
ଉଜ୍ଜୟିନୀ, ୧୫ ନଭେମ୍ବର (ହି.ସ.)। ମଧ୍ୟପ୍ରଦେଶର ଉଜ୍ଜୟିନୀସ୍ଥିତ ବିଶ୍ୱପ୍ରସିଦ୍ଧ ଶ୍ରୀ ମହାକାଳେଶ୍ୱର ମନ୍ଦିରରେ ରବିବାର ଭୋର ୪ଟାରେ ମନ୍ଦିରର କବାଟ ଖୋଲିବା ମାତ୍ରେ ଭସ୍ମ ଆରତିର ପ୍ରସ୍ତୁତି ଆରମ୍ଭ ହୋଇଥିଲା। ବୈଦିକ ମନ୍ତ୍ରୋଚ୍ଚାରଣ ଓ ପୂଜାର୍ଚ୍ଚନା ମଧ୍ୟରେ ଭଗବାନ ମହାକାଳଙ୍କ ଅଭିଷେକ କରାଯିବା ସହ ବିଶେଷ ଶୃଙ୍ଗାର କରାଯାଇଥିଲା। ଏହି ସମୟରେ ବାବା ମହାକାଳ ରାଜା ସ୍ୱରୂପରେ ଭକ୍ତମାନଙ୍କୁ ଦର୍ଶନ ଦେଇଥିଲେ। ରୂପା ମୁକୁଟ, ମୁଣ୍ଡମାଳ, ରୁଦ୍ରାକ୍ଷ ଓ ସୁଗନ୍ଧିତ ପୁଷ୍ପରେ ସଜ୍ଜିତ ଭଗବାନଙ୍କ ଦିବ୍ୟ ସ୍ୱରୂପ ଦର୍ଶନ କରିବା ପାଇଁ ବହୁ ସଂଖ୍ୟାରେ ଶ୍ରଦ୍ଧାଳୁ ମନ୍ଦିରରେ ପହଞ୍ଚିଥିଲେ।
ପରମ୍ପରା ଅନୁଯାୟୀ, ମନ୍ଦିରର କବାଟ ଖୋଲିବା ପରେ ପୂଜକମାନେ ଗର୍ଭଗୃହରେ ସ୍ଥାପିତ ଦେବଦେବୀଙ୍କ ପୂଜାର୍ଚ୍ଚନା କରିଥିଲେ। ଏହାପରେ ଭଗବାନ ମହାକାଳଙ୍କ ଜଳାଭିଷେକ କରାଯାଇଥିଲା। ଏଥିସହିତ କ୍ଷୀର, ଦହି, ଘିଅ, ଚିନି, ମହୁ ଏବଂ ଫଳରସରେ ପ୍ରସ୍ତୁତ ପଞ୍ଚାମୃତରେ ଅଭିଷେକ କରାଯାଇଥିଲା। ପ୍ରଥମ ଘଣ୍ଟାଳ ବଜାଇ ଭଗବାନଙ୍କୁ ହରିଓମ୍ ଜଳ ଅର୍ପଣ କରାଯାଇଥିଲା। ଏହାପରେ କର୍ପୂର ଆରତି କରାଯିବା ସହ ମନ୍ତ୍ରୋଚ୍ଚାରଣ ମଧ୍ୟରେ ଭଗବାନଙ୍କ ପୂଜା କରାଯାଇଥିଲା।
ଭସ୍ମ ଆରତିର ପରମ୍ପରା ଅନୁଯାୟୀ, ଜ୍ୟୋତିର୍ଲିଙ୍ଗକୁ ବସ୍ତ୍ରରେ ଆଚ୍ଛାଦିତ କରି ଭସ୍ମ ଅର୍ପଣ କରାଯାଇଥିଲା। ଏହାପରେ ଭଗବାନ ମହାକାଳଙ୍କୁ ଭାଙ୍ଗ, ଚନ୍ଦନ, ଶୁଖିଲା ଫଳ ଏବଂ ବିଭିନ୍ନ ଅଳଙ୍କାରରେ ବିଶେଷ ଶୃଙ୍ଗାର କରାଯାଇଥିଲା। ବାବାଙ୍କ ମସ୍ତକରେ ରୂପା ଚନ୍ଦ୍ର ଓ ତ୍ରିପୁଣ୍ଡ ସଜାଯାଇଥିଲା। ଶେଷନାଗଙ୍କ ରୂପା ମୁକୁଟ, ରୂପା ମୁଣ୍ଡମାଳ ଏବଂ ରୁଦ୍ରାକ୍ଷ ମାଳା ଅର୍ପଣ କରାଯାଇଥିଲା। ଗୋଲାପ ସମେତ ବିଭିନ୍ନ ସୁଗନ୍ଧିତ ପୁଷ୍ପମାଳାରେ ଭଗବାନଙ୍କୁ ସଜ୍ଜିତ କରାଯାଇଥିଲା। ଶୃଙ୍ଗାର ପରେ ଫଳ ଓ ମିଷ୍ଟାନ୍ନ ଭୋଗ ଲଗାଯାଇଥିଲା। ମହାନିର୍ବାଣୀ ଆଖଡ଼ା ପକ୍ଷରୁ ଭଗବାନ ମହାକାଳଙ୍କୁ ଭସ୍ମ ଅର୍ପଣ କରାଯାଇଥିଲା।
ହିନ୍ଦୁସ୍ଥାନ ସମାଚାର / ସ୍ୱାଗତିକା