ନୂଆଦିଲ୍ଲୀ, 08 ମାର୍ଚ୍ଚ (ହି.ସ.)-ପଶ୍ଚିମ ଏସିଆ ଏବଂ ନିକଟ ଅଞ୍ଚଳରେ ବଢ଼ୁଥିବା ବିବାଦ ମଧ୍ୟରେ ଭାରତ ସରକାର ସେଠାରେ ଥିବା
ଭାରତୀୟ ନାଗରିକମାନଙ୍କ ସୁରକ୍ଷା ଓ ସହାୟତା ପାଇଁ ଅନେକ ପଦକ୍ଷେପ ନେଇଛନ୍ତି। ବିଦେଶ
ମନ୍ତ୍ରାଳୟ କହିଛି ଯେ ଅଞ୍ଚଳରେ ପରିବର୍ତ୍ତିତ ହେଉଥିବା ପରିସ୍ଥିତି ଉପରେ ନିରନ୍ତର ନଜର
ରଖାଯାଉଛି ଏବଂ ଭାରତୀୟ ନାଗରିକଙ୍କ ସୁରକ୍ଷା ସର୍ବୋଚ୍ଚ ପ୍ରାଥମିକତା ରହିଛି।
ବିଦେଶ ମନ୍ତ୍ରାଳୟ ଅନୁସାରେ, ଗତ କିଛି ଦିନ ଧରି
ଅଞ୍ଚଳର ଆକାଶ ପଥ ଆଂଶିକ ଭାବେ ଖୋଲାଯିବା ପରେ ଅନେକ ବାଣିଜ୍ୟିକ ଏବଂ ବିଶେଷ ବିମାନ ସେବା ଚାଲୁ
କରାଯାଇଛି। ଏହି ବିମାନଗୁଡ଼ିକ ମାଧ୍ୟମରେ ୦୧ ମାର୍ଚ୍ଚରୁ ୦୭ ମାର୍ଚ୍ଚ ପର୍ଯ୍ୟନ୍ତ ୫୨,୦୦୦ରୁ ଅଧିକ ଭାରତୀୟ
ନାଗରିକ ନିକଟସ୍ଥ ଦେଶଗୁଡ଼ିକରୁ ସୁରକ୍ଷିତ ଭାବେ ଭାରତକୁ ଫେରିଆସିଛନ୍ତି। ଏଥିରୁ ୩୨,୦୦୦ରୁ ଅଧିକ ଯାତ୍ରୀ
ଭାରତୀୟ ବିମାନ ସେବାର ଉଡାଣ ବ୍ୟବହାର କରିଛନ୍ତି। ଆସନ୍ତା କିଛି ଦିନରେ ଆହୁରି ଉଡାଣ ଚାଲୁ
କରିବାର ଯୋଜନା ରହିଛି।
ସରକାର ଅଞ୍ଚଳରେ ଥିବା ଭାରତୀୟମାନଙ୍କୁ ସ୍ଥାନୀୟ ପ୍ରଶାସନର
ନିର୍ଦ୍ଦେଶ ଏବଂ ଭାରତୀୟ ଦୂତାବାସ ଦ୍ୱାରା ଜାରି କରାଯାଇଥିବା ପରାମର୍ଶକୁ ଅନୁସରଣ କରିବାକୁ
କହିଛି।
ବିଭିନ୍ନ ଦେଶରେ ଥିବା ଭାରତୀୟ ଦୂତାବାସ ଏବଂ ବାଣିଜ୍ୟ
ଦୂତାବାସମାନେ ୨୪ ଘଣ୍ଟା ଚାଲୁଥିବା ହେଲ୍ପଲାଇନ ଆରମ୍ଭ କରିଛନ୍ତି, ଯାହା ମାଧ୍ୟମରେ
ଆବଶ୍ୟକତାରେ ଥିବା ଲୋକମାନଙ୍କୁ ସହାୟତା ମିଳୁଛି। ବିଦେଶ ମନ୍ତ୍ରାଳୟ ନୂଆଦିଲ୍ଲୀରେ ଏକ ବିଶେଷ
ନିୟନ୍ତ୍ରଣ କକ୍ଷ (କଣ୍ଟ୍ରୋଲ ରୁମ) ମଧ୍ୟ ସ୍ଥାପନ କରିଛି, ଯାହା ପ୍ରଭାବିତ ଲୋକମାନେ ଓ
ତାଙ୍କ ପରିବାରଙ୍କ ପକ୍ଷରୁ ଆସୁଥିବା ପ୍ରଶ୍ନ ଓ ସହାୟତା ଅନୁରୋଧକୁ ନିରୀକ୍ଷଣ କରୁଛି।
ସରକାର କହିଛି ଯେ ଯେଉଁଠାରେ ବାଣିଜ୍ୟିକ ଉଡାଣ ଉପଲବ୍ଧ
ନାହିଁ, ସେଠାରେ ଭାରତୀୟ ନାଗରିକମାନେ ନିଜ ନିକଟସ୍ଥ ଭାରତୀୟ ଦୂତାବାସ କିମ୍ବା ବାଣିଜ୍ୟ ଦୂତାବାସ
ସହ ସମ୍ପର୍କ କରି ସୂଚନା ନେବାକୁ ପରାମର୍ଶ ଦିଆଯାଇଛି। ଆବଶ୍ୟକ ହେଲେ ଅଞ୍ଚଳୀୟ ସରକାରମାନଙ୍କ
ସହ ସମନ୍ୱୟ କରି ଅତିରିକ୍ତ ସହାୟତା ମଧ୍ୟ ଯୋଗାଇ ଦିଆଯିବ ବୋଲି ଭାରତ ସରକାର କହିଛି।
---------------
ହିନ୍ଦୁସ୍ଥାନ ସମାଚାର / ସ୍ୱାଗତିକା
08 Mar 2026