ନୂଆଦିଲ୍ଲୀ, ୩୧ ଅକ୍ଟୋବର(ହି.ସ.) – ଲୋକସଭା ବାଚସ୍ପତି ଓମ୍ ବିର୍ଲା ଶନିବାର ଦିନ ସମ୍ବିଧାନ ସଭାର ସେଂଟ୍ରାଲ ହଲରେ ଥିବା ସର୍ଦ୍ଦାର ବଲ୍ଲଭଭାଇ ପଟେଲଙ୍କ ପ୍ରତିକୃତିରେ ତାଙ୍କ ଜନ୍ମବାର୍ଷିକୀ ଅବସରରେ ପୁଷ୍ପମାଲ୍ୟ ଅର୍ପଣ କରିଛନ୍ତି।
ଏହି ଅବସରରେ କେନ୍ଦ୍ରମନ୍ତ୍ରୀ ରାଜନାଥ ସିଂହ, ଜେ.ପି. ନଡ୍ଡା, କିରେନ ରିଜିଜୁ, ରାଜ୍ୟସଭାରେ ବିରୋଧୀ ଦଳ ନେତା ମଲ୍ଲିକାର୍ଜୁନ ଖଡ଼ଗେ, ରାଜ୍ୟସଭାର ଉପାଧ୍ୟକ୍ଷ ହରିବଂଶ, ରାଜ୍ୟସଭା ସାଂସଦ ନୀତିନ ନବୀନ ଏବଂ ସୋନିଆ ଗାନ୍ଧୀଙ୍କ ସମେତ ସାଂସଦ, ପୂର୍ବତନ ସାଂସଦ ଏବଂ ଅନ୍ୟ ମାନ୍ୟଗଣ୍ୟ ବ୍ୟକ୍ତିମାନେ ସର୍ଦ୍ଦାର ବଲ୍ଲଭଭାଇ ପଟେଲଙ୍କ ପ୍ରତିମୂର୍ତିରେ ପୁଷ୍ପମାଲ୍ୟ ଅର୍ପଣ କରିଥିଲେ।
ଲୋକସଭା ସାଧାରଣ ସମ୍ପାଦକ ଉତ୍ପଲ କୁମାର ସିଂହ ଏବଂ ରାଜ୍ୟସଭା ସାଧାରଣ ସମ୍ପାଦକ ପି.ସି. ମୋଦୀ ଏବଂ ଲୋକସଭା ତଥା ରାଜ୍ୟସଭା ସଚିବାଳୟର ବରିଷ୍ଠ ଅଧିକାରୀମାନେ ମଧ୍ୟ ସର୍ଦ୍ଦାର ପଟେଲଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ।
ଏହି ଅବସରରେ ଉଦ୍ବୋଧନ ଦେଇ ଲୋକସଭା ବାଚସ୍ପତି ଓମ୍ ବିର୍ଲା ଦେଶର ଯୁବକମାନଙ୍କୁ ଲୌହ ପୁରୁଷ ସର୍ଦ୍ଦାର ବଲ୍ଲଭଭାଇ ପଟେଲଙ୍କ ଜୀବନ ଏବଂ ଆଦର୍ଶରୁ ପ୍ରେରଣା ନେବା ଏବଂ ଭାରତର ଜାତୀୟ ଏକତା ଏବଂ ଅଖଣ୍ଡତାକୁ ମଜବୁତ କରିବା ତଥା ଏକ ବିକଶିତ ରାଷ୍ଟ୍ର ଗଠନ ଦିଗରେ ସେମାନଙ୍କର ଦକ୍ଷତା, ନବସୃଜନ ଏବଂ ସାମୂହିକ ପ୍ରୟାସକୁ ଉତ୍ସର୍ଗ କରିବାକୁ ଆହ୍ୱାନ କରିଥିଲେ।
ସର୍ଦ୍ଦାର ପଟେଲଙ୍କ ଜୟନ୍ତୀ ଅବସରରେ ସମ୍ବିଧାନ ସଭାରେ ବିଭିନ୍ନ ରାଜ୍ୟର ଯୁବ ଛାତ୍ରଛାତ୍ରୀ ଏବଂ ଅଂଶଗ୍ରହଣକାରୀମାନଙ୍କୁ ସମ୍ବୋଧିତ କରି ବିର୍ଲା କହିଥିଲେ ଯେ ମହାନ ସ୍ୱାଧୀନତା ସଂଗ୍ରାମୀ ଏବଂ ଆଧୁନିକ ଭାରତର ଜାତୀୟ ଏକତାର ସ୍ଥପତିଙ୍କ ଜୀବନ ହେଉଛି ଦୃଢ଼ ସଂକଳ୍ପ, ଅସାଧାରଣ ସାଂଗଠନିକ ଦକ୍ଷତା, ଦୂରଦୃଷ୍ଟି ଏବଂ ନିର୍ଣ୍ଣାୟକ ନେତୃତ୍ୱର ଏକ ଅତୁଳନୀୟ ଉଦାହରଣ।
ହିନ୍ଦୁସ୍ଥାନ ସମାଚାର/ବୀଣାପାଣି
.......................................
ହିନ୍ଦୁସ୍ଥାନ ସମାଚାର / ବୀଣାପାଣି
