ଏସ୍ଡିଆର୍ଏଫ୍ ଓ ନିମ୍ର ମିଳିତ ଟିମ୍କୁ ସଫଳତା, ବୁଧବାର ପୁଣି ଚାଲିବ ସର୍ଚ୍ଚ ଅଭିଯାନ

ଉତରକାଶୀ, ୦୩ ନଭେମ୍ବର (ହି.ସ.)- ଉତରାଖଣ୍ଡର ଉତରକାଶୀସ୍ଥିତ କେଦାରତାଳ ଟ୍ରେକ୍ରେ ପ୍ରବଳ ତୁଷାରପାତ ଓ ହିମସ୍ଖଳନରେ ନିଖୋଜ ହୋଇଥିବା ଆଠ ଜଣଙ୍କୁ ଖୋଜୁଥିବା ଉଦ୍ଧାରକାରୀ ଟିମ୍ ମଙ୍ଗଳବାର ଦୁଇଟି ମୃତଦେହ ଉଦ୍ଧାର କରିବାରେ ସଫଳ ହୋଇଛି। ଏସ୍ଡିଆର୍ଏଫ୍ ଓ ନେହରୁ ପର୍ବତାରୋହଣ ସଂସ୍ଥାନ (ନିମ୍)ର ମିଳିତ ଟିମ୍ ବରଫ ତଳେ ପୋତି ହୋଇଥିବା ଜଣେ ମହିଳା ଓ ଜଣେ ପୁରୁଷଙ୍କ ମୃତଦେହ ବାହାର କରିଛି। ତେବେ ଏପର୍ଯ୍ୟନ୍ତ ଉଭୟଙ୍କ ପରିଚୟ ଜଣାପଡ଼ିନାହିଁ। ଅବଶିଷ୍ଟ ଛଅ ଜଣ ନିଖୋଜଙ୍କ ଖୋଜା ଜାରି ରହିଛି।

ମଙ୍ଗଳବାର ଏସ୍ଡିଆରଏଫ୍ ଓ ନିମ୍ର ମିଳିତ ଟିମ୍ ସମ୍ଭାବ୍ୟ ସ୍ଥାନରେ ପୁଣି ଖୋଜାଖୋଜି ଅଭିଯାନ ଆରମ୍ଭ କରିଥିଲା। ଏହି ସମୟରେ ଟିମ୍କୁ ବରଫ ତଳେ ପୋତି ହୋଇଥିବା ଦୁଇଟି ମୃତଦେହ ଦେଖିବାକୁ ମିଳିଥିଲା। ବହୁ ପରିଶ୍ରମ ପରେ ଉଭୟ ମୃତଦେହକୁ ବାହାର କରାଯାଇଥିଲା। ଟିମ୍ ଅପରାହ୍ନ ପ୍ରାୟ ୩ଟା ପର୍ଯ୍ୟନ୍ତ ଅଭିଯାନ ଚଳାଇଥିଲା ଏବଂ ଏହାପରେ ବେସ୍ କ୍ୟାମ୍ପକୁ ଫେରିଥିଲା। ବୁଧବାର ପୁଣି ଖୋଜା ଅଭିଯାନ ଚାଲିବ।

ଉଦ୍ଧାର ଅଭିଯାନକୁ ତ୍ୱରାନ୍ୱିତ କରିବା ଏବଂ ଆବଶ୍ୟକ ପଡ଼ିଲେ ହେଲିକପ୍ଟର ସହାୟତା ଯୋଗାଇବା ପାଇଁ ଘଟଣାସ୍ଥଳ ନିକଟରେ ପ୍ରାୟ ୪,୦୦୫ ମିଟର ଉଚ୍ଚତାରେ ଏକ ବିକଳ୍ପ ହେଲିପ୍ୟାଡ୍ ମଧ୍ୟ ପ୍ରସ୍ତୁତ କରାଯାଇଛି।

ନିଖୋଜଙ୍କ ମଧ୍ୟରେ ସାତ ଜଣ ଟ୍ରେକରସ୍ ଓ ଜଣେ ଗାଇଡ୍ ସାମିଲ

ନିଖୋଜଙ୍କ ତାଲିକାରେ ପଶ୍ଚିମବଙ୍ଗର ତପସ ବାଉରୀ, ରତନ ଘୋଷ, ମନୋଜ ଖୋଭାସ, ରିଂଟ ମଡେଲ୍ ଓ ଉଦୟ ଘୋଷ ଏବଂ ଉତରପ୍ରଦେଶର ବର୍ତିକା ବର୍ମା ଓ ଦୀପିକା ବର୍ମା ଅଛନ୍ତି। ଅଷ୍ଟମ ନିଖୋଜ ବ୍ୟକ୍ତି ସିଦ୍ଧାର୍ଥ ରାଣା ଉତରକାଶୀର ବାସିନ୍ଦା ବୋଲି କୁହାଯାଉଛି।

ଉଲ୍ଲେଖଯୋଗ୍ୟ, ଅକ୍ଟୋବର ୨୭ ତାରିଖରେ ଗଙ୍ଗୋତ୍ରୀରୁ ସାତ ଜଣ ଟ୍ରେକରସ୍ ଓ ପାଂଚ ଜଣ ସହାୟକ କର୍ମଚାରୀଙ୍କ ସମେତ ମୋଟ ୧୨ ଜଣଙ୍କ ଏକ ଦଳ କେଦାରତାଳ ଟ୍ରେକ୍ ପାଇଁ ବାହାରିଥିଲା। ଏହି ଦଳରୁ ତିନି ଜଣ ପୋର୍ଟର୍ ଓ ଜଣେ ରୋଷେୟାଙ୍କ ସମେତ ଚାରି ଜଣଙ୍କୁ ସୁରକ୍ଷିତ ଉଦ୍ଧାର କରାଯାଇଥିଲା। ଅନ୍ୟପକ୍ଷରେ ସାତ ଜଣ ଟ୍ରେକରସ୍ ଓ ଜଣେ ଗାଇଡ୍ଙ୍କ ସମେତ ଆଠ ଜଣ ନିଖୋଜ ହୋଇଯାଇଥିଲେ। ପ୍ରବଳ ତୁଷାରପାତ ଓ ହିମସ୍ଖଳନ ଯୋଗୁଁ ସେମାନେ ଏହାର ପ୍ରଭାବରେ ଆସିଥିଲେ।

---------------

ହିନ୍ଦୁସ୍ଥାନ ସମାଚାର / ଗଗନ