ଦେୱାସ, ମେ୧୪ (ହି.ସ.)- ମଧ୍ୟପ୍ରଦେଶର ଦେୱାସ ଜିଲ୍ଲା ମୁଖ୍ୟାଳୟଠାରୁ ପ୍ରାୟ ୨୦ କିଲୋମିଟର ଦୂରରେ ଆଗ୍ରା-ମୁମ୍ବାଇ ଜାତୀୟ ରାଜପଥରେ ଥିବା ଟୋଙ୍କାଲା ଗ୍ରାମ ନିକଟରେ ଅବସ୍ଥିତ ଏକ କାରଖାନାରେ ଗୁରୁବାର ଦିନ ଏକ ବିସ୍ଫୋରଣ ପରେ ଭୀଷଣ ଅଗ୍ନିକାଣ୍ଡ ଘଟିଥିଲା। ଏହି ଦୁର୍ଘଟଣାରେ ତିନି ଜଣ ଶ୍ରମିକଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ୨୫ ଜଣ ଆହତ ହୋଇଛନ୍ତି। ଏହି ଘଟଣା ପରେ ପ୍ରଶାସନ କାରଖାନାକୁ ସିଲ୍ କରିଥିବାବେଳେ ପୋଲିସ କାରଖାନାର ମାଲିକ ଅନୀଲ ମାଲବ୍ୟଙ୍କୁ ଅଟକ ରଖିଛି। ମୁଖ୍ୟମନ୍ତ୍ରୀ ମୋହନ ଯାଦବ ଏହି ଦୁର୍ଘଟଣାରେ ଦୁଃଖ ପ୍ରକାଶ କରିବା ସହ ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି।
ପ୍ରତ୍ୟକ୍ଷଦର୍ଶୀମାନେ କହିଛନ୍ତି ଯେ ଗୁରୁବାର ସକାଳ ପ୍ରାୟ ୧୦ଟା ୩୦ ମିନିଟରେ ଟୋଙ୍କାଲା ଗାଁର କାରଖାନାରେ ଦୁଇଟି ରାସାୟନିକ ପଦାର୍ଥ ମିଶାଇ ବାରୁଦ ତିଆରି କରାଯାଉଥିଲା। ଏହି ସମୟରେ, ରାସାୟନିକ ପଦାର୍ଥର ପରିମାଣ ସଠିକ୍ ଭାବରେ ମିଳିନଥିଲା, ଯାହା ବିସ୍ଫୋରଣର କାରଣ ହୋଇଥିଲା। ବିସ୍ଫୋରଣ ପରେ କାରଖାନାରେ ଭୟାବହ ଅଗ୍ନିକାଣ୍ଡ ଘଟିଥିଲା। ନିଆଁ ଦ୍ରୁତ ଗତିରେ ବ୍ୟାପିବାକୁ ଲାଗିଲା, ତେଣୁ ଭିତରେ ଥିବା ଶ୍ରମିକମାନଙ୍କୁ ବାହାରକୁ ବାହାରିବାର ସୁଯୋଗ ମଧ୍ୟ ମିଳିନଥିଲା। ଦୁର୍ଘଟଣା ବିଷୟରେ ସୂଚନା ପାଇବା ପରେ ସ୍ଥାନୀୟ ପ୍ରଶାସନ, ପୋଲିସ ଏବଂ ଉଦ୍ଧାରକାରୀ ଦଳ ତୁରନ୍ତ ଘଟଣାସ୍ଥଳକୁ ଯାଇଥିଲେ ଏବଂ ଆହତମାନଙ୍କୁ ତୁରନ୍ତ ଆମ୍ବୁଲାନ୍ସ ଏବଂ ଅନ୍ୟାନ୍ୟ ଗାଡ଼ିରେ ଜିଲ୍ଲା ଡାକ୍ତରଖାନାକୁ ନିଆଯାଇଥିଲା।
ଏହି ଦୁର୍ଘଟଣାରେ ତିନି ଜଣ ଶ୍ରମିକଙ୍କ ମୃତ୍ୟୁ ହୋଇଥିବା ଜିଲ୍ଲା ପ୍ରଶାସନ ନିଶ୍ଚିତ କରିଛି। ମୃତକମାନେ ହେଲେ ଧୀରଜ, ସନ୍ନି ଏବଂ ସୁମିତ। ଆହତମାନଙ୍କୁ ବିଭିନ୍ନ ଡାକ୍ତରଖାନାରେ ଭର୍ତି କରାଯାଇଛି। ଗୁରୁତର ଆହତ ଶ୍ରମିକମାନଙ୍କୁ ଇନ୍ଦୋରର ଟି. ଚୋଇଥ୍ରାମ ଡାକ୍ତରଖାନାରେ ଭର୍ତି କରାଯାଇଛି।
ହିନ୍ଦୁସ୍ଥାନ ସମାଚାର / ଭାନୁ ଚରଣ
