ନୂଆଦିଲ୍ଲୀ, ୦୮ ନଭେମ୍ବର (ହି.ସ.)। ଉପରାଷ୍ଟ୍ରପତି ସି.ପି. ରାଧାକୃଷ୍ଣନ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କ ସମେତ ଦେଶର ବହୁ ନେତା ରବିବାର ଦେଶର ପୂର୍ବତନ ଉପପ୍ରଧାନମନ୍ତ୍ରୀ ତଥା ବିଜେପିର ବରିଷ୍ଠ ନେତା ଲାଲକୃଷ୍ଣ ଆଡଭାଣୀଙ୍କୁ ଜନ୍ମଦିନ ଅବସରରେ ଅଭିନନ୍ଦନ ଓ ଶୁଭେଚ୍ଛା ଜଣାଇଛନ୍ତି।

ଉପରାଷ୍ଟ୍ରପତି ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ଲେଖିଛନ୍ତି, “ଏଲ୍.କେ. ଆଡଭାଣୀଙ୍କୁ ଜନ୍ମଦିନର ହାର୍ଦ୍ଦିକ ଶୁଭେଚ୍ଛା। ଦୀର୍ଘ ଦଶନ୍ଧି ଧରି ତାଙ୍କର ଜନସେବା ଏବଂ ରାଷ୍ଟ୍ର ପ୍ରତି ସମର୍ପଣ ଭାରତର ଗଣତାନ୍ତ୍ରିକ ଯାତ୍ରାର ଏକ ଗୁରୁତ୍ୱପୂର୍ଣ୍ଣ ଅଂଶ ହୋଇ ରହିଛି। ମୁଁ ତାଙ୍କର ଉତ୍ତମ ସ୍ୱାସ୍ଥ୍ୟ, ସୁଖ ଓ ମଙ୍ଗଳ କାମନା କରୁଛି।”

ଭାରତ ପ୍ରତି ଆଡଭାଣୀଙ୍କ ଅମୂଲ୍ୟ ଅବଦାନକୁ ଉଲ୍ଲେଖ କରି ଏକ ଲେଖା ସେୟାର କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ, ପରିସ୍ଥିତି ଯେତେ କଠିନ ହେଲେ ମଧ୍ୟ ନୂଆ କରି କିଛି ଗଢ଼ିବାର ସଂକଳ୍ପ ତାଙ୍କ ସହିତ ଜୀବନସାରା ରହିଥିଲା। ଜନସଂଘକୁ ମଜଭୁତ କରିବା ଏବଂ ପରବର୍ତ୍ତୀ ସମୟରେ ଭାରତୀୟ ଜନତା ପାର୍ଟିର ଗଠନ କ୍ଷେତ୍ରରେ ମଧ୍ୟ ତାଙ୍କର ଏହି ଗୁଣ ପ୍ରତିଫଳିତ ହୋଇଥିଲା। ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଭାବେ ତାଙ୍କ କାର୍ଯ୍ୟକାଳରେ ଦେଶର ରାଜନୀତିରେ ବଡ଼ ପରିବର୍ତ୍ତନ ଦେଖାଯାଇଥିଲା। ଈଶ୍ୱରଙ୍କ ନିକଟରେ ତାଙ୍କର ଉତ୍ତମ ସ୍ୱାସ୍ଥ୍ୟ କାମନା କରୁଛୁ। ସେ ଏହିପରି ସମସ୍ତଙ୍କୁ ପ୍ରେରଣା ଦେବା ସହ ମାର୍ଗଦର୍ଶନ କରୁଥାନ୍ତୁ ବୋଲି ସେ କାମନା କରିଛନ୍ତି।

ଲୋକସଭା ବାଚସ୍ପତି ଓମ୍ ବିର୍ଲା କହିଛନ୍ତି ଯେ, ରାଷ୍ଟ୍ର ପ୍ରତି ଲାଲକୃଷ୍ଣ ଆଡଭାଣୀଙ୍କ ସମର୍ପଣ, ସାର୍ବଜନୀନ ଜୀବନରେ ତାଙ୍କର ଦୀର୍ଘ ଅନୁଭବ ଏବଂ ଗଣତାନ୍ତ୍ରିକ ମୂଲ୍ୟବୋଧ ପ୍ରତି ତାଙ୍କର ପ୍ରତିବଦ୍ଧତା ସମସ୍ତଙ୍କ ପାଇଁ ପ୍ରେରଣାଦାୟକ। ଈଶ୍ୱର ତାଙ୍କୁ ଉତ୍ତମ ସ୍ୱାସ୍ଥ୍ୟ, ଦୀର୍ଘାୟୁ ଓ ସୁଖମୟ ଜୀବନ ପ୍ରଦାନ କରନ୍ତୁ। ସମସ୍ତଙ୍କୁ ତାଙ୍କର ସାନ୍ନିଧ୍ୟ ନିରନ୍ତର ମିଳୁଥାଉ ବୋଲି ସେ କାମନା କରିଛନ୍ତି।

ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ କହିଛନ୍ତି ଯେ, ଆଡଭାଣୀ ନିଜର ଦୀର୍ଘ ସାର୍ବଜନୀନ ଜୀବନରେ ସ୍ୱଚ୍ଛତା, ସମର୍ପଣ ଓ ନେତୃତ୍ୱର ନୂତନ ମାନଦଣ୍ଡ ସ୍ଥାପନ କରିଛନ୍ତି ଏବଂ ଏହା ମାଧ୍ୟମରେ ରାଷ୍ଟ୍ର ନିର୍ମାଣରେ ଅମୂଲ୍ୟ ଅବଦାନ ଦେଇଛନ୍ତି। ଭାରତୀୟ ଜନତା ପାର୍ଟିର ସ୍ଥାପନାଠାରୁ ଆରମ୍ଭ କରି ଏହାକୁ ଦେଶର କୋଣ ଅନୁକୋଣରେ ପହଞ୍ଚାଇବା ପର୍ଯ୍ୟନ୍ତ ତାଙ୍କର ଭୂମିକା ଅତ୍ୟନ୍ତ ମହତ୍ତ୍ୱପୂର୍ଣ୍ଣ। ନିଜର କାର୍ଯ୍ୟ ଓ ବ୍ୟକ୍ତିତ୍ୱ ମାଧ୍ୟମରେ ସେ ଭାରତୀୟ ରାଜନୀତିକୁ ସମୃଦ୍ଧ କରିଛନ୍ତି। ଜନସେବା ପ୍ରତି ସମର୍ପିତ ତାଙ୍କ ଜୀବନ ଓ ଆଦର୍ଶ ଆଗାମୀ ପିଢ଼ି ପାଇଁ ସର୍ବଦା ପ୍ରେରଣାର ଉତ୍ସ ହୋଇ ରହିବ ବୋଲି ସେ କହିଛନ୍ତି।

କେନ୍ଦ୍ର ଗୃହ ଓ ସମବାୟ ମନ୍ତ୍ରୀ ଅମିତ ଶାହ କହିଛନ୍ତି ଯେ, ଏକ ସାଧାରଣ ପରିବାରରୁ ଆସି ବିଜେପିର ପ୍ରତିଷ୍ଠାତା ସଦସ୍ୟ, ରାଷ୍ଟ୍ରୀୟ ଅଧ୍ୟକ୍ଷ ଏବଂ ଦେଶର ଉପପ୍ରଧାନମନ୍ତ୍ରୀ ଭଳି ପ୍ରତ୍ୟେକ ଭୂମିକାରେ ଆଡଭାଣୀଙ୍କ ଜୀବନ ଜନସେବା ଓ ରାଷ୍ଟ୍ର ପ୍ରଥମର ଏକ ଜ୍ୱଳନ୍ତ ଉଦାହରଣ। ସଂଘର୍ଷ, ତ୍ୟାଗ ଓ ତପସ୍ୟାରେ ପରିପୂର୍ଣ୍ଣ ନିଜ ଜୀବନ ମାଧ୍ୟମରେ ସେ ଦେଖାଇଛନ୍ତି ଯେ, ମାତୃଭୂମି ଓ ବିଚାରଧାରା ପ୍ରତି ସମର୍ପଣ ହିଁ ବିଜେପି କାର୍ଯ୍ୟକର୍ତ୍ତାଙ୍କ ପରିଚୟ।

କେନ୍ଦ୍ର ସଡ଼କ ପରିବହନ ଓ ରାଜପଥ ମନ୍ତ୍ରୀ ନୀତିନ ଗଡ଼କରୀ ଆଡଭାଣୀଙ୍କ ଉତ୍ତମ ସ୍ୱାସ୍ଥ୍ୟ, ଦୀର୍ଘାୟୁ ଓ ମଙ୍ଗଳମୟ ଜୀବନ ପାଇଁ ଈଶ୍ୱରଙ୍କ ନିକଟରେ ପ୍ରାର୍ଥନା କରିଛନ୍ତି। ତାଙ୍କର ମାର୍ଗଦର୍ଶନ ସମସ୍ତଙ୍କୁ ଏହିପରି ନିରନ୍ତର ମିଳୁଥାଉ ବୋଲି ସେ କାମନା କରିଛନ୍ତି।

କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଜେ.ପି. ନଡ୍ଡା କହିଛନ୍ତି ଯେ, ରାଷ୍ଟ୍ର ପ୍ରତି ଆଡଭାଣୀଙ୍କ ସମର୍ପଣ, ବିଚାରଧାରାରେ ଦୃଢ଼ତା, ଆଦର୍ଶ ପ୍ରତି ଅଟଳ ନିଷ୍ଠା ଏବଂ ସଂଗଠନ ପ୍ରତି ତାଙ୍କର ସାଧନା ଭାରତୀୟ ରାଜନୀତିର ଇତିହାସରେ ସର୍ବଦା ସ୍ୱର୍ଣ୍ଣାକ୍ଷରରେ ଲିପିବଦ୍ଧ ହୋଇ ରହିବ। ବିଜେପିକୁ ଏକ ସଶକ୍ତ ସଂଗଠନ ଭାବେ ପ୍ରତିଷ୍ଠା କରିବାଠାରୁ ଆରମ୍ଭ କରି ରାଷ୍ଟ୍ର ନିର୍ମାଣରେ ତାଙ୍କର ଅତୁଳନୀୟ ଅବଦାନ ସମସ୍ତଙ୍କ ପାଇଁ ପ୍ରେରଣାର ଉତ୍ସ ବୋଲି ସେ କହିଛନ୍ତି।

କେନ୍ଦ୍ର କୃଷି ଓ କୃଷକ କଲ୍ୟାଣ ମନ୍ତ୍ରୀ ଶିବରାଜ ସିଂହ ଚୌହାନ କହିଛନ୍ତି ଯେ, ପ୍ରଭୁ ଶ୍ରୀରାମଙ୍କ କୃପା ଆଡଭାଣୀଙ୍କ ଉପରେ ନିରନ୍ତର ବର୍ଷିତ ହେଉ। ସେ ସର୍ବଦା ସୁସ୍ଥ ରୁହନ୍ତୁ, ଦୀର୍ଘାୟୁ ହୁଅନ୍ତୁ ଏବଂ ତାଙ୍କର ସ୍ନେହପୂର୍ଣ୍ଣ ଆଶୀର୍ବାଦ ଓ ମାର୍ଗଦର୍ଶନ ସମସ୍ତଙ୍କୁ ସବୁବେଳେ ମିଳୁଥାଉ ବୋଲି ସେ ପ୍ରାର୍ଥନା କରିଛନ୍ତି।

ଭାରତୀୟ ଜନତା ପାର୍ଟିର ରାଷ୍ଟ୍ରୀୟ ଅଧ୍ୟକ୍ଷ ନୀତିନ ନବୀନ କହିଛନ୍ତି ଯେ, ଜନସଂଘଠାରୁ ଆରମ୍ଭ କରି ଭାରତୀୟ ଜନତା ପାର୍ଟି ପର୍ଯ୍ୟନ୍ତ ସଂଗଠନର ବିସ୍ତାର, ରାଷ୍ଟ୍ରବାଦୀ ବିଚାରଧାରାକୁ ଜନସାଧାରଣଙ୍କ ନିକଟରେ ପହଞ୍ଚାଇବା ଏବଂ ଶ୍ରୀରାମ ଜନ୍ମଭୂମି ଆନ୍ଦୋଳନକୁ ଜନଆନ୍ଦୋଳନର ରୂପ ଦେବାରେ ଆଡଭାଣୀଙ୍କ ଅବିସ୍ମରଣୀୟ ଅବଦାନ ରହିଛି। ସାର୍ବଜନୀନ ଜୀବନରେ ତାଙ୍କର ସ୍ୱଚ୍ଛତା ଏବଂ ସଂଗଠନ ପ୍ରତି ଅଟଳ ନିଷ୍ଠା ବିଜେପିର ସମସ୍ତ କାର୍ଯ୍ୟକର୍ତ୍ତାଙ୍କ ପାଇଁ ସର୍ବଦା ପ୍ରେରଣାର ଉତ୍ସ ହୋଇ ରହିବ।

ହିନ୍ଦୁସ୍ଥାନ ସମାଚାର / ସ୍ୱାଗତିକା