ଶୋପିଆଁ, ଅକ୍ଟୋବର ୩୦ (ହି.ସ.)। ଜମ୍ମୁ-କଶ୍ମୀର ପୁଲିସ ଶୁକ୍ରବାର ଦିନ କେନ୍ଦ୍ରଶାସିତ ଅଞ୍ଚଳରେ ଆତଙ୍କବାଦୀ କାର୍ଯ୍ୟକଳାପ ପାଇଁ ଅର୍ଥ ଯୋଗାଣ କରୁଥିବା ଏକ ନେଟୱର୍କର ପର୍ଦ୍ଦାଫାଶ କରିଛି। ଏହି ନେଟୱର୍କର ସମ୍ପର୍କ ବିଭିନ୍ନ ଜେଲ୍ରେ ବନ୍ଦୀ ଥିବା ଆତଙ୍କବାଦୀମାନଙ୍କ ସହ ରହିଥିବା ଜଣାପଡ଼ିଛି। ଏହି ମାମଲାରେ ୧୦ ଜଣଙ୍କୁ ଗିରଫ କରାଯାଇଛି।
ପୁଲିସ ମୁଖପାତ୍ରଙ୍କ ସୂଚନା ଅନୁଯାୟୀ, ଆତଙ୍କବାଦୀ କାର୍ଯ୍ୟକଳାପ ସହ ଜଡ଼ିତ ସନ୍ଦିଗ୍ଧ ଆର୍ଥିକ ନେଟୱର୍କଗୁଡ଼ିକର ଗଭୀର ତଦନ୍ତ ପରେ ଶୋପିଆଁ ପୁଲିସ ଏହି ମଡ୍ୟୁଲ୍ର ପର୍ଦ୍ଦାଫାଶ କରିଛି। ତଦନ୍ତ ସମୟରେ ବିଭିନ୍ନ ପେମେଣ୍ଟ ପ୍ଲାଟଫର୍ମ ମାଧ୍ୟମରେ ହୋଇଥିବା ସନ୍ଦିଗ୍ଧ ଅନଲାଇନ୍ ଆର୍ଥିକ କାରବାରର ବିଶ୍ଳେଷଣ କରାଯାଇଥିଲା। ଏଥିରୁ ଟଙ୍କା କାରବାରର ଅନେକ ସ୍ତର ସମ୍ପର୍କରେ ତଥ୍ୟ ମିଳିଥିଲା।
ତଦନ୍ତରୁ ଆତଙ୍କବାଦୀଙ୍କୁ ଅର୍ଥ ଯୋଗାଣରେ ସାମିଲ ଥିବା ଏକ ବଡ଼ ନେଟୱର୍କର ସୂଚନା ମିଳିଛି। ଏହି ନେଟୱର୍କର ସମ୍ପର୍କ ବିଭିନ୍ନ ଜେଲ୍ରେ ବନ୍ଦୀ ଥିବା ଆତଙ୍କବାଦୀ ଏବଂ ସେମାନଙ୍କ ସହଯୋଗୀଙ୍କ ସହ ରହିଥିଲା। ଏହି ମାମଲାରେ ଏପର୍ଯ୍ୟନ୍ତ ୧୦ ଜଣ ଆତଙ୍କବାଦୀ ସହଯୋଗୀଙ୍କୁ ଗିରଫ କରାଯାଇଛି। ଏନେଇ ଶୋପିଆଁ ଥାନାରେ ଆଇନର ସମ୍ପୃକ୍ତ ଧାରା ଅନୁଯାୟୀ ଏଫ୍ଆଇଆର୍ ନମ୍ବର ୨୩୧/୨୦୨୬ ରୁଜୁ କରାଯାଇଛି।
ହିନ୍ଦୁସ୍ଥାନ ସମାଚାର / ସ୍ୱାଗତିକା
