କୋଲକାତା, ୦୯ ନଭେମ୍ବର (ହି.ସ.)। ରାୟଗଞ୍ଜରେ ୧୨ ବର୍ଷୀୟା ନାବାଳିକାଙ୍କ ଅପହରଣ, ଦୁଷ୍କର୍ମ ଓ ନିର୍ମମ ହତ୍ୟା ମାମଲାରେ ଫେରାର ଥିବା ମୁଖ୍ୟ ଅଭିଯୁକ୍ତ ଦିଲୀପ ରାୟଙ୍କୁ ସୋମବାର ଭୋର ସମୟରେ ପୁଲିସ ଏକ ଏନକାଉଣ୍ଟରରେ ଗୁଳି କରି ମାରିଦେଇଛି। ତଦନ୍ତକାରୀମାନେ ଗତ ଚାରି ଦିନ ଧରି ତାଙ୍କୁ ଜୋରଦାର ଖୋଜାଖୋଜି କରୁଥିଲେ। ରାଜ୍ୟରେ ନୂଆ ସରକାର ଗଠନ ହେବା ପରଠାରୁ ଏହା ଚତୁର୍ଥ ପୁଲିସ ଏନକାଉଣ୍ଟର ଘଟଣା। ତେବେ ଏହା ପୂର୍ବରୁ ଘଟିଥିବା ତିନୋଟି ମାମଲା (ବାରୁଇପୁର, ଗାୟଘାଟା ଓ ଶମଶେରଗଞ୍ଜ)ରେ ଅଭିଯୁକ୍ତମାନେ ଗିରଫ ହେବା ପରେ ପୁଲିସ ହେପାଜତରୁ ଖସିଯିବାକୁ ଉଦ୍ୟମ କରିବା ସମୟରେ ନିହତ ହୋଇଥିଲେ। କିନ୍ତୁ ରାୟଗଞ୍ଜ ମାମଲାରେ ଅଭିଯୁକ୍ତଙ୍କ ମୃତ୍ୟୁ ଗିରଫ ହେବା ପୂର୍ବରୁ ହୋଇଛି।

ପ୍ରାପ୍ତ ସୂଚନା ଅନୁସାରେ, ରାୟଗଞ୍ଜ ନିବାସୀ ଜଣେ ନାବାଳିକା ଗତ ମଙ୍ଗଳବାର (୦୩ ନଭେମ୍ବର) ସନ୍ଧ୍ୟାରେ ସାଇକେଲ ଯୋଗେ ଘରୁ ବାହାରିଥିଲେ। ଏହାପରେ ସେ ରହସ୍ୟଜନକ ଭାବେ ନିଖୋଜ ହୋଇଯାଇଥିଲେ। ପରିବାର ଲୋକଙ୍କ ଅଭିଯୋଗ ପରେ ପୁଲିସ ଜୋରଦାର ଖୋଜାଖୋଜି ଅଭିଯାନ ଆରମ୍ଭ କରିଥିଲା। ଘଟଣାର ଦୁଇ ଦିନ ପରେ ଶୁକ୍ରବାର ନିକଟସ୍ଥ କୁଲିକ ଜଙ୍ଗଲରୁ ନାବାଳିକାଙ୍କ ଉଲଗ୍ନ ଓ କ୍ଷତବିକ୍ଷତ ମୃତଦେହ ଉଦ୍ଧାର କରାଯାଇଥିଲା।

ପରିବାର ଲୋକେ ଅପହରଣ ପରେ ଦୁଷ୍କର୍ମ ଏବଂ ହତ୍ୟା କରାଯାଇଥିବା ନେଇ ସଙ୍ଗିନ ଅଭିଯୋଗ ଆଣିଥିଲେ। ଏହା ଗଣଦୁଷ୍କର୍ମ ମାମଲା କି ନୁହେଁ ଏବଂ ଏହି ଜଘନ୍ୟ ଅପରାଧରେ ଅନ୍ୟ କେହି ସାମିଲ ଅଛନ୍ତି କି ନାହିଁ, ସେନେଇ ମଧ୍ୟ ପୁଲିସ ତଦନ୍ତ କରୁଥିଲା।

ହିନ୍ଦୁସ୍ଥାନ ସମାଚାର / ସ୍ୱାଗତିକା