ଲଗାତାର ୧୩ତମ ବର୍ଷ ଯବାନଙ୍କ ମଧ୍ୟରେ ପହଞ୍ଚିଲେ, ନକ୍ସଲମୁକ୍ତ ଭାରତକୁ ଐତିହାସିକ ଉପଲବ୍ଧି କହିଲେ

ଜଗଦଲପୁର, ୦୮ ନଭେମ୍ବର (ହି.ସ.)। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରବିବାର ଛତିଶଗଡ଼ର ବସ୍ତର ଗସ୍ତ କରି କରନପୁରସ୍ଥିତ କେନ୍ଦ୍ରୀୟ ରିଜର୍ଭ ପୋଲିସ ବଳ (ସିଆରପିଏଫ୍) କ୍ୟାମ୍ପରେ ସୁରକ୍ଷା ବଳର ଯବାନମାନଙ୍କ ସହ ଦୀପାବଳି ପାଳନ କରିଛନ୍ତି। ଏଥିସହ ଲଗାତାର ୧୩ତମ ବର୍ଷ ପାଇଁ ସେ ଦେଶର ସୁରକ୍ଷାରେ ନିୟୋଜିତ ଯବାନଙ୍କ ମଧ୍ୟରେ ଦୀପାବଳି ପାଳନ କରିବାର ପରମ୍ପରା ବଜାୟ ରଖିଛନ୍ତି।

ଏହି ଅବସରରେ ସିଆରପିଏଫ୍‌ର ବରିଷ୍ଠ ଅଧିକାରୀମାନେ ପ୍ରଧାନମନ୍ତ୍ରୀଙ୍କୁ ସ୍ୱାଗତ କରିଥିଲେ। କାର୍ଯ୍ୟକ୍ରମରେ ଡିଆରଜିର ଦୁଇଟି ବାଟାଲିୟନର ଯବାନମାନେ ମଧ୍ୟ ସାମିଲ ହୋଇଥିଲେ। ପ୍ରଧାନମନ୍ତ୍ରୀ ଯବାନମାନଙ୍କୁ ନିଜ ପରିବାରର ସଦସ୍ୟ ବୋଲି ଅଭିହିତ କରିବା ସହ ଦେଶ ପାଇଁ ସେମାନଙ୍କ ତ୍ୟାଗ, ସମର୍ପଣ ଓ ବଳିଦାନର ଉଚ୍ଚ ପ୍ରଶଂସା କରିଥିଲେ।

ମୋଦୀ କହିଥିଲେ ଯେ, ଏକଦା ବସ୍ତରରେ ନକ୍ସଲବାଦର ଗମ୍ଭୀର ବିପଦ ରହିଥିଲା। କିନ୍ତୁ ସୁରକ୍ଷା ବଳର ଅଦମ୍ୟ ସାହସ ଓ ନିରନ୍ତର ପ୍ରୟାସ ଯୋଗୁଁ ଏବେ ଏହି ଅଞ୍ଚଳରେ ବିକାଶର ନୂଆ ଧାରା ଆରମ୍ଭ ହୋଇଛି। ୨୦୨୬ ମସିହାର ଦୀପାବଳି ଦେଶ ପାଇଁ ଐତିହାସିକ ବୋଲି କହି ସେ ଉଲ୍ଲେଖ କରିଥିଲେ ଯେ, ଏହା ପ୍ରଥମ ଦୀପାବଳି ଯେତେବେଳେ ଦେଶର ପ୍ରତ୍ୟେକ ଜିଲ୍ଲା ନକ୍ସଲବାଦରୁ ମୁକ୍ତ ହୋଇଛି। ନକ୍ସଲବାଦ ବିରୋଧୀ ଲଢ଼େଇରେ ପ୍ରାଣବଳି ଦେଇଥିବା ଯବାନମାନଙ୍କୁ ସେ ଶ୍ରଦ୍ଧାଞ୍ଜଳି ଜଣାଇବା ସହ ଦେଶ ପ୍ରତି ସେମାନଙ୍କ ଅବଦାନ ଅମୂଲ୍ୟ ବୋଲି କହିଥିଲେ।

ପ୍ରଧାନମନ୍ତ୍ରୀ କ୍ୟାମ୍ପରେ ନିୟୋଜିତ ଯବାନମାନଙ୍କ ସହ ସିଧାସଳଖ ଆଲୋଚନା କରି ସେମାନଙ୍କ ଭଲମନ୍ଦ ପଚାରି ବୁଝିଥିଲେ। ଯବାନମାନଙ୍କ ଦୈନନ୍ଦିନ ଜୀବନ, ପ୍ରଶିକ୍ଷଣ ଏବଂ ଦୁର୍ଗମ ଅଞ୍ଚଳରେ ମୁତୟନ ସମୟରେ ସାମ୍ନା କରୁଥିବା ଆହ୍ୱାନ ସମ୍ପର୍କରେ ମଧ୍ୟ ସେ ତଥ୍ୟ ନେଇଥିଲେ। ଏହି ଅବସରରେ ସେ ଯବାନମାନଙ୍କୁ ମିଠା ଖୁଆଇ ଦୀପାବଳିର ଶୁଭେଚ୍ଛା ଜଣାଇଥିଲେ। ଛତିଶଗଡ଼ର ମୁଖ୍ୟମନ୍ତ୍ରୀ ବିଷ୍ଣୁଦେବ ସାଏ ମଧ୍ୟ ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ।

ଏହା ପୂର୍ବରୁ ପ୍ରଧାନମନ୍ତ୍ରୀ ମୋଦୀ କରନପୁରସ୍ଥିତ କୋବ୍ରା ଅପରେସନ୍ସ ବେସ୍ ପରିଦର୍ଶନ କରିଥିଲେ। ବସ୍ତର ଓ ଅବୁଝମାଡ଼ ଜଙ୍ଗଲରେ ନକ୍ସଲ ବିରୋଧୀ ଅଭିଯାନ ପାଇଁ ଏହି ବେସ୍ ପ୍ରଶିକ୍ଷଣ କେନ୍ଦ୍ର ଓ ଅଭିଯାନର ଆରମ୍ଭ ସ୍ଥଳ ଭାବେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରୁଛି। ପ୍ରାୟ ୩୧୧ ଏକର ପରିମିତ ଏହି କ୍ୟାମ୍ପରେ କୋବ୍ରା କମାଣ୍ଡୋମାନଙ୍କୁ ଜଙ୍ଗଲ ଯୁଦ୍ଧ ଏବଂ ନକ୍ସଲ ବିରୋଧୀ ଅଭିଯାନ ପାଇଁ ସ୍ୱତନ୍ତ୍ର ପ୍ରଶିକ୍ଷଣ ଦିଆଯାଏ। କ୍ୟାମ୍ପ ପରିସରରେ ସିଆରପିଏଫ୍‌ର ୫୦ ଶଯ୍ୟା ବିଶିଷ୍ଟ ମିଳିତ ହସ୍ପିଟାଲ ମଧ୍ୟ ରହିଛି।

ମୁଖ୍ୟମନ୍ତ୍ରୀ ବିଷ୍ଣୁଦେବ ସାଏ ରାଜ୍ୟରେ ନକ୍ସଲବାଦର ମୂଳୋତ୍ପାଟନ ଏବଂ ଶାନ୍ତି ପ୍ରତିଷ୍ଠା ଦିଗରେ ସୁରକ୍ଷା ବଳର ଅବଦାନକୁ ପ୍ରଶଂସା କରିଥିଲେ। କେନ୍ଦ୍ର ଓ ରାଜ୍ୟ ସରକାରଙ୍କ ମିଳିତ ପ୍ରୟାସରେ ନକ୍ସଲ ପ୍ରଭାବିତ ଅଞ୍ଚଳଗୁଡ଼ିକରେ ଶାନ୍ତି ଓ ବିକାଶର ପରିବେଶ ଦ୍ରୁତଗତିରେ ସୃଷ୍ଟି ହେଉଥିବା ସେ କହିଥିଲେ।

ଉଲ୍ଲେଖଯୋଗ୍ୟ ଯେ, ୨୦୧୪ ମସିହାରୁ ପ୍ରଧାନମନ୍ତ୍ରୀ ମୋଦୀ ପ୍ରତିବର୍ଷ ଦୀପାବଳି ଅବସରରେ ଦେଶର ସୁରକ୍ଷାରେ ନିୟୋଜିତ ଯବାନମାନଙ୍କ ମଧ୍ୟରେ ପହଞ୍ଚି ପର୍ବ ପାଳନ କରିଆସୁଛନ୍ତି। ୨୦୧୪ରୁ ୨୦୨୫ ମଧ୍ୟରେ ସେ ୧୨ ଥର ଯବାନଙ୍କ ସହ ଦୀପାବଳି ପାଳନ କରିଥିଲେ। ୨୦୨୫ରେ ସେ ଗୋଆ ଓ କାରୱାର ନିକଟ ପଶ୍ଚିମ ସମୁଦ୍ରତଟରେ ଆଇଏନ୍‌ଏସ୍ ବିକ୍ରାନ୍ତରେ ନୌସେନା ଯବାନଙ୍କ ସହ ଦୀପାବଳି ପାଳନ କରିଥିଲେ।

ଏହି ବର୍ଷଗୁଡ଼ିକରେ ପ୍ରଧାନମନ୍ତ୍ରୀ ଦେଶର ବିଭିନ୍ନ ସୀମାନ୍ତ ଓ ସାମରିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ଅଞ୍ଚଳ ଗସ୍ତ କରିଛନ୍ତି। ଜମ୍ମୁ-କାଶ୍ମୀରରେ ତିନି ଥର ଏବଂ ହିମାଚଳ ପ୍ରଦେଶ ଓ ଲଦାଖରେ ଦୁଇ ଦୁଇ ଥର ଯବାନଙ୍କ ସହ ଦୀପାବଳି ପାଳନ କରିଛନ୍ତି। ଚଳିତ ବର୍ଷ ବସ୍ତରରେ ଯବାନଙ୍କ ସହ ପର୍ବ ପାଳନ କରି ସେ ଏହି ପରମ୍ପରାକୁ ଲଗାତାର ୧୩ତମ ବର୍ଷ ଜାରି ରଖିଛନ୍ତି।

ପ୍ରଧାନମନ୍ତ୍ରୀ ଯବାନମାନଙ୍କ ସହ ଦୀପାବଳି ପାଳନର ଏକ ଭିଡିଓ ସୋସିଆଲ ମିଡିଆରେ ସେୟାର କରିଛନ୍ତି। ଏଥିରେ ସେ ଯବାନମାନଙ୍କୁ ମିଠା ଖୁଆଉଥିବା ଦେଖିବାକୁ ମିଳିଛି। ଭିଡିଓ ସହ ସେ ଲେଖିଛନ୍ତି, “ଆମର ସୁରକ୍ଷା କରୁଥିବା ଯବାନମାନଙ୍କ ସହ ଦୀପାବଳି ଆହୁରି ମିଠା ହୋଇଯାଏ।”

ହିନ୍ଦୁସ୍ଥାନ ସମାଚାର / ସମନ୍ୱୟ