ଇନ୍ଦୋର, ୩୧ ଅକ୍ଟୋବର (ହି.ସ.)। ରାଷ୍ଟ୍ରୀୟ ସ୍ୱୟଂସେବକ ସଂଘ (ଆରଏସଏସ)ର ଅଖିଳ ଭାରତୀୟ ପ୍ରଚାର ପ୍ରମୁଖ ସୁନୀଲ ଆମ୍ବେକର ଶନିବାର କହିଛନ୍ତି ଯେ, ସଂଘର ଶତବାର୍ଷିକୀ ବର୍ଷରେ ଦେଶବ୍ୟାପୀ ହୋଇଥିବା ସାଂଗଠନିକ ବିସ୍ତାରକୁ ଆଧାର କରି ଭବିଷ୍ୟତରେ ସଂଗଠନର ବିସ୍ତାର ପାଇଁ ନୂତନ କାର୍ଯ୍ୟଯୋଜନା ପ୍ରସ୍ତୁତ କରାଯିବ।
ସୁନୀଲ ଆମ୍ବେକର କହିଛନ୍ତି ଯେ, ଶତବାର୍ଷିକୀ ବର୍ଷରେ ଦେଶବ୍ୟାପୀ ହୋଇଥିବା ସାଂଗଠନିକ ବିସ୍ତାର, ସାମାଜିକ ସମ୍ପର୍କ ଏବଂ ସେବା କାର୍ଯ୍ୟର ଅନୁଭୂତିକୁ ଆଧାର କରି ଭବିଷ୍ୟତର କାର୍ଯ୍ୟଯୋଜନା ପ୍ରସ୍ତୁତି କରିବାକୁ ସଂଘ ପ୍ରସ୍ତୁତି ଚଳାଇଛି। ଏଥିପାଇଁ ନଭେମ୍ବର ୨ରୁ ୪ ତାରିଖ ପର୍ଯ୍ୟନ୍ତ ଇନ୍ଦୋରର ଡେଲି କଲେଜ ପଡ଼ିଆରେ ସଂଘର ଅଖିଳ ଭାରତୀୟ କାର୍ଯ୍ୟକାରୀ ମଣ୍ଡଳର ବାର୍ଷିକ ବୈଠକ ଅନୁଷ୍ଠିତ ହେବ। ଶନିବାର ସାମ୍ବାଦିକମାନଙ୍କ ସହ ଆଲୋଚନା କରି ସେ ଏହି ସୂଚନା ଦେଇଛନ୍ତି।
ସେ କହିଛନ୍ତି ଯେ, ସଂଘର ସରସଂଘଚାଳକ ଡଃ ମୋହନ ଭାଗବତ ଏବଂ ସରକାର୍ଯ୍ୟବାହ ଦତ୍ତାତ୍ରେୟ ହୋସବାଲେଙ୍କ ସମେତ ସଂଘର ଶୀର୍ଷ ନେତୃତ୍ୱ ଏବଂ ଦେଶର ବିଭିନ୍ନ ଅଞ୍ଚଳରୁ ଆସୁଥିବା ୪୦୮ ଜଣ ପ୍ରମୁଖ କାର୍ଯ୍ୟକର୍ତ୍ତା ଏହି ତିନିଦିନିଆ ବୈଠକରେ ଯୋଗଦେବେ। ସଂଗଠନର ଆଗାମୀ ଦିଗ ନିର୍ଦ୍ଧାରଣ କ୍ଷେତ୍ରରେ ଏହି ବୈଠକ ବେଶ୍ ଗୁରୁତ୍ୱପୂର୍ଣ୍ଣ ହେବ।
ବୈଠକରେ ଶତବାର୍ଷିକୀ ବର୍ଷରେ ଆୟୋଜିତ କାର୍ଯ୍ୟକ୍ରମଗୁଡ଼ିକର ସମୀକ୍ଷା ସହ ସଂଗଠନର ବିସ୍ତାର, ହିନ୍ଦୁ ସମ୍ମିଳନୀ, ଗୃହ ସମ୍ପର୍କ ଅଭିଯାନ, ସେବା କାର୍ଯ୍ୟରେ ସମାଜର ଭାଗିଦାରୀ ଏବଂ ଯୁବକ-ଯୁବତୀ ଓ ମହିଳାମାନଙ୍କ ମଧ୍ୟରେ ବଢ଼ିଥିବା ସମ୍ପର୍କର ସମୀକ୍ଷା କରାଯିବ। ଏହା ସହ ସାଂଗଠନିକ ଢାଞ୍ଚାରେ ସମ୍ଭାବ୍ୟ ପରିବର୍ତ୍ତନ, ଜନଜାଗରଣ, ପଞ୍ଚ ପରିବର୍ତ୍ତନ, ନିଶାଦ୍ରବ୍ୟର ଆହ୍ୱାନ, ଡିଜିଟାଲ୍ ମାଧ୍ୟମରେ ପ୍ରସାରିତ ବିଷୟବସ୍ତୁ, ବାହ୍ୟ ଶକ୍ତିଙ୍କ ହସ୍ତକ୍ଷେପ ଏବଂ ବିଶ୍ୱ ପରିସ୍ଥିତି ଉପରେ ମଧ୍ୟ ଆଲୋଚନା ହେବ। ସରସଂଘଚାଳକଙ୍କ ବିଦେଶ ଗସ୍ତରୁ ମିଳିଥିବା ଅନୁଭୂତି ଏବଂ ବିଶ୍ୱର ପ୍ରମୁଖ ବ୍ୟକ୍ତିମାନଙ୍କ ସହ ହୋଇଥିବା ଆଲୋଚନାକୁ ଆଗକୁ ବଢ଼ାଇବାର ରଣନୀତି ମଧ୍ୟ ବୈଠକର ଏଜେଣ୍ଡାରେ ରହିବ।
୧୩ ହଜାର ନୂଆ ଶାଖାରେ ସଂଗଠନ ବିସ୍ତାରର ନୂଆ ଚିତ୍ର
ସଂଘର ଏହି ବୈଠକର ମୁଖ୍ୟ ଆକର୍ଷଣ ରହିବ ସଂଗଠନର ବିସ୍ତାର ସମ୍ପର୍କିତ ତଥ୍ୟ ଏବଂ ଶତବାର୍ଷିକୀ ବର୍ଷରେ ମିଳିଥିବା ଅନୁଭୂତି। ଅଖିଳ ଭାରତୀୟ ପ୍ରଚାର ପ୍ରମୁଖଙ୍କ ଅନୁଯାୟୀ, ଦେଶବ୍ୟାପୀ ସଂଘର ଦୈନିକ ଶାଖା ସଂଖ୍ୟା ବୃଦ୍ଧି ପାଇ ୧,୦୧,୧୫୧ରେ ପହଞ୍ଚିଛି। ଏହା ବ୍ୟତୀତ ସାପ୍ତାହିକ, ମାସିକ ଏବଂ ଅନ୍ୟାନ୍ୟ ମିଳନ କାର୍ଯ୍ୟକ୍ରମ ୧,୧୦,୮୪୯ଟି ସ୍ଥାନରେ ପହଞ୍ଚିଛି। ଅକ୍ଟୋବର ୨୦୨୫ରୁ ଏପର୍ଯ୍ୟନ୍ତ ଦେଶରେ ୧୩ ହଜାର ନୂଆ ଶାଖା ଆରମ୍ଭ ହୋଇଛି। ଏହି ତଥ୍ୟ ସଂଘର ସାଂଗଠନିକ କାର୍ଯ୍ୟକଳାପର ଭୌଗୋଳିକ ବିସ୍ତାରକୁ ସ୍ପଷ୍ଟ କରୁଛି।
ଆମ୍ବେକର କହିଛନ୍ତି ଯେ, ଶତବାର୍ଷିକୀ ପୂର୍ବରୁ ସଂଘ ତିନିବର୍ଷ ପାଇଁ କାର୍ଯ୍ୟ ବିସ୍ତାର ଯୋଜନା ପ୍ରସ୍ତୁତ କରିଥିଲା। ଏହି ସମୟରେ ସଂଗଠନର ପହଞ୍ଚ ବଢ଼ାଇବା, ସମାଜର ବିଭିନ୍ନ ବର୍ଗ ସହ ସମ୍ପର୍କ ସ୍ଥାପନ କରିବା ଏବଂ ସ୍ୱୟଂସେବକଙ୍କ ଭାଗିଦାରୀକୁ ବ୍ୟାପକ କରିବା ଉପରେ ଗୁରୁତ୍ୱ ଦିଆଯାଇଥିଲା। ଏବେ ଶତବାର୍ଷିକୀ କାର୍ଯ୍ୟକ୍ରମ ଶେଷ ହେବା ପରେ ଅଖିଳ ଭାରତୀୟ କାର୍ଯ୍ୟକାରୀ ମଣ୍ଡଳରେ ଏହି ସମସ୍ତ କାର୍ଯ୍ୟର ସମୀକ୍ଷା କରାଯିବ। କେଉଁ ଅଞ୍ଚଳରେ ସଂଗଠନର କାର୍ଯ୍ୟ ବଢ଼ିଛି, କେଉଁ କ୍ଷେତ୍ରରେ ସମାଜର ଅଧିକ ଭାଗିଦାରୀ ରହିଛି ଏବଂ ମିଳିଥିବା ଅନୁଭୂତି ଆଧାରରେ ଆଗକୁ କେଉଁ ବିଷୟକୁ ପ୍ରାଥମିକତା ଦିଆଯିବ, ସେ ସମ୍ପର୍କରେ ଆଲୋଚନା ହେବ।
୬୫,୬୬୦ ହିନ୍ଦୁ ସମ୍ମିଳନୀ, ସାମାଜିକ ସମ୍ପର୍କକୁ ପ୍ରାଥମିକତା
ସେ କହିଛନ୍ତି ଯେ, ଶତବାର୍ଷିକୀ ବର୍ଷରେ ଆୟୋଜିତ ହିନ୍ଦୁ ସମ୍ମିଳନୀଗୁଡ଼ିକ ସଂଘର ସାମାଜିକ ସମ୍ପର୍କ କାର୍ଯ୍ୟକ୍ରମର ଏକ ପ୍ରମୁଖ ଅଂଶ ଥିଲା। ଉପଲବ୍ଧ ତଥ୍ୟ ଅନୁଯାୟୀ, ଗ୍ରାମଗୁଡ଼ିକୁ ନେଇ ଗଠିତ ମଣ୍ଡଳ ଏବଂ ସହରାଞ୍ଚଳର ବସ୍ତି ସ୍ତରରେ ଏପର୍ଯ୍ୟନ୍ତ ୬୫,୬୬୦ଟି ହିନ୍ଦୁ ସମ୍ମିଳନୀ ଆୟୋଜିତ ହୋଇଛି। ଏହି କାର୍ଯ୍ୟକ୍ରମ ମାଧ୍ୟମରେ ସମାଜର ବିଭିନ୍ନ ବର୍ଗ ମଧ୍ୟରେ ଆଲୋଚନା ଓ ସହଭାଗିତା ବଢ଼ାଇବାକୁ ପ୍ରୟାସ କରାଯାଇଛି।
ବୈଠକରେ ଏହି ସମ୍ମିଳନୀଗୁଡ଼ିକର ଅନୁଭୂତି ସମୀକ୍ଷା କରାଯିବା ସହ ଏଥିରୁ ମିଳିଥିବା ପ୍ରସ୍ତାବ ଏବଂ ସାମାଜିକ ପ୍ରତିକ୍ରିୟାକୁ ଆଗାମୀ କାର୍ଯ୍ୟକ୍ରମରେ କିପରି ସାମିଲ କରାଯିବ, ସେନେଇ ଚିନ୍ତାବିମର୍ଶ ହେବ। ଶତବାର୍ଷିକୀରେ ଆୟୋଜିତ କାର୍ଯ୍ୟକ୍ରମଗୁଡ଼ିକୁ ନିରନ୍ତର ସାମାଜିକ ସମ୍ପର୍କ ଓ ସହଭାଗିତା ସହ ଯୋଡ଼ିବା ଦିଗରେ ଏହି ସମୀକ୍ଷା ଗୁରୁତ୍ୱପୂର୍ଣ୍ଣ।
ଗୃହ ସମ୍ପର୍କ ଅଭିଯାନ ମଧ୍ୟ ବୈଠକର ଏକ ପ୍ରମୁଖ ବିଷୟ ରହିବ। ଏହି ଅଭିଯାନରେ ସମାଜରୁ ଭଲ ସହଯୋଗ ମିଳିଥିବା ସେ କହିଛନ୍ତି। ସେବା କାର୍ଯ୍ୟର ବିସ୍ତାର ଏବଂ ସାମାଜିକ ହିତ ପାଇଁ କାର୍ଯ୍ୟ କରୁଥିବା ବିଭିନ୍ନ ସଂଗଠନର ବଢ଼ୁଥିବା ଉତ୍ସାହ ଉପରେ ମଧ୍ୟ ଆଲୋଚନା ହେବ। ଅନେକ ସଂଗଠନ ସଂଘ ସହ ମିଶି କାମ କରିବାକୁ ଇଚ୍ଛା ପ୍ରକାଶ କରିଛନ୍ତି। ଆବଶ୍ୟକତା ଅନୁସାରେ ସ୍ୱୟଂସେବକଙ୍କ ସହଯୋଗରେ ଏଭଳି ପ୍ରୟାସକୁ ଆଗକୁ ବଢ଼ାଇବା ନେଇ ବିଚାର କରାଯିବ।
ମହିଳା ଓ ଯୁବବର୍ଗଙ୍କ ଭାଗିଦାରୀର ମଧ୍ୟ ହେବ ସମୀକ୍ଷା
ଶତବାର୍ଷିକୀ ବର୍ଷରେ ଆୟୋଜିତ କାର୍ଯ୍ୟକ୍ରମଗୁଡ଼ିକରେ ମହିଳାମାନଙ୍କ ଭାଗିଦାରୀ ମଧ୍ୟ ଉଲ୍ଲେଖନୀୟ ରହିଛି। ଗୃହ ସମ୍ପର୍କ ଅଭିଯାନ, ହିନ୍ଦୁ ସମ୍ମିଳନୀ ଏବଂ ଅନ୍ୟାନ୍ୟ କାର୍ଯ୍ୟକ୍ରମର ଅନୁଭୂତିରୁ ଏହା ସ୍ପଷ୍ଟ ହୋଇଛି। ଏହା ବ୍ୟତୀତ ସହର, ଗ୍ରାମ ଏବଂ ଶିକ୍ଷାନୁଷ୍ଠାନଗୁଡ଼ିକରେ ଯୁବବର୍ଗଙ୍କ ପାଇଁ ଆୟୋଜିତ କାର୍ଯ୍ୟକ୍ରମରେ ବହୁ ସଂଖ୍ୟାରେ ଯୁବକ-ଯୁବତୀ ଭାଗ ନେଇଛନ୍ତି।
ଅଖିଳ ଭାରତୀୟ କାର୍ଯ୍ୟକାରୀ ମଣ୍ଡଳରେ ଏହି କାର୍ଯ୍ୟକ୍ରମଗୁଡ଼ିକର ସକାରାତ୍ମକ ଦୃଷ୍ଟିକୋଣରୁ ସମୀକ୍ଷା କରାଯିବ। ସମାଜର ଯେଉଁ ବର୍ଗଗୁଡ଼ିକ ସହ ସମ୍ପର୍କ ବଢ଼ିଛି, ସେମାନଙ୍କଠାରୁ ମିଳିଥିବା ପ୍ରସ୍ତାବ ଓ ଆଶା ଆଧାରରେ ଆଗାମୀ କାର୍ଯ୍ୟକ୍ରମର ଦିଗ ନିର୍ଦ୍ଧାରଣ କରାଯିବ। ଯୁବବର୍ଗଙ୍କ ସହ ଆଲୋଚନା, ସାମାଜିକ ବିଷୟରେ ସଚେତନତା ଏବଂ ସେବା କାର୍ଯ୍ୟରେ ସହଭାଗିତା ଆଦି ବିଷୟରେ ମିଳିଥିବା ଅନୁଭୂତି ଏହି ପ୍ରକ୍ରିୟାର ଗୁରୁତ୍ୱପୂର୍ଣ୍ଣ ଅଂଶ ହେବ।
ଇନ୍ଦୋର ବୈଠକର ଅନ୍ୟତମ ପ୍ରମୁଖ ଏଜେଣ୍ଡା ହେଉଛି ସଂଘର ସାଂଗଠନିକ ଗଠନରେ ସମ୍ଭାବ୍ୟ ପରିବର୍ତ୍ତନ। ଆମ୍ବେକରଙ୍କ ଅନୁଯାୟୀ, ସାଂଗଠନିକ ଢାଞ୍ଚାକୁ ନେଇ ପୂର୍ବରୁ ଆଲୋଚନା ହୋଇଛି। ଏବେ ଅଖିଳ ଭାରତୀୟ କାର୍ଯ୍ୟକାରୀ ମଣ୍ଡଳ ବୈଠକରେ ଏହି ବିଷୟରେ ଆଗକୁ ଆଲୋଚନା ହେବ ଏବଂ ଭବିଷ୍ୟତର ବ୍ୟବସ୍ଥାର ସ୍ୱରୂପ ନିର୍ଦ୍ଧାରଣ ନେଇ ବିଚାର କରାଯିବ। ପ୍ରସ୍ତାବିତ ସାଂଗଠନିକ ଢାଞ୍ଚା ଅନୁସାରେ ଆସନ୍ତା ବର୍ଷ ମାର୍ଚ୍ଚରୁ କାର୍ଯ୍ୟ ଆରମ୍ଭ କରିବାକୁ ପ୍ରସ୍ତୁତି ଚାଲିଛି। ତେଣୁ ଏହି ବୈଠକରେ ହେବାକୁ ଥିବା ଆଲୋଚନା ସଂଘର ଆଗାମୀ କାର୍ଯ୍ୟପ୍ରଣାଳୀ ପାଇଁ ଗୁରୁତ୍ୱପୂର୍ଣ୍ଣ ହେବ। ଏହା ସହ ସାଂଗଠନିକ କାର୍ଯ୍ୟରେ ଜନଜାଗରଣର ଭୂମିକା ଉପରେ ମଧ୍ୟ ଆଲୋଚନା ହେବ।
ସଂଘ ଅନୁଯାୟୀ, ସାମାଜିକ ଜୀବନରେ ଏଭଳି ଅନେକ ବିଷୟ ସାମ୍ନାକୁ ଆସୁଛି, ଯେଉଁଥିରେ ସଠିକ୍ ସୂଚନା ଏବଂ ଦୃଷ୍ଟିକୋଣ ସମାଜ ପର୍ଯ୍ୟନ୍ତ ପହଞ୍ଚାଇବା ଆବଶ୍ୟକ। ଜନଜାଗରଣ ମାଧ୍ୟମରେ ଏଭଳି ବିଷୟଗୁଡ଼ିକୁ କିପରି ପ୍ରଭାବଶାଳୀ ଭାବେ ସମାଜ ସମ୍ମୁଖରେ ରଖାଯାଇପାରିବ, ସେନେଇ ଚିନ୍ତାବିମର୍ଶ ହେବ। ସାମାଜିକ ସମ୍ପର୍କରୁ ମିଳିଥିବା ଅନୁଭୂତିକୁ ସଂଗଠନର ଆଗାମୀ କାର୍ଯ୍ୟକ୍ରମ ସହ କିପରି ଯୋଡ଼ାଯିବ, ସେନେଇ ମଧ୍ୟ ଆଲୋଚନା ହେବ।
ନିଶାଦ୍ରବ୍ୟଠାରୁ ଡିଜିଟାଲ୍ ବିଷୟବସ୍ତୁ ପର୍ଯ୍ୟନ୍ତ, ବିଭିନ୍ନ ଆହ୍ୱାନ ଉପରେ ହେବ ମନ୍ଥନ
ସାଂଗଠନିକ ବିସ୍ତାର ସହ ସମସାମୟିକ ସାମାଜିକ ଆହ୍ୱାନ ଏବଂ ଜାତୀୟ ଗୁରୁତ୍ୱର ବିଭିନ୍ନ ବିଷୟ ଉପରେ ମଧ୍ୟ ବ୍ୟାପକ ଆଲୋଚନା ହେବ। ନିଶାଦ୍ରବ୍ୟର ବଢ଼ୁଥିବା ସମସ୍ୟା, ନୂତନ ଡିଜିଟାଲ୍ ମାଧ୍ୟମରେ ପ୍ରସାରିତ ହେଉଥିବା ବିଷୟବସ୍ତୁ, ବାହ୍ୟ ଶକ୍ତିଙ୍କ ହସ୍ତକ୍ଷେପ ଏବଂ ପରିବର୍ତ୍ତିତ ବିଶ୍ୱ ପରିସ୍ଥିତି ଏହି ବୈଠକର ପ୍ରମୁଖ ଆଲୋଚ୍ୟ ବିଷୟ ରହିବ।
ବିଜୟାଦଶମୀ ଅବସରରେ ସରସଂଘଚାଳକ ଡଃ ମୋହନ ଭାଗବତ ନିଜ ଉଦ୍ବୋଧନରେ ଉଠାଇଥିବା ଗୁରୁତ୍ୱପୂର୍ଣ୍ଣ ପ୍ରସଙ୍ଗଗୁଡ଼ିକ ଉପରେ ଆଗାମୀ କାର୍ଯ୍ୟଦିଗ ନିର୍ଦ୍ଧାରଣ ପାଇଁ ମଧ୍ୟ ଆଲୋଚନା ହେବ। ସାମାଜିକ ପରିସ୍ଥିତିରେ ସାମ୍ନାକୁ ଆସୁଥିବା ଆହ୍ୱାନଗୁଡ଼ିକ ପରିପ୍ରେକ୍ଷୀରେ ଜନଜାଗରଣ ଏବଂ ସାଂଗଠନିକ କାର୍ଯ୍ୟକଳାପର ଭୂମିକା ଉପରେ ବିଚାର କରାଯିବ। ଏହି ଆଲୋଚନା ଆଧାରରେ ଆଗାମୀ ସମୟର ପ୍ରାଥମିକତା ଓ କାର୍ଯ୍ୟକ୍ରମକୁ ଦିଗ ଦେବାକୁ ପ୍ରୟାସ କରାଯିବ।
ଏହା ସହ ଆମ୍ବେକର କହିଛନ୍ତି ଯେ, ସଂଘର ପଞ୍ଚ ପରିବର୍ତ୍ତନ ସହ ଜଡ଼ିତ ବିଷୟଗୁଡ଼ିକ ମଧ୍ୟ ବୈଠକର ଏଜେଣ୍ଡାରେ ସାମିଲ ରହିଛି। ଏହି ବିଷୟଗୁଡ଼ିକୁ ନେଇ ଆଗାମୀ ଯୋଜନା ପ୍ରସ୍ତୁତ କରିବା ଉପରେ ବିଚାର କରାଯିବ। ଶତବାର୍ଷିକୀ ବର୍ଷରେ ହୋଇଥିବା କାର୍ଯ୍ୟକ୍ରମରୁ ମିଳିଥିବା ଅନୁଭୂତିକୁ ଆଗାମୀ କାର୍ଯ୍ୟକଳାପ ସହ ଯୋଡ଼ିବା ଏହାର ଏକ ଗୁରୁତ୍ୱପୂର୍ଣ୍ଣ ଅଂଶ ହେବ।
ଆମେରିକା, କାନାଡା ଓ ବ୍ରିଟେନ୍ ଗସ୍ତର ଅନୁଭୂତି ମଧ୍ୟ ଏଜେଣ୍ଡାରେ
ସରସଂଘଚାଳକ ଡଃ ମୋହନ ଭାଗବତଙ୍କ ଚଳିତ ବର୍ଷର ଆମେରିକା, କାନାଡା ଏବଂ ବ୍ରିଟେନ୍ ଗସ୍ତ ସମ୍ପର୍କରେ ମଧ୍ୟ ଅଖିଳ ଭାରତୀୟ କାର୍ଯ୍ୟକାରୀ ମଣ୍ଡଳରେ ଆଲୋଚନା ହେବ। ଏହି ଗସ୍ତ ସମୟରେ ସେ ହିନ୍ଦୁତ୍ୱର ଧାରଣା, ଭାରତର ପ୍ରଗତି ଏବଂ ବିଶ୍ୱଶାନ୍ତି କ୍ଷେତ୍ରରେ ଭାରତର ଭୂମିକା ଭଳି ବିଷୟ ଉପରେ ନିଜର ମତ ରଖିଥିଲେ।
ବିଭିନ୍ନ କ୍ଷେତ୍ରର ପ୍ରମୁଖ ବ୍ୟକ୍ତିମାନଙ୍କ ସହ ହୋଇଥିବା ଆଲୋଚନାର ଅନୁଭୂତି ମଧ୍ୟ ସମୀକ୍ଷା କରାଯିବ। ଏହା ସହ ଆଗାମୀ ସମୟରେ ବିଶ୍ୱସ୍ତରୀୟ ସମ୍ପର୍କ ଓ ଆଲୋଚନା ପ୍ରକ୍ରିୟାକୁ କିପରି ଆଗକୁ ବଢ଼ାଯିବ, ସେନେଇ ବିଚାର କରାଯିବ। ପରିବର୍ତ୍ତିତ ଅନ୍ତର୍ଜାତୀୟ ପରିସ୍ଥିତିରେ ବିଶ୍ୱସ୍ତରରେ ଭାରତର ବିଚାର ଓ ଦୃଷ୍ଟିକୋଣକୁ ଉପସ୍ଥାପନ କରିବା ସମ୍ପର୍କିତ ଅନୁଭୂତି ମଧ୍ୟ ଏହି ଆଲୋଚନାର ଅଂଶ ହେବ। ଆସନ୍ତା ବର୍ଷ ସରସଂଘଚାଳକଙ୍କ ବିଦେଶ ଗସ୍ତ କାର୍ଯ୍ୟକ୍ରମ ସମ୍ପର୍କରେ ମଧ୍ୟ ବୈଠକରେ ବିଚାର କରାଯିବ।
୪୬ଟି ପ୍ରାନ୍ତ ଓ ୧୧ଟି କ୍ଷେତ୍ରର ପ୍ରମୁଖ ପଦାଧିକାରୀ ହେବେ ସାମିଲ
ତିନିଦିନିଆ ଏହି ବୈଠକରେ ସଂଘର ସମସ୍ତ ୬ ଜଣ ସହ ସରକାର୍ଯ୍ୟବାହ, ଅଖିଳ ଭାରତୀୟ କାର୍ଯ୍ୟ ବିଭାଗର ପ୍ରମୁଖ ଏବଂ କାର୍ଯ୍ୟକାରିଣୀ ସଦସ୍ୟମାନେ ଯୋଗଦେବେ।
ଏହା ବ୍ୟତୀତ ଦେଶର ୪୬ଟି ପ୍ରାନ୍ତର ପ୍ରାନ୍ତ ସଂଘଚାଳକ, ପ୍ରାନ୍ତ କାର୍ଯ୍ୟବାହ, ପ୍ରାନ୍ତ ପ୍ରଚାରକ, ସହ ପ୍ରଚାରକ ଏବଂ ସେମାନଙ୍କ ସହଯୋଗୀ ପଦାଧିକାରୀମାନେ ଉପସ୍ଥିତ ରହିବେ। ସଂଘର ସମସ୍ତ ୧୧ଟି କ୍ଷେତ୍ରର ପ୍ରମୁଖ ପଦାଧିକାରୀମାନେ ମଧ୍ୟ ଏହି ବୈଠକରେ ଯୋଗଦେବେ। ଏହିପରି ଜାତୀୟ ନେତୃତ୍ୱଠାରୁ ଆରମ୍ଭ କରି ବିଭିନ୍ନ ପ୍ରାନ୍ତ ଓ କ୍ଷେତ୍ରର ପ୍ରମୁଖ କାର୍ଯ୍ୟକର୍ତ୍ତାଙ୍କ ପର୍ଯ୍ୟନ୍ତ ସମସ୍ତଙ୍କ ଭାଗିଦାରୀ ରହିବ।
ଉଲ୍ଲେଖଯୋଗ୍ୟ ଯେ, ଶତବାର୍ଷିକୀ କାର୍ଯ୍ୟକ୍ରମର ସମାପ୍ତି ପରେ ଇନ୍ଦୋରରେ ଆୟୋଜିତ ହେଉଥିବା ଏହି ବୈଠକ ସଂଘ ପାଇଁ ଗତ ଏକ ବର୍ଷର ଅନୁଭୂତିର ସମୀକ୍ଷା ଏବଂ ଆଗାମୀ ବର୍ଷଗୁଡ଼ିକର ପ୍ରାଥମିକତା ନିର୍ଦ୍ଧାରଣ କରିବାର ଏକ ସୁଯୋଗ ହେବ। ଶାଖାର ବିସ୍ତାର, ସାମାଜିକ ସମ୍ପର୍କ, ସେବା କାର୍ଯ୍ୟ, ସାଂଗଠନିକ ଢାଞ୍ଚା ଏବଂ ବିଶ୍ୱସ୍ତରୀୟ ଆଲୋଚନା ଭଳି ବିଷୟ ଉପରେ ହେବାକୁ ଥିବା ମନ୍ଥନ ଶତବାର୍ଷିକୀ ବର୍ଷରେ ସୃଷ୍ଟି ହୋଇଥିବା ଗତିକୁ ଆଗକୁ କିପରି ନିରନ୍ତର ରଖାଯିବ, ତାହା ନିର୍ଦ୍ଧାରଣ କରିବାରେ ଗୁରୁତ୍ୱପୂର୍ଣ୍ଣ ହେବ।
ଏହି ସାମ୍ବାଦିକ ସମ୍ମିଳନୀରେ ସଂଘର ଅଖିଳ ଭାରତୀୟ ପ୍ରଚାର ପ୍ରମୁଖ ସୁନୀଲ ଆମ୍ବେକରଙ୍କ ସହ ମଞ୍ଚରେ ମାଳବା ପ୍ରାନ୍ତର ସଂଘଚାଳକ ଡଃ ପ୍ରକାଶ ଶାସ୍ତ୍ରୀ ଉପସ୍ଥିତ ଥିଲେ। ଏହା ବ୍ୟତୀତ ବିଶେଷ ଭାବେ ଅଖିଳ ଭାରତୀୟ ସହ ପ୍ରଚାର ପ୍ରମୁଖ ନରେନ୍ଦ୍ର ଠାକୁର, ପ୍ରଦୀପ ଯୋଶୀ ଏବଂ ମଧ୍ୟକ୍ଷେତ୍ରର ପ୍ରଚାର ପ୍ରମୁଖ କୈଳାସଚନ୍ଦ୍ର ମଧ୍ୟ ଉପସ୍ଥିତ ଥିଲେ।
ହିନ୍ଦୁସ୍ଥାନ ସମାଚାର / ସ୍ୱାଗତିକା
