ନୂଆଦିଲ୍ଲୀ, ୧୩ ମଇ(ହି.ସ.) – ଉଜବେକିସ୍ତାନର ଉପ ବୈଦେଶିକ ମନ୍ତ୍ରୀ ଆଲୋଏଭ୍ ବଖ୍ରୋମଜୋନ୍ ଜୋରାବୋଭିଚ୍, ଇରାନର ଉପ ବୈଦେଶିକ ମନ୍ତ୍ରୀ ଡକ୍ଟର କାଜେମ ଘରିବାବାଦୀ, କାଜାଖସ୍ତାନର ପ୍ରଥମ ଉପ ବୈଦେଶିକ ମନ୍ତ୍ରୀ ୟେରଝାନ ଅଶିକବାୟେଭ୍ ଏବଂ ନାଇଜେରିଆର ବୈଦେଶିକ ବ୍ୟାପାର ମନ୍ତ୍ରଣାଳୟର ସ୍ଥାୟୀ ସଚିବ ଡୁନୋମା ଓମାର ଅହମ୍ମଦ ୧୪-ଆଇ. ଡି. ୨ରେ ବ୍ରିକ୍ସ୍ ବୈଦେଶିକ ମନ୍ତ୍ରୀଙ୍କ ବୈଠକରେ ଯୋଗଦେବାକୁ ବୁଧବାର ଏଠାରେ ପହଂଚିଛନ୍ତି।
ବୈଦେଶିକ ବ୍ୟାପାର ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ ବିଭିନ୍ନ ଏକ୍ସ-ପୋଷ୍ଟରେ ଏହି ଅଧିକାରୀଙ୍କ ଆଗମନ ବିଷୟରେ ସୂଚନା ଦେଇଥିଲେ। ସଚିବ(ପଶ୍ଚିମ) ସିବି ଜର୍ଜ ଇରାନର ଉପ ବୈଦେଶିକ ମନ୍ତ୍ରୀ ଡକ୍ଟର କାଜେମ ଘରିବାବାଦୀଙ୍କ ସହ ଦ୍ୱିପାକ୍ଷିକ ଏବଂ ଆଂଚଳିକ ପ୍ରସଙ୍ଗ ଉପରେ ଆଲୋଚନା କରିଥିଲେ। ସେଠାରେ ପହଂଚିବା ପରେ ଉଜବେକିସ୍ତାନ, କାଜାଖସ୍ତାନ ଏବଂ ନାଇଜେରିଆର ଅଧିକାରୀମାନଙ୍କୁ ମଧ୍ୟ ସ୍ୱାଗତ କରାଯାଇଥିଲା।
ଉଲ୍ଲେଖନୀୟ କଥା ହେଉଛି, ଏହି ସମସ୍ତ ନେତା ନୂଆଦିଲ୍ଲୀରେ ୧୪-୧୫ ମଇରେ ଅନୁଷ୍ଠିତ ହେବାକୁ ଥିବା ବ୍ରିକ୍ସ୍ ଦେଶଗୁଡ଼ିକର ବୈଦେଶିକ ମନ୍ତ୍ରୀଙ୍କ ଦୁଇ ଦିନିଆ ବୈଠକରେ ଯୋଗଦେବାକୁ ଭାରତ ଆସିଛନ୍ତି। ଏହି ବୈଠକରେ ବୈଦେଶିକ ବ୍ୟାପାର ମନ୍ତ୍ରୀ ଡକ୍ଟର ଏସ୍. ଜୟଶଙ୍କର ଅଧ୍ୟକ୍ଷତା କରିବେ। ଏଥିରେ ବ୍ରାଜିଲ, ରୁଷ, ଦକ୍ଷିଣ ଆଫ୍ରିକା, ଇଜିପ୍ଟ, ଇଥିଓପିଆ ଏବଂ ଇଣ୍ଡୋନେସିଆର ବୈଦେଶିକ ମନ୍ତ୍ରୀମାନେ ସାମିଲ ହେବେ। ଏଥିରେ ଚୀନରୁ ଏକ ଶେର୍ପା ପ୍ରତିନିଧି ଦଳ ଯୋଗଦେବେ।
ହିନ୍ଦୁସ୍ଥାନ ସମାଚାର/ବୀଣାପାଣି
.......................................
ହିନ୍ଦୁସ୍ଥାନ ସମାଚାର / ବୀଣାପାଣି
