ଉଜ୍ଜୟିନୀ/ଭୋପାଳ, ୦୮ ନଭେମ୍ବର (ହି.ସ.)। ମଧ୍ୟପ୍ରଦେଶରେ ଦୀପାବଳିର ପବିତ୍ର ପର୍ବ ଉତ୍ସାହ ଓ ଉଲ୍ଲାସର ସହ ପାଳନ କରାଯାଉଛି। ଘରଠାରୁ ଆରମ୍ଭ କରି ମନ୍ଦିର ପର୍ଯ୍ୟନ୍ତ ସବୁଠି ଦୀପୋତ୍ସବର ଚମକ ଦେଖିବାକୁ ମିଳୁଛି। ରବିବାର ଭୋର ସମୟରେ ଉଜ୍ଜୟିନୀସ୍ଥିତ ବିଶ୍ୱପ୍ରସିଦ୍ଧ ଜ୍ୟୋତିର୍ଲିଙ୍ଗ ଭଗବାନ ମହାକାଳେଶ୍ୱର ମନ୍ଦିରରୁ ଏହି ଉତ୍ସବର ଶୁଭାରମ୍ଭ ହୋଇଥିଲା। ରାଜ୍ୟବାସୀ ସକାଳୁ ପରସ୍ପରକୁ ସୁଖ, ସମୃଦ୍ଧି ଓ ସୁଖମୟ ଜୀବନର କାମନା କରି ଆଲୋକର ପର୍ବ ଦୀପାବଳିର ଶୁଭେଚ୍ଛା ଜଣାଉଛନ୍ତି।

ଧର୍ମନଗରୀ ଉଜ୍ଜୟିନୀରେ ଦୀପାବଳିର ଉତ୍ସାହ କିଛି ନିଆରା ଢଙ୍ଗରେ ଦେଖିବାକୁ ମିଳିଥିଲା। ରବିବାର ଭୋର ସମୟରେ ଭସ୍ମ ଆରତି ଅବସରରେ ଭଗବାନ ମହାକାଳଙ୍କୁ ଅଭ୍ୟଙ୍ଗ ସ୍ନାନ କରାଯାଇଥିଲା। ପୂଜକ ପରିବାରର ମହିଳା ଓ ଶିଶୁମାନେ ବାବାଙ୍କୁ ଉବଟନ୍ ଲଗାଇଥିବା ବେଳେ ପୂଜକମାନେ ଉଷୁମ ପାଣିରେ ସ୍ନାନ କରାଇଥିଲେ। ଏହାପରେ ଭଗବାନଙ୍କୁ ଅନ୍ନକୂଟ ଭୋଗ ଅର୍ପଣ କରାଯାଇଥିଲା।

ଦୀପାବଳି ଅବସରରେ ମନ୍ଦିରର ପରମ୍ପରା ଅନୁଯାୟୀ, ଆରତି ସମୟରେ ଫୁଲଝରି ଜଳାଇ ଉତ୍ସବର ଶୁଭାରମ୍ଭ କରାଯାଇଥିଲା। ଦୀପାବଳି ଦିନ ମନ୍ଦିରରେ ହେଉଥିବା ଚାରୋଟି ଆରତିରେ ଫୁଲଝରି ଜଳାଇବାର ପରମ୍ପରା ରହିଛି। ଏଥିରେ ପ୍ରାତଃକାଳୀନ ଭସ୍ମ ଆରତି, ଅଭ୍ୟଙ୍ଗ ସ୍ନାନ ପରେ ହେଉଥିବା ଆରତି, ସନ୍ଧ୍ୟା ଆରତି ଏବଂ ଶୟନ ଆରତି ସାମିଲ ରହିଛି। ପ୍ରତ୍ୟେକ ଆରତିରେ ଗୋଟିଏ ଲେଖାଏଁ ଫୁଲଝରି ଜଳାଯାଇଥାଏ।

ମହାକାଳ ମନ୍ଦିରରେ ପ୍ରଥମେ ପର୍ବପର୍ବାଣୀ ପାଳନ କରିବାର ପରମ୍ପରା ରହିଛି। ଦୀପାବଳି ଅବସରରେ ମଧ୍ୟ ଧାର୍ମିକ ରୀତିନୀତି ଅନୁଯାୟୀ ବାବା ମହାକାଳଙ୍କ ପୂଜାର୍ଚ୍ଚନା ଓ ଅଭ୍ୟଙ୍ଗ ସ୍ନାନ ସହ ପର୍ବର ଶୁଭାରମ୍ଭ ହୋଇଥିଲା। ଭସ୍ମ ଆରତି ସମୟରେ ଶ୍ରଦ୍ଧାଳୁମାନେ ଭଗବାନଙ୍କ ଦର୍ଶନ କରି ଆଶୀର୍ବାଦ ଲାଭ କରିଥିଲେ। ପାରମ୍ପରିକ ପୂଜାର୍ଚ୍ଚନା ଓ ଆରତି ମଧ୍ୟରେ ସମଗ୍ର ମନ୍ଦିର ପରିସର ଶିବମୟ ହୋଇଉଠିଥିଲା। ଦେଶର ବିଭିନ୍ନ ସ୍ଥାନରୁ ଉଜ୍ଜୟିନୀ ଆସିଥିବା ଶ୍ରଦ୍ଧାଳୁଙ୍କ ପାଇଁ ଦୀପାବଳି ଅବସରରେ ବାବା ମହାକାଳଙ୍କ ଦର୍ଶନ ବିଶେଷ ଆସ୍ଥା ଓ ଭକ୍ତିର କେନ୍ଦ୍ର ପାଲଟିଥିଲା।

ହିନ୍ଦୁସ୍ଥାନ ସମାଚାର / ସ୍ୱାଗତିକା