ବଲାଙ୍ଗୀର, ୩୧ ଅକ୍ଟୋବର(ହି.ସ.) – ଲୌହମାନବ ସର୍ଦ୍ଦାର ବଲ୍ଲଭଭାଇ ପଟେଲଙ୍କ ଜୟନ୍ତୀ ତଥା ରାଷ୍ଟ୍ରୀୟ ଏକତା ଦିବସ ଅବସରରେ ଜାତୀୟ ଏକତା, ଭାଇଚାରା, ଶାରୀରିକ ସୁସ୍ଥତା ଓ ପରିବେଶ ସୁରକ୍ଷାର ବାର୍ତା ପ୍ରସାର ଉଦ୍ଦେଶ୍ୟରେ “ଡିବ୍ରି” ଏବଂ “ପଲ୍ଲୀ ଆଲୋକ ପାଠାଗାର”ର ମିଳିତ ଆନୁକୂଲ୍ୟରେ “ୟୁନିଟି ରାଇଡ୍ ସାଇକ୍ଲୋଥନ୍-୨୦୨୬” ଆୟୋଜିତ ହୋଇଯାଇଛି। ଏହି ଅବସରରେ ମୁଖ୍ୟ ଅତିଥି ଭାବେ ଓଡ଼ିଶା ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ, ସଂସଦୀୟ ବ୍ୟାପାର, ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରୀ ଡ଼. ମୁକେଶ ମହାଲିଙ୍ଗ ଯୋଗ ଦେଇଥିଲେ। ମନ୍ତ୍ରୀ ନିଜେ ସାଇକେଲ ଚାଳନାରେ ଅଂଶଗ୍ରହଣ କରି ପ୍ରାୟ ୭୦ କିଲୋମିଟର ଦୀର୍ଘ ଯାତ୍ରା ସମ୍ପୂର୍ଣ୍ଣ କରିଥିଲେ। ତାଙ୍କର ଏହି ଉତ୍ସାହଜନକ ଅଂଶଗ୍ରହଣ ଯୁବପିଢ଼ି ଓ ସାଇକେଲ ପ୍ରେମୀଙ୍କୁ ଉତ୍ସାହିତ କରିବା ସହ ଏକ ସୁସ୍ଥ ଜୀବନଶୈଳୀ ଆପଣାଇବାକୁ ପ୍ରେରଣା ଯୋଗାଇଥିଲା।
ସକାଳ ୭ଟାରେ ଆଗଲପୁର ଠାରୁ ଏହି ସାଇକ୍ଲୋଥନ୍ ଆରମ୍ଭ ହୋଇ ଭରସୁଜା, କରକଚିଆ ଛକ, ଲୋଇସିଂହା, ଦୁର୍ଗାପାଲି, ଜାମଗାଁ, ସାତମାଇଲ ଛକ, ଛତାପିପଲ ଓ ଦଶପୁର ଦେଇ ଶେଷରେ ମହିମୁଣ୍ଡା ଠାରେ ଉଦ୍ଯାପିତ ହୋଇଥିଲା। ଏହି ସାଇକ୍ଲୋଥନ୍ କେବଳ ଏକ କ୍ରୀଡ଼ାଭିତିକ କାର୍ଯ୍ୟକ୍ରମ ନଥିଲା, ବରଂ ସମାଜରେ ଏକତା, ସମନ୍ୱୟ, ଭାଇଚାରା ଓ ସାମାଜିକ ଦାୟିତ୍ୱବୋଧର ଭାବନାକୁ ସୁଦୃଢ଼ କରିବାର ଏକ ଅଭିନବ ପ୍ରୟାସ ଥିଲା। ଏଥିରେ ବହୁ ସଂଖ୍ୟାରେ ସାଇକେଲ ଆରୋହୀ, ଯୁବବର୍ଗ ଓ ସ୍ଥାନୀୟ ନାଗରିକ ଉତ୍ସାହର ସହ ଯୋଗଦେଇ ଜାତୀୟ ଏକତାର ସନ୍ଦେଶକୁ ଜନମାନସରେ ପହଂଚାଇଥିଲେ।
“ଏକତା ହିଁ ଆମ ଶକ୍ତି, ସୁସ୍ଥ ଜୀବନ ହିଁ ସମୃଦ୍ଧ ସମାଜର ଆଧାର”- ଏହି ମହତ୍ ବାର୍ତାକୁ ନେଇ ଆୟୋଜିତ ଏହି କାର୍ଯ୍ୟକ୍ରମ ସମଗ୍ର ଅଂଚଳରେ ଏକତାର ନୂତନ ଉତ୍ସାହ ସୃଷ୍ଟି କରିଥିଲା।
.......................................
ହିନ୍ଦୁସ୍ଥାନ ସମାଚାର / ଗୋପବନ୍ଧୁ
