ଚଣ୍ଡୀଗଡ଼, ୦୯ ନଭେମ୍ବର (ହି.ସ.)। ସାରା ଦେଶରେ ଧୁମଧାମରେ ଦୀପାବଳି ପର୍ବ ପାଳନ କରାଯାଇଥିବା ବେଳେ ଦେଶର ସୀମାନ୍ତ ଓ ଦୁର୍ଗମ ଅଞ୍ଚଳରେ ମୁତୟନ ଥିବା ଭାରତୀୟ ସେନା ଏବଂ ସୁରକ୍ଷା ବାହିନୀର ଯବାନମାନେ ମଧ୍ୟ ନିଜ ସହଯୋଗୀଙ୍କ ସହ ମିଶି ପର୍ବର ଖୁସି ବାଣ୍ଟିଛନ୍ତି। ଘରଠାରୁ ଶହ ଶହ କିଲୋମିଟର ଦୂରରେ ରହିଥିଲେ ମଧ୍ୟ ଯବାନମାନଙ୍କ ଉତ୍ସାହରେ କୌଣସି ଅଭାବ ଦେଖିବାକୁ ମିଳିନଥିଲା। ସେମାନେ ସୋସିଆଲ ମିଡିଆରେ ଭିଡିଓ ବାର୍ତ୍ତା ସେୟାର କରି ନିଜ ପରିବାର ଓ ଦେଶବାସୀଙ୍କୁ ଦୀପାବଳିର ଶୁଭେଚ୍ଛା ଜଣାଇଛନ୍ତି।

ସୋସିଆଲ ମିଡିଆରେ ଭାଇରାଲ ହୋଇଥିବା ଏକ ଭିଡିଓରେ ସେନାର ଅନେକ ଯବାନ ବୁଲେଟ୍ପ୍ରୁଫ୍ ଜ୍ୟାକେଟ୍ ଓ ହେଲମେଟ୍ ପିନ୍ଧି ଦୀପାବଳିର ଶୁଭେଚ୍ଛା ଜଣାଉଥିବା ନଜର ଆସିଛନ୍ତି। ଅନ୍ୟ ଏକ ଭିଡିଓରେ ଜଣେ ଶିଖ୍ ଯବାନ ନିଜ ସହଯୋଗୀମାନଙ୍କ କରତାଳି ଓ ଉତ୍ସାହ ମଧ୍ୟରେ ସୁମଧୁର ସ୍ୱରରେ ଗୀତ ଗାଉଥିବା ଦେଖିବାକୁ ମିଳୁଛି। ଗୀତ ମାଧ୍ୟମରେ ସେ ବ୍ୟଙ୍ଗାତ୍ମକ ଢଙ୍ଗରେ ନିଜ ମନର ଭାବନା ପ୍ରକାଶ କରିଛନ୍ତି। ଦୀପାବଳିରେ ସେ ଘରକୁ ଯାଇପାରିନଥିଲେ କି ନିଜ ଭଉଣୀଙ୍କ ବିବାହରେ ଯୋଗ ଦେଇପାରିନଥିଲେ, କାରଣ ତାଙ୍କୁ ସୀମାରେ ନିଜର ଡ୍ୟୁଟି ସମ୍ପାଦନ କରିବାକୁ ପଡ଼ୁଛି। ସେ କହିଛନ୍ତି ଯେ, ଦିନସାରା କାନରେ ଗୁଳିର ଶବ୍ଦ ଗୁଞ୍ଜରିତ ହେଉଥାଏ। ଏଭଳି ପରିସ୍ଥିତିରେ ତାଙ୍କୁ ଲାଗେ ଯେପରି ପ୍ରତିଦିନ ହିଁ ତାଙ୍କ ପାଇଁ ଦୀପାବଳି।

ଅନ୍ୟ ଏକ ଭିଡିଓରେ ଉତ୍ତର-ପୂର୍ବ ଭାରତର ଜଣେ ଯବାନ ଦେଶବାସୀଙ୍କୁ ଦୀପାବଳିର ଶୁଭେଚ୍ଛା ଜଣାଇ କହିଛନ୍ତି ଯେ, ସେ ନିଜ ଘରଠାରୁ ଦୂରରେ ଥିଲେ ମଧ୍ୟ ବାଟାଲିୟନର ସହଯୋଗୀମାନଙ୍କ ସହ ପର୍ବ ପାଳନ କରି ବେଶ୍ ଖୁସି ଅଛନ୍ତି। ତାଙ୍କ ପାଇଁ ବାଟାଲିୟନ ହିଁ ଦ୍ୱିତୀୟ ପରିବାର ସଦୃଶ। ସମସ୍ତ ଯବାନ ପୂର୍ଣ୍ଣ ନିଷ୍ଠା ଓ ଉତ୍ସାହର ସହ ନିଜ ଦାୟିତ୍ୱ ନିର୍ବାହ କରିବା ସହ ପ୍ରତ୍ୟେକ ପର୍ବକୁ ମିଳିମିଶି ପାଳନ କରନ୍ତି ବୋଲି ସେ କହିଛନ୍ତି। ଅନ୍ୟ ଏକ ଭିଡିଓରେ ଅଗ୍ରିମ ମୋର୍ଚ୍ଚାରେ ମୁତୟନ ଯବାନମାନେ ପ୍ରାର୍ଥନା କରିବା ସହ ବାଣ ଫୁଟାଇ ଦୀପାବଳି ପାଳନ କରୁଥିବା ଦେଖାଯାଇଛି।

ହିନ୍ଦୁସ୍ଥାନ ସମାଚାର / ସ୍ୱାଗତିକା