ ଶିଳ୍ପ ଜଗତରେ ମଧ୍ୟ ତାଙ୍କର ଏକ ସ୍ୱତନ୍ତ୍ର ପରିଚୟ ଥିଲା।
ବିଜେପିର ପ୍ରାରମ୍ଭିକ ସମୟରୁ ଦଳ ସହ ଜଡ଼ିତ ରହିଥିବା ଡ. ସିହ୍ନା ଦୀର୍ଘ ସମୟ ଧରି ଦଳ ଓ ସଂଗଠନ ପାଇଁ ଗୁରୁତ୍ୱପୂର୍ଣ୍ଣ ଭୂମିକା ତୁଲାଇଥିଲେ। ସେ ରାଜ୍ୟସଭା ସାଂସଦ ଭାବେ ମଧ୍ୟ ନିଜର ସେବା ପ୍ରଦାନ କରିଥିଲେ।
ସ୍ୱର୍ଗତ ଆର୍କେ ସିହ୍ନାଙ୍କ ବ୍ୟକ୍ତିଗତ ସହାୟକ ସତୀଶ ରାଜୁ ଏବଂ ମନୀଷ କିଶୋର ହିନ୍ଦୁସ୍ଥାନ ସମାଚାର ସହ କଥାବାର୍ତ୍ତା ବେଳେ କହିଛନ୍ତି ଯେ, ଗତ ବର୍ଷଠାରୁ ହିଁ ତାଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ଥିଲା। ସିଙ୍ଗାପୁରରେ ତାଙ୍କର ଚିକିତ୍ସା ଚାଲିଥିଲା। ଆଜି ସକାଳେ ଏହି ଦୁଃଖଦ ଖବର ଆମେ ପାଇଛୁ। ତାଙ୍କ ମରଶରୀରକୁ ଶେଷ ଦର୍ଶନ ପାଇଁ ଦିଲ୍ଲୀରୁ ପାଟନା ଅଣାଯିବ। ପାଟନାର ପାଟଳିପୁତ୍ରସ୍ଥିତ ଅନ୍ନପୂର୍ଣ୍ଣା ଭବନରେ ଲୋକେ ତାଙ୍କର ଶେଷ ଦର୍ଶନ କରିପାରିବେ। ତେବେ ମରଶରୀର କେବେ ଅଣାଯିବ, ସେ ସମ୍ପର୍କରେ ସେମାନେ ସ୍ପଷ୍ଟ କରିନାହାନ୍ତି।
ବିଜେପିର ବରିଷ୍ଠ ନେତା ଆର୍କେ ସିହ୍ନାଙ୍କ ଦେହାନ୍ତ ପରେ ବିଜେପି ବିଧାୟକ ସଞ୍ଜୀବ ଚୌରସିଆ ତାଙ୍କୁ ଶ୍ରଦ୍ଧାଞ୍ଜଳି ଜଣାଇଛନ୍ତି। ସଞ୍ଜୀବ ଚୌରସିଆ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଲେଖିଛନ୍ତି, “ଜନସଂଘ ଓ ବିଜେପିର ବରିଷ୍ଠ ନେତା ତଥା ପୂର୍ବତନ ରାଜ୍ୟସଭା ସାଂସଦ ଆର୍କେ ସିହ୍ନାଜୀଙ୍କ ନିଧନ ଖବର ଅତ୍ୟନ୍ତ ଦୁଃଖଦାୟକ। ତାଙ୍କ ବିୟୋଗରେ ସାମାଜିକ ଓ ରାଜନୈତିକ ଜଗତର ଅପୂରଣୀୟ କ୍ଷତି ଘଟିଛି। ଈଶ୍ୱର ଦିବଙ୍ଗତ ଆତ୍ମାଙ୍କୁ ଶାନ୍ତି ପ୍ରଦାନ କରନ୍ତୁ ଏବଂ ଶୋକସନ୍ତପ୍ତ ପରିବାରକୁ ଏହି ଦୁଃଖଦ ସମୟରେ ଧୈର୍ଯ୍ୟ ଓ ସାହସ ଦିଅନ୍ତୁ।”
ହିନ୍ଦୁସ୍ଥାନ ସମାଚାର / ସ୍ୱାଗତିକା
