କୋଲକାତା, ୩୦ ଅକ୍ଟୋବର (ହି.ସ.)- ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ପୁଣିଥରେ ପଶ୍ଚିମବଙ୍ଗରେ ଏକ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଏକ ଘରୋଇ କମ୍ପାନୀର ବ୍ୟାଙ୍କ ଠକେଇ ମାମଲାରେ କେନ୍ଦ୍ରୀୟ ତଦନ୍ତକାରୀ ସଂସ୍ଥା ରାଜ୍ୟର ଚାରୋଟି ଜିଲ୍ଲାରେ ଏକକାଳୀନ ଚଢ଼ଉ କରିଛି। ଶୁକ୍ରବାର ସକାଳେ ଇଡି ଅଧିକାରୀମାନେ କେନ୍ଦ୍ରୀୟ ବାହିନୀ ସହିତ କୋଲକାତା, ହାୱଡ଼ା, ହୁଗଳି ଏବଂ ଆସାନସୋଲରେ ପହଞ୍ଚିଥିଲେ। ଏହି ଚଢ଼ଉ ୨୯୦ କୋଟି ଟଙ୍କାର ବ୍ୟାଙ୍କ ଠକେଇ ମାମଲାରେ ହୋଇଛି। ଝାଡ଼ଖଣ୍ଡର ଏକ ପାୱାର ପ୍ଲାଣ୍ଟରୁ ବେଆଇନ ଭାବେ କୋଲକାତାକୁ ଟଙ୍କା ପଠାଯାଇଥିବା ଅଭିଯୋଗ ହୋଇଛି। ଅନୁସନ୍ଧାନକାରୀମାନେ ଦାବି କରିଛନ୍ତି ଯେ, ନକଲି କମ୍ପାନୀ ସୃଷ୍ଟି କରି କୋଟି କୋଟି ଟଙ୍କାର କଳାଧନକୁ ଧଳା କରାଯାଇଛି ଏବଂ ଏହି ପରିପ୍ରେକ୍ଷୀରେ ଏହି ବ୍ୟାପକ ସର୍ଚ୍ଚ ଅପରେସନ ଆରମ୍ଭ କରାଯାଇଛି।

ଇଡି ସୂତ୍ର ଅନୁଯାୟୀ, ଶୁକ୍ରବାର ସକାଳେ ଅନୁସନ୍ଧାନକାରୀମାନେ ହାୱଡ଼ାର ବିବେକ ବିହାରରେ ଚାର୍ଟାର୍ଡ ଆକାଉଣ୍ଟାଣ୍ଟ ତରୁଣ କୁମାର ଜୈନଙ୍କ ବାସଭବନରେ ଚଢଉ କରିଥିଲେ ଏବଂ ତାଙ୍କ ବିଭିନ୍ନ କାଗଜପତ୍ର ଯାଞ୍ଚ ଆରମ୍ଭ କରିଥିଲେ। ଏଥି ସହିତ, କେନ୍ଦ୍ରୀୟ ଏଜେନ୍ସି ହୁଗଲି ଜିଲ୍ଲାର ଉତ୍ତରପାରା ଶିବତଲା ଷ୍ଟ୍ରିଟର ଚାର୍ଟାର୍ଡ ଆକାଉଣ୍ଟାଣ୍ଟ ସୁଦିପ୍ତା ଘୋଷ ଏବଂ କୋଲକାତାର ଲେକଟାଉନ ଏବଂ ଆସାନସୋଲରେ ଥିବା ଅନ୍ୟ ଦୁଇ ଚାର୍ଟାର୍ଡ ଆକାଉଣ୍ଟାଣ୍ଟଙ୍କ ବାସଭବନରେ ତଲାସୀ ଜାରି ରଖିଛି।

ଏହି ଚଢ଼ଉ ବିଷୟରେ ଉଲ୍ଲେଖ କରି ଉତ୍ତରପାରାର ଜଣେ ଚାର୍ଟାର୍ଡ ଆକାଉଣ୍ଟାଣ୍ଟ ସୁଦିପ୍ତ ଘୋଷ କହିଛନ୍ତି ଯେ, ଅଧିକାରୀମାନେ କୋର୍ଟଙ୍କ ଅନୁମତି ନେଇ ତାଙ୍କ ଘରକୁ ଆସିଛନ୍ତି। ଇଡି ତଦନ୍ତ କରୁଛି ଏବଂ ଏହାର ଦୁର୍ନୀତି ସହିତ କୌଣସି ସମ୍ପର୍କ ନାହିଁ। ତେବେ କେଉଁ ଅଭିଯୋଗ ଆଧାରରେ ତଦନ୍ତ କରାଯାଉଛି ତାହା ସେ ସ୍ପଷ୍ଟ କରିନାହାନ୍ତି।

ବର୍ତ୍ତମାନ, ତଦନ୍ତକାରୀମାନେ ଅନୁସନ୍ଧାନ କରୁଛନ୍ତି ଯେ, ୨୯୦ କୋଟି ଟଙ୍କାର ଏହି ବିଶାଳ ଆର୍ଥିକ କାରବାରରେ କେଉଁମାନେ ଜଡିତ ଅଛନ୍ତି ଏବଂ ନକଲି କମ୍ପାନୀ ମାଧ୍ୟମରେ ଏହି ଟଙ୍କା କିପରି ଅପବ୍ୟବହାର କରାଯାଇଥିଲା। ଏହି ସର୍ଚ୍ଚ ଅପରେସନ ସମୟରେ କୌଣସି ଗୁରୁତ୍ୱପୂର୍ଣ୍ଣ ଡକ୍ୟୁମେଣ୍ଟ କିମ୍ବା ପ୍ରମାଣ ଉଦ୍ଧାର ହୋଇଛି କି ନାହିଁ ସେ ବିଷୟରେ ଇଡି ତରଫରୁ ଏପର୍ଯ୍ୟନ୍ତ କୌଣସି ସରକାରୀ ସୂଚନା ମିଳିନାହିଁ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ