ଇନ୍ଦୋର, ୦୨ ନଭେମ୍ବର (ହି.ସ.)- ମଧ୍ୟପ୍ରଦେଶର ଇନ୍ଦୋରରେ ନଭେମ୍ବର ୧୫ ତାରିଖରେ ହେବାକୁ ଥିବା ପ୍ରସିଦ୍ଧ ପଞ୍ଜାବୀ ଗାୟକ ଦିଲଜିତ ଦୋସାଞ୍ଜଙ୍କ କନ୍ସର୍ଟକୁ ବୋମାରେ ଉଡ଼ାଇବାକୁ ଧମକ ମିଳିଛି। ଏକ ଆତଙ୍କବାଦୀ ସଂଗଠନ ନାମରେ ଆସିଥିବା ଧମକପୂର୍ଣ୍ଣ ଇ-ମେଲ୍ରେ କନ୍ସର୍ଟ ସମୟରେ ଆଇଇଡି ବିସ୍ଫୋରଣ କରିବାକୁ ଚେତାବନୀ ଦିଆଯାଇଛି। ସୋମବାର ଇନ୍ଦୋର ମେୟର ପୁଷ୍ୟମିତ୍ର ଭାର୍ଗବଙ୍କ କାର୍ଯ୍ୟାଳୟ ଏବଂ ତିନୋଟି ସ୍କୁଲ୍କୁ ଏହି ଧମକପୂର୍ଣ୍ଣ ଇ-ମେଲ୍ ପଠାଯାଇଛି।
ଏହି ଇ-ମେଲ୍ ‘ଖାଲିସ୍ତାନୀ ନ୍ୟାସନାଲ୍ ଆର୍ମି’ ନାମରେ ପଠାଯାଇଛି। ଇ-ମେଲ୍ ପଠାଇଥିବା ବ୍ୟକ୍ତିମାନେ ନିଜକୁ ଇଞ୍ଜିନିୟର ଗୁରାନାଖ ସିଂହ, ରୁଖନ ଶାହୱାଲା, ଡକ୍ଟର ଗୁରନିରବେର ସିଂହ ଏବଂ ବବ୍ୱର ଖାଲସା (ପରମାର-କନାଡ)ର ପ୍ରଫେସର ଗୁରକାଲ ସିଂହ ପିଏଚଡି ବୋଲି ପରିଚୟ ଦେଇଛନ୍ତି। ଇ-ମେଲ୍ରେ ଇନ୍ଦୋରରେ ହେବାକୁ ଥିବା କାର୍ଯ୍ୟକ୍ରମ ସମୟରେ ଆଇଇଡି ବିସ୍ଫୋରଣ କରିବା ବିଷୟରେ ଉଲ୍ଲେଖ ରହିଛି।
ଇନ୍ଦୋର କ୍ରାଇମ୍ ବ୍ରାଂଚର ଏଡିସିପି ରାଜେଶ ଦଣ୍ଡୋତିଆ କହିଛନ୍ତି ଯେ, ଇନ୍ଦୋରର ତିନୋଟି ସ୍କୁଲ୍କୁ ଧମକପୂର୍ଣ୍ଣ ଇ-ମେଲ୍ ମିଳିଛି। ଏଥିରେ ଚେତାବନୀ ଦିଆଯାଇଛି ଯେ, ନଭେମ୍ବର ୧୫ ତାରିଖରେ ହେବାକୁ ଥିବା ଦିଲଜିତ ଦୋସାଞ୍ଜଙ୍କ କାର୍ଯ୍ୟକ୍ରମକୁ ନିଜ ପିଲାମାନଙ୍କୁ ପଠାନ୍ତୁ ନାହିଁ, କାରଣ ସେଠାରେ ବୋମା ବିସ୍ଫୋରଣ କରାଯିବ। ତେବେ ସତର୍କତାମୂଳକ ପଦକ୍ଷେପ ଭାବେ ଦଣ୍ଡୋତିଆ ସ୍କୁଲ୍ଗୁଡ଼ିକର ନାମ ପ୍ରକାଶ କରିବାକୁ ମନା କରିଛନ୍ତି। ଇ-ମେଲ୍ଗୁଡ଼ିକର ବୈଷୟିକ ଯାଂଚ ଚାଲିଥିବା ସେ କହିଛନ୍ତି।
---------------
ହିନ୍ଦୁସ୍ଥାନ ସମାଚାର / ଗଗନ
