ନୂଆଦିଲ୍ଲୀ, ୦୯ ନଭେମ୍ବର (ହି.ସ.)- କନଫେଡେରେସନ୍ ଅଫ୍ ଅଲ୍ ଇଣ୍ଡିଆ ଟ୍ରେଡର୍ସ (କ୍ୟାଟ୍) ପକ୍ଷରୁ ନଭେମ୍ବର ୧୩ ତାରିଖରେ ଜାତୀୟ ରାଜଧାନୀରେ ଏକ ଜାତୀୟ ସମ୍ମିଳନୀ ଆୟୋଜନ କରାଯିବ। ଏଥିରେ ବିରୋଧ ପ୍ରଦର୍ଶନ ଓ ଆନ୍ଦୋଳନ ଯୋଗୁଁ ବ୍ୟବସାୟରେ ସୃଷ୍ଟି ହେଉଥିବା ସମସ୍ୟା ସମ୍ପର୍କରେ ବ୍ୟବସାୟୀ ନେତାମାନେ ଆଲୋଚନା କରିବେ। ବ୍ୟବସାୟୀଙ୍କ ଜୀବିକାର ସୁରକ୍ଷା ପାଇଁ ଏକ ସମନ୍ୱିତ ରଣନୀତି ପ୍ରସ୍ତୁତ କରିବା ଉପରେ ମଧ୍ୟ ବିଚାରବିମର୍ଶ ହେବ।

କ୍ୟାଟ୍ର ଜାତୀୟ ମହାସଚିବ ତଥା ଚାନ୍ଦନୀ ଚୌକ୍ର ସାଂସଦ ପ୍ରବୀଣ ଖଣ୍ଡେଲୱାଲ ସୋମବାର କହିଛନ୍ତି ଯେ, ଏହି ସମ୍ମିଳନୀରେ ଦେଶର ବିଭିନ୍ନ ରାଜ୍ୟ ଏବଂ ପ୍ରମୁଖ ବ୍ୟବସାୟୀ ସଂଗଠନଗୁଡ଼ିକର ବରିଷ୍ଠ ପ୍ରତିନିଧିମାନେ ଯୋଗଦେବେ। ଗତ ଏକ ମାସ ମଧ୍ୟରେ ଦିଲ୍ଲୀରେ ହୋଇଥିବା ବିଭିନ୍ନ ଆନ୍ଦୋଳନ, ଧାରଣା ଓ ବିକ୍ଷୋଭ ଯୋଗୁଁ ବ୍ୟବସାୟରେ ହୋଇଥିବା କ୍ଷତି ଏବଂ ବ୍ୟବସାୟୀ, ଦୋକାନୀ, କ୍ଷୁଦ୍ର ବ୍ୟବସାୟୀ, ରାସ୍ତାକଡ଼ର ବିକ୍ରେତାଙ୍କ ସମେତ ବ୍ୟବସାୟ ଉପରେ ନିର୍ଭରଶୀଳ ଲକ୍ଷ ଲକ୍ଷ ଲୋକଙ୍କ ଜୀବିକା ଉପରେ ପଡ଼ିଥିବା ପ୍ରଭାବର ବିସ୍ତୃତ ବିଶ୍ଳେଷଣ କରାଯିବ।

ଖଣ୍ଡେଲୱାଲ କହିଛନ୍ତି ଯେ, ଦେଶର ରାଜଧାନୀ ନୂଆଦିଲ୍ଲୀରେ ଗତ ପ୍ରାୟ ଏକ ମାସ ମଧ୍ୟରେ ବିଭିନ୍ନ ରାଜନୈତିକ ଆନ୍ଦୋଳନ, ଧାରଣା ଓ ବିକ୍ଷୋଭ ଯୋଗୁଁ ବ୍ୟବସାୟିକ କାର୍ଯ୍ୟକଳାପ ବ୍ୟାପକ ଭାବେ ବାଧାପ୍ରାପ୍ତ ହୋଇଛି। ଏହାଦ୍ୱାରା ବ୍ୟବସାୟୀଙ୍କ ଜୀବିକା ଉପରେ ପଡ଼ିଥିବା ପ୍ରତିକୂଳ ପ୍ରଭାବକୁ ନେଇ ସାରା ଦେଶର ବ୍ୟବସାୟୀ ସମୁଦାୟ ମଧ୍ୟରେ ଗଭୀର ଅସନ୍ତୋଷ, ଚିନ୍ତା ଓ କ୍ଷୋଭ ଦେଖାଦେଇଛି। ଏହି ଗମ୍ଭୀର ପ୍ରସଙ୍ଗରେ ଜାତୀୟସ୍ତରରେ ବିଚାରବିମର୍ଶ କରିବା ସହ ଭବିଷ୍ୟତରେ ଏଭଳି ପରିସ୍ଥିତିରୁ ବ୍ୟବସାୟ ଓ ଜୀବିକାକୁ ସୁରକ୍ଷିତ ରଖିବା ପାଇଁ ଏକ ଠୋସ୍ ରଣନୀତି ପ୍ରସ୍ତୁତ କରିବା ଉଦ୍ଦେଶ୍ୟରେ କ୍ୟାଟ୍ ପକ୍ଷରୁ ନଭେମ୍ବର ୧୩ ତାରିଖରେ ସମସ୍ତ ରାଜ୍ୟର ବରିଷ୍ଠ ବ୍ୟବସାୟୀ ନେତାଙ୍କୁ ନେଇ ଏକଦିବସୀୟ ଜାତୀୟ ସମ୍ମିଳନୀ ଡକାଯାଇଛି।

ହିନ୍ଦୁସ୍ଥାନ ସମାଚାର / ଭାନୁ ଚରଣ