ଭୁବନେଶ୍ୱର, 18 ଏପ୍ରିଲ୍ (ହି.ସ.)- ମୟୂରଭଞ୍ଜ ଜିଲ୍ଲାର ଏକ ଆଶ୍ରମ ସ୍କୁଲରେ ଜଣେ

ଛାତ୍ରୀଙ୍କ କଥିତ ଖାଦ୍ୟ ବିଷାକ୍ତରୁ ମୃତ୍ୟୁ ହୋଇଥିବା ଘଟଣାକୁ ନେଇ ବିଜୁ ଜନତା ଦଳ 12

ଘଣ୍ଟିଆ ମୟୂରଭଞ୍ଜ ବନ୍ଦ ଡାକରା ଦେଇଛି ।

ସକାଳ 6ଟାରୁ ଆରମ୍ଭ ହୋଇ ସନ୍ଧ୍ୟା 6ଟା ପର୍ଯ୍ୟନ୍ତ ଚାଲୁଥିବା ଏହି

ବନ୍ଦରେ ଜିଲ୍ଲାର ସାଧାରଣ ଜୀବନ ପ୍ରଭାବିତ ହୋଇଛି । ବିଜେଡି ସମର୍ଥକମାନେ ବିଭିନ୍ନ ସ୍ଥାନରେ

ପ୍ରଦର୍ଶନ କରି ପ୍ରମୁଖ ସଡ଼କ,

ଜାତୀୟ ଓ ରାଜ୍ୟ

ରାଜପଥକୁ ଅବରୋଧ କରିଛନ୍ତି ଏବଂ କେତେକ ସ୍ଥାନରେ ଟାୟର ଜଳାଇ ପ୍ରତିବାଦ କରିଛନ୍ତି।

ଉଲ୍ଲେଖନୀୟ ଯେ, ଜିଲ୍ଲାର ରାସଗୋବିନ୍ଦପୁର ଆଶ୍ରମ ସ୍କୁଲର 5ମ ଶ୍ରେଣୀର ଛାତ୍ରୀ

ରୂପାଳୀ ବେଶ୍ରାଙ୍କ ମୃତ୍ୟୁକୁ ନେଇ ଏହି ବନ୍ଦ ଡାକାଯାଇଛି। ଛାତ୍ରୀଙ୍କ ମୃତ୍ୟୁ ସ୍କୁଲ

ହୋଷ୍ଟେଲରେ ଦିଆଯାଇଥିବା ଦୂଷିତ କିମ୍ବା ବାସି ଖାଦ୍ୟ ଖାଇବା ପରେ ଘଟିଥିବା କଥା କୁହାଯାଉଛି।

ସେହି ଖାଦ୍ୟ ଖାଇବା ପରେ 146ରୁ ଅଧିକ ଛାତ୍ରଛାତ୍ରୀ ବାନ୍ତି କରିବା ସହ ଡାଏରିଆ ପରି ଲକ୍ଷଣ

ସହିତ ଅସୁସ୍ଥ ହୋଇପଡ଼ିଥିଲେ।

ବିଜେଡି ନେତାମାନେ ଏହି ଘଟଣାକୁ ଗୁରୁତର ଅବହେଳା ବୋଲି କହି ସ୍କୁଲ

ପ୍ରଶାସନ ଓ ରାଜ୍ୟ ସରକାରଙ୍କ ଭୂମିକା ଉପରେ ପ୍ରଶ୍ନ ଉଠାଇଛନ୍ତି। ଦଳ ମୃତ ଛାତ୍ରୀ ପାଇଁ ନ୍ୟାୟ

ଏବଂ ଦୋଷୀମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନର ଦାବି କରିଛି।

ବିଜେଡି ଜିଲ୍ଲା ଅଧ୍ୟକ୍ଷ ସୁଦାମ ମରାଣ୍ଡିଙ୍କ ନେତୃତ୍ୱରେ ଚାଲୁଥିବା

ଏହି ପ୍ରତିବାଦରେ ଦଳର ଯୁବ, ଛାତ୍ର ଓ ଅନ୍ୟାନ୍ୟ

ସଂଗଠନର କର୍ମୀମାନେ ବହୁ ସଂଖ୍ୟାରେ ଯୋଗଦେଇଛନ୍ତି।

ବନ୍ଦର ପ୍ରଭାବ ଜିଲ୍ଲାର ଚାରିଟି ଉପଖଣ୍ଡ ବାରିପଦା, କପ୍ତିପଦା, ବାମନଘାଟି ଓ

ପାଞ୍ଚପୀଢ଼ରେ ଦେଖିବାକୁ ମିଳୁଛି। ପ୍ରତିବାଦକାରୀମାନେ ବେତନଟି ଷ୍ଟେସନ ନିକଟରେ କିଛି ସମୟ

ପାଇଁ ବାଙ୍ଗିରିପୋସି-ପୁରୀ ସୁପରଫାଷ୍ଟ ଟ୍ରେନକୁ ମଧ୍ୟ ଅଟକାଇଥିଲେ।

ଆବଶ୍ୟକ ସେବାକୁ ବନ୍ଦରୁ ବାହାରେ ରଖାଯାଇଛି। ଆମ୍ବୁଲାନ୍ସ ଓ ଜରୁରୀକାଳୀନ

ଯାନବାହନ ଚଳାଚଳ ଜାରି ରହିଛି । ଆବଶ୍ୟକ ଦୋକାନ ଖୋଲା ରହିଛି। ଏପର୍ଯ୍ୟନ୍ତ ବନ୍ଦ ଶାନ୍ତିପୂର୍ଣ୍ଣ

ଭାବରେ ଚାଲିଛି ଏବଂ କୌଣସି ଅପ୍ରୀତିକର ଘଟଣାର ସୂଚନା ମିଳିନାହିଁ।

---------------

ହିନ୍ଦୁସ୍ଥାନ ସମାଚାର / ସ୍ୱାଗତିକା