କୋଲକାତା, ୧୫ ମଇ (ହି.ସ) ପଶ୍ଚିମବଙ୍ଗ ବିଧାନସଭାକୁ ଶୁକ୍ରବାର ଦିନ ନୂଆ ବାଚସ୍ପତି ମିଳିଛି। କୋଚବିହାର ଦକ୍ଷିଣରୁ ଭାରତୀୟ ଜନତା ପାର୍ଟି (ବିଜେପି) ର ବିଧାୟକ ରଥୀନ୍ଦ୍ର ବୋଷ ବିନା ପ୍ରତିଦ୍ୱନ୍ଦ୍ୱିତାରେ ବିଧାନସଭା ବାଚସ୍ପତି ପଦ ପାଇଁ ନିର୍ବାଚିତ ହୋଇଛନ୍ତି। ପ୍ରଥମ ଥର ବିଧାୟକ ହୋଇଥିବା ରଥିନ୍ଦ୍ର ବୋଷଙ୍କ ନିର୍ବାଚନ ବିଧାନସଭାରେ ପ୍ରୋଟେମ୍ ବାଚସ୍ପତି ତପସ୍ ରାୟଙ୍କ ତତ୍ତ୍ୱାବଧାନରେ ଅନୁଷ୍ଠିତ ହୋଇଥିଲା।
ଶାସକ ବିଜେପି ତରଫରୁ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ରଥୀନ୍ଦ୍ର ବୋଷଙ୍କ ନାମ ପ୍ରସ୍ତାବ ଦେଇଥିଲେ, ଯାହାକୁ ଦିଲୀପ ଘୋଷ ସମର୍ଥନ କରିଥିଲେ। ତାଙ୍କୁ ବାଚନିକ ଭୋଟରେ ବିଧାନସଭାର ନୂତନ ବାଚସ୍ପତି ଘୋଷଣା କରାଯାଇଥିଲା। 'ବନ୍ଦେ ମାତରମ୍ ଜରିଆରେ ଗୃହକାର୍ଯ୍ୟ ଆରମ୍ଭ ହୋଇଥିଲା। ବାଚସ୍ପତିଙ୍କ ନିର୍ବାଚନ ସମୟରେ ତୃଣମୂଳ କଂଗ୍ରେସର ବିଧାୟକମାନେ ଗୃହରେ ଉପସ୍ଥିତ ନଥିଲେ । ସେମାନେ ପରେ କାର୍ଯ୍ୟାନୁଷ୍ଠାନରେ ଯୋଗ ଦେଇଥିଲେ।
ନିର୍ବାଚନ ପରେ ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ଏବଂ ବିରୋଧୀ ଦଳ ନେତା ସୋଭନଦେବ ଚଟ୍ଟୋପାଧ୍ୟାୟ ରଥୀନ୍ଦ୍ର ବୋଷଙ୍କୁ ବାଚସ୍ପତିଙ୍କ ଚେୟାରକୁ ନେଇ ଯାଇଥିଲେ। ତୃଣମୂଳ କଂଗ୍ରେସ ଏହି ନିର୍ବାଚନକୁ ବିରୋଧ କରିନଥିଲା। ପୂର୍ବତନ ବିଧାନସଭା ବାଚସ୍ପତି ବିମାନ ବନ୍ଦୋପାଧ୍ୟାୟ ମଧ୍ୟ ରଥୀନ୍ଦ୍ର ବୋଷଙ୍କୁ ଶୁଭେଚ୍ଛା ଜଣାଇଥିଲେ।
ବିଧାନସଭାର ପରମ୍ପରା ଅନୁଯାୟୀ, ରଥିନ୍ଦ୍ର ବୋଷ ପ୍ରଥମ ବ୍ୟକ୍ତି ଥିଲେ ଯିଏକି ବାଚସ୍ପତି ହେବା ପରେ ମୁଖ୍ୟମନ୍ତ୍ରୀଙ୍କୁ ଭାଷଣ ଦେବାକୁ ଅନୁମତି ଦେଇଥିଲେ। ନୂତନ ବାଚସ୍ପତିଙ୍କୁ ସ୍ୱାଗତ କରି ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ କହିଛନ୍ତି ଯେ ଆଗାମୀ ପାଞ୍ଚ ବର୍ଷ ମଧ୍ୟରେ ବିଧାନସଭା ଗଠନମୂଳକ ଭାବରେ କାର୍ଯ୍ୟ କରିବ ଯାହା ରାଜ୍ୟର ଲୋକଙ୍କ ଆଶା ପୂରଣ କରିବ। ସେ ଏହା ମଧ୍ୟ କହିଛନ୍ତି ଯେ ବିରୋଧୀଙ୍କୁ କହିବା ପାଇଁ ସମ୍ପୂର୍ଣ୍ଣ ସୁଯୋଗ ମିଳିବ ଏବଂ ଗୃହର କାର୍ଯ୍ୟଧାରାରେ ବାଧା ସୃଷ୍ଟି କରାଯିବା ଉଚିତ ନୁହେଁ।
--------
ହିନ୍ଦୁସ୍ଥାନ ସମାଚାର / ସ୍ୱାଗତିକା
