ନୂଆଦିଲ୍ଲୀ, ୩୧ ଅକ୍ଟୋବର (ହି.ସ.) : ଭୋଟ ଚୋରି ପ୍ରସଙ୍ଗକୁ ନେଇ ଭାରତୀୟ ଜନତା ପାର୍ଟି (ବିଜେପି) କଂଗ୍ରେସ ଓ ଇଣ୍ଡି ମେଣ୍ଟକୁ ଟାର୍ଗେଟ କରିଛି। ବିରୋଧୀ ଦଳ ଗଣତନ୍ତ୍ର ନାଁରେ ସଂସଦର ପରିହାସ କରୁଛନ୍ତି ବୋଲି ବିଜେପି ଅଭିଯୋଗ କରିଛି। କଂଗ୍ରେସର ମକ୍ ପାର୍ଲାମେଣ୍ଟ କାର୍ଯ୍ୟକ୍ରମକୁ ପ୍ରଶ୍ନ କରି ଦଳ କହିଛି ଯେ ବାସ୍ତବ ସଂସଦରେ ଶୋଇବା, ଆଖି ମାରିବା, ଗୃହରେ ଅନୁପସ୍ଥିତ ରହିବା, ଗୃହର ମଧ୍ୟଭାଗରେ ହଟ୍ଟଗୋଳ କରିବା ଏବଂ ସଂସଦୀୟ କାର୍ଯ୍ୟକୁ ବାଧାପ୍ରାପ୍ତ କରିବା କଂଗ୍ରେସ ଓ ଇଣ୍ଡି ମେଣ୍ଟର କାର୍ଯ୍ୟଶୈଳୀ ହୋଇଆସିଛି।
ବିଜେପିର ରାଷ୍ଟ୍ରୀୟ ମୁଖପାତ୍ର ତଥା ସାଂସଦ ଡକ୍ଟର ସମ୍ବିତ ପାତ୍ର ଶନିବାର ଦଳୀୟ ମୁଖ୍ୟାଳୟରେ ଆୟୋଜିତ ସାମ୍ବାଦିକ ସମ୍ମିଳନୀରେ ସର୍ଦ୍ଦାର ବଲ୍ଲଭଭାଇ ପଟେଲଙ୍କ ଜୟନ୍ତୀ ପ୍ରସଙ୍ଗ ଉଠାଇ ଅଭିଯୋଗ କରିଥିଲେ ଯେ ଭାରତରେ ଭୋଟ ଚୋରିର ପ୍ରଥମ ଉଦାହରଣ ସ୍ୱାଧୀନତା ପରବର୍ତ୍ତୀ ପ୍ରାରମ୍ଭିକ ସମୟରେ ଦେଖିବାକୁ ମିଳିଥିଲା। ତାଙ୍କ ଦାବି ଅନୁଯାୟୀ, କଂଗ୍ରେସର ବରିଷ୍ଠ ନେତାମାନେ ସର୍ଦ୍ଦାର ପଟେଲଙ୍କ ସପକ୍ଷରେ ମତଦାନ କରିଥିଲେ, କିନ୍ତୁ ପଣ୍ଡିତ ଜବାହରଲାଲ ନେହରୁ ପ୍ରଧାନମନ୍ତ୍ରୀ ହୋଇଥିଲେ। ଏହାକୁ ଦେଶର ପ୍ରଥମ ‘ଅନିର୍ବାଚିତ ପ୍ରଧାନମନ୍ତ୍ରୀ’ ହେବାର ଉଦାହରଣ ବୋଲି ଦର୍ଶାଇ ନେହରୁ ପଟେଲଙ୍କୁ ତାଙ୍କ ଅଧିକାରରୁ ବଞ୍ଚିତ କରିଥିବା ଡକ୍ଟର ପାତ୍ର ଅଭିଯୋଗ କରିଥିଲେ।
କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେଙ୍କ ଭୋଟ ଚୋରି ସମ୍ପର୍କିତ ଅଭିଯୋଗର ଜବାବ ଦେଇ ଡକ୍ଟର ପାତ୍ର କହିଥିଲେ ଯେ ଖଡ଼ଗେଙ୍କ ଦାବି ଅନୁଯାୟୀ, ୧୩ କୋଟି ଭୋଟରଙ୍କ ଭୋଟ ଚୋରି ହୋଇଛି। ସେ ପ୍ରଶ୍ନ କରିଥିଲେ ଯେ ଯଦି ପ୍ରକୃତରେ ୧୩ କୋଟି ଲୋକଙ୍କ ନାମ ଭୋଟର ତାଲିକାରୁ କାଟି ଦିଆଯାଇଥାନ୍ତା, ତେବେ ଦେଶରେ ଶାନ୍ତି ବଜାୟ ରହିଥାନ୍ତା କି? ସେହି ଲୋକମାନେ ରାସ୍ତାକୁ କାହିଁକି ଓହ୍ଲାଇ ନଥାନ୍ତେ ବୋଲି ସେ ପ୍ରଶ୍ନ କରିଥିଲେ।
ଡକ୍ଟର ପାତ୍ର କହିଥିଲେ ଯେ ସ୍ୱତନ୍ତ୍ର ଗଭୀର ଭୋଟର ତାଲିକା ସଂଶୋଧନ (ଏସ୍ଆଇଆର୍) ପ୍ରକ୍ରିୟା ଏବେ ମଧ୍ୟ ଜାରି ରହିଛି। ଚୂଡ଼ାନ୍ତ ଭୋଟର ତାଲିକାରେ ନାମ ସାମିଲ କରିବା ପ୍ରକ୍ରିୟା ଏଯାଏଁ ଶେଷ ହୋଇନାହିଁ। ଯେଉଁମାନଙ୍କୁ ନିଜ ନାମ ଭୋଟର ତାଲିକାରେ ସାମିଲ ହୋଇନଥିବା ମନେ ହେଉଛି, ସେମାନେ ନିର୍ଦ୍ଧାରିତ ପ୍ରକ୍ରିୟା ଅନୁଯାୟୀ ଫର୍ମ-୬ ପୂରଣ କରିପାରିବେ ବୋଲି ସେ ସ୍ପଷ୍ଟ କରିଥିଲେ।
ବିଜେପି ମୁଖପାତ୍ର କହିଥିଲେ ଯେ ସରକାର, ବିରୋଧୀ ଦଳ ଏବଂ ସାମ୍ବାଦିକଙ୍କ ସମେତ ସମସ୍ତଙ୍କର ଦାୟିତ୍ୱ ହେଉଛି ଯେ କେବଳ ଭାରତୀୟ ନାଗରିକମାନେ ହିଁ ମତଦାନ ଅଧିକାର ପାଆନ୍ତୁ। ଅନୁପ୍ରବେଶକାରୀମାନଙ୍କୁ ଦେଶର ଭୋଟର ହେବାକୁ ଅନୁମତି ଦିଆଯିବା ଉଚିତ କି ବୋଲି ସେ ପ୍ରଶ୍ନ କରିଥିଲେ। ତାଙ୍କ ମତରେ, ଭୋଟର ତାଲିକା ସଂଶୋଧନର ଉଦ୍ଦେଶ୍ୟ ହେଉଛି ଯୋଗ୍ୟ ଭୋଟରଙ୍କ ନାମ ସୁନିଶ୍ଚିତ କରିବା ଏବଂ ତାଲିକାକୁ ତ୍ରୁଟିମୁକ୍ତ କରିବା।
ଫର୍ମ-୬ରେ ସଂଶୋଧନ କରାଯାଇଥିବା ନେଇ ଖଡ଼ଗେଙ୍କ ଅଭିଯୋଗର ଜବାବରେ ଡକ୍ଟର ପାତ୍ର କହିଥିଲେ ଯେ ଫର୍ମରେ କୌଣସି ସଂଶୋଧନ କରାଯାଇନାହିଁ। ବରଂ ଏହା ସହିତ ଏକ ଘୋଷଣାପତ୍ର ଯୋଡ଼ାଯାଇଛି। ଏହି ପ୍ରସଙ୍ଗରେ ସେ ୨୭ ମେ ୨୦୨୬ର ସୁପ୍ରିମକୋର୍ଟଙ୍କ ରାୟର ଉଦାହରଣ ଦେଇ ଦାବି କରିଥିଲେ ଯେ ଅଦାଲତ ମଧ୍ୟ ଫର୍ମ-୬ରେ ସଂଶୋଧନ ଏବଂ ଘୋଷଣାପତ୍ର ଯୋଡ଼ାଯିବା ମଧ୍ୟରେ ଥିବା ପାର୍ଥକ୍ୟକୁ ସ୍ପଷ୍ଟ କରିଛନ୍ତି।
ମୁଖ୍ୟ ନିର୍ବାଚନ ଆୟୁକ୍ତ ଜ୍ଞାନେଶ କୁମାରଙ୍କୁ ନେଇ ବିରୋଧୀଙ୍କ ଅଭିଯୋଗ ଉପରେ ଡକ୍ଟର ପାତ୍ର କହିଥିଲେ ଯେ ଏସ୍ଆଇଆର୍ ପ୍ରକ୍ରିୟା ଆରମ୍ଭ କରିବାର ନିଷ୍ପତ୍ତି ମୁଖ୍ୟ ନିର୍ବାଚନ ଆୟୁକ୍ତ ଏବଂ ଅନ୍ୟ ଦୁଇ ନିର୍ବାଚନ ଆୟୁକ୍ତଙ୍କ ସର୍ବସମ୍ମତିକ୍ରମେ ନିଆଯାଇଥିଲା। ନିର୍ବାଚନ ଆୟୋଗ ପକ୍ଷରୁ ଫଟୋ ଓ ବିବୃତି ମାଧ୍ୟମରେ ଏ ସମ୍ପର୍କରେ ସୂଚନା ମଧ୍ୟ ଦିଆଯାଇଥିଲା।
ଶେଷରେ ଖଡ଼ଗେଙ୍କ ଉପରେ ବାରମ୍ବାର ମିଥ୍ୟା ବୟାନ ଦେବାର ଅଭିଯୋଗ ଆଣି ଡକ୍ଟର ପାତ୍ର କହିଥିଲେ ଯେ ଏଭଳି ବୟାନ ଦ୍ୱାରା ରାହୁଲ ଗାନ୍ଧୀଙ୍କ ଅଭିଯୋଗକୁ ସତ୍ୟ ପ୍ରମାଣିତ କରାଯାଇପାରିବ ନାହିଁ। ଭୋଟର ତାଲିକା ସଂଶୋଧନ ପ୍ରକ୍ରିୟା ଉପରେ ପ୍ରଶ୍ନ ଉଠାଇବା ପରିବର୍ତ୍ତେ ବିରୋଧୀ ତଥ୍ୟ ଆଧାରରେ ନିଜର ପକ୍ଷ ରଖନ୍ତୁ ବୋଲି ସେ ଆହ୍ୱାନ ଦେଇଥିଲେ।
ହିନ୍ଦୁସ୍ଥାନ ସମାଚାର / ସମନ୍ୱୟ
