ନୂଆଦିଲ୍ଲୀ, ୦୯ ନଭେମ୍ବର (ହି.ସ.)। କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ଦୀପାବଳିକୁ ‘ଖୁସିର ଇଦ୍’ ବୋଲି କହିଥିବା ବୟାନକୁ ଭାରତୀୟ ଜନତା ପାର୍ଟି (ବିଜେପି) ଏବଂ ବିଶ୍ୱ ହିନ୍ଦୁ ପରିଷଦ (ବିହିପ) ନିନ୍ଦା କରିଛନ୍ତି। ବିଜେପିର ଜାତୀୟ ମୁଖପାତ୍ର ଗୌରବ ଭାଟିଆ ଏହାକୁ କୋଟି କୋଟି ହିନ୍ଦୁଙ୍କ ଭାବନାକୁ ଆଘାତ ପହଞ୍ଚାଇବା ଭଳି ବୟାନ ବୋଲି କହିବା ସହ କଂଗ୍ରେସ ଉପରେ ମୁସଲିମ ତୁଷ୍ଟୀକରଣ ଏବଂ ହିନ୍ଦୁ ବିରୋଧୀ ମାନସିକତାକୁ ପ୍ରୋତ୍ସାହନ ଦେବାର ଅଭିଯୋଗ ଆଣିଛନ୍ତି। ସେହିପରି ବିହିପର ଜାତୀୟ ମୁଖପାତ୍ର ବିନୋଦ ବଂଶଲ ଖଡ଼ଗେଙ୍କ ବୟାନକୁ ସମଗ୍ର ହିନ୍ଦୁ ସମାଜର ଅପମାନ ବୋଲି କହିବା ସହ କଂଗ୍ରେସ ଅଧ୍ୟକ୍ଷଙ୍କୁ କ୍ଷମା ମାଗିବାକୁ ଦାବି କରିଛନ୍ତି।

ସୋମବାର ଏଠାରେ ବିଜେପି ମୁଖ୍ୟାଳୟରେ ଆୟୋଜିତ ସାମ୍ବାଦିକ ସମ୍ମିଳନୀରେ ଗୌରବ ଭାଟିଆ କହିଛନ୍ତି ଯେ, ଖଡ଼ଗେଙ୍କ ବୟାନ ରାହୁଲ ଗାନ୍ଧୀ ଏବଂ ସୋନିଆ ଗାନ୍ଧୀଙ୍କ ହିନ୍ଦୁ ତଥା ସନାତନ ବିରୋଧୀ ମାନସିକତାକୁ ପ୍ରତିଫଳିତ କରୁଛି। ଖଡ଼ଗେ ହେଉଛନ୍ତି ଏଭଳି ଜଣେ କଂଗ୍ରେସ ଅଧ୍ୟକ୍ଷ, ଯାହାଙ୍କୁ ସୋନିଆ ଗାନ୍ଧୀ ନିୟନ୍ତ୍ରଣ କରନ୍ତି ଏବଂ ରାହୁଲ ଗାନ୍ଧୀ ତାଙ୍କ ବୟାନକୁ ଦିଗ୍ଦର୍ଶନ ଦିଅନ୍ତି। ଦୀପାବଳି ବିଶ୍ୱର ସର୍ବପୁରାତନ ଧର୍ମ ଓ ସଂସ୍କୃତି ମଧ୍ୟରୁ ଅନ୍ୟତମ ହିନ୍ଦୁ ଧର୍ମର ଏକ ପ୍ରମୁଖ ପର୍ବ। ଭଗବାନ ଶ୍ରୀରାମ ସମସ୍ତଙ୍କ ଆରାଧ୍ୟ। ଏଭଳି ସ୍ଥିତିରେ କଂଗ୍ରେସ ଅଧ୍ୟକ୍ଷଙ୍କୁ ଦୀପାବଳି କହିବାରେ ମଧ୍ୟ ଅସୁବିଧା କାହିଁକି ହେଉଛି ବୋଲି ସେ ପ୍ରଶ୍ନ କରିଛନ୍ତି।

ଭାଟିଆ କହିଛନ୍ତି ଯେ, ଯେତେବେଳେ ସମଗ୍ର ଦେଶ ଦୀପାବଳିର ଶୁଭେଚ୍ଛା ଜଣାଉଥିଲା, ସେତେବେଳେ ଖଡ଼ଗେ ଏହାକୁ ସମଗ୍ର ବିଶ୍ୱ ପାଇଁ ‘ଖୁସିର ଇଦ୍’ ବୋଲି କହିଥିଲେ। କଂଗ୍ରେସର ରାଜନୀତି କ'ଣ ଏବେ ହିନ୍ଦୁ ପର୍ବଗୁଡ଼ିକର ପରିଚୟ ବଦଳାଇବା ଦିଗରେ ଗତି କରୁଛି? ଖଡ଼ଗେଙ୍କ ଏହି ବୟାନ କୋଟି କୋଟି ହିନ୍ଦୁଙ୍କ ଭାବନାକୁ ଆଘାତ ପହଞ୍ଚାଇଛି। ଭାଟିଆ ରାହୁଲ ଗାନ୍ଧୀ ଏବଂ ଖଡ଼ଗେଙ୍କୁ ଆହ୍ୱାନ ଦେଇ କହିଛନ୍ତି ଯେ, ଇଦ୍ ଆସିବା ସମୟରେ ସେମାନେ ଏହାକୁ ‘ଖୁସିର ଦୀପାବଳି’ ବୋଲି କହି ଦେଖାନ୍ତୁ।

ସେ ଅଭିଯୋଗ କରିଛନ୍ତି ଯେ, ମୁସଲିମ ସମ୍ପ୍ରଦାୟର ତୁଷ୍ଟୀକରଣ କରିବା ଏବଂ ହିନ୍ଦୁ ସମାଜର ଭାବନାକୁ ଆଘାତ ପହଞ୍ଚାଇବା କଂଗ୍ରେସର ଚରିତ୍ର ହୋଇ ରହିଛି। ଦୀପାବଳି ହେଉଛି ଖୁସି, ଆନନ୍ଦ ଏବଂ ସମାବେଶିତାର ପର୍ବ। କିନ୍ତୁ କଂଗ୍ରେସ ଅଧ୍ୟକ୍ଷଙ୍କ ବୟାନ ଏହି ଅବସରରେ ମଧ୍ୟ ହିନ୍ଦୁ ସମାଜର ଭାବନାକୁ ଆଘାତ ପହଞ୍ଚାଇଛି। ଖଡ଼ଗେଙ୍କ ବୟାନ କଂଗ୍ରେସର ସେହି ମାନସିକତାକୁ ଆଗକୁ ବଢ଼ାଉଛି, ଯାହାକୁ ବିଜେପି ଲଗାତାର ବିରୋଧ କରିଆସୁଛି ବୋଲି ସେ କହିଛନ୍ତି।

ବିଶ୍ୱ ହିନ୍ଦୁ ପରିଷଦର ଜାତୀୟ ମୁଖପାତ୍ର ବିନୋଦ ବଂଶଲ ମଧ୍ୟ ଖଡ଼ଗେଙ୍କ ବୟାନକୁ କଡ଼ା ନିନ୍ଦା କରିଛନ୍ତି। ସେ କହିଛନ୍ତି ଯେ, କଂଗ୍ରେସ ଏବଂ ଏହାର ଅଧ୍ୟକ୍ଷଙ୍କୁ ଏବେ ପ୍ରତ୍ୟେକ ପର୍ବରେ ଇଦ୍ ହିଁ ଦେଖାଯାଉଛି। ସେ ଏହି ବୟାନକୁ ଦୁର୍ଭାଗ୍ୟଜନକ, ଲଜ୍ଜାଜନକ ଏବଂ ନିନ୍ଦନୀୟ ବୋଲି କହିଛନ୍ତି। ଏହା ସମଗ୍ର ହିନ୍ଦୁ ସମାଜର ଅପମାନର ଆଉ ଏକ ଉଦାହରଣ ବୋଲି ସେ ମତ ଦେଇଛନ୍ତି। ଏଥିସହ କଂଗ୍ରେସ ଅଧ୍ୟକ୍ଷ କ୍ଷମା ମାଗନ୍ତୁ ବୋଲି ବଂଶଲ ଦାବି କରିଛନ୍ତି।

ହିନ୍ଦୁସ୍ଥାନ ସମାଚାର / ସ୍ୱାଗତିକା