କୋଲକାତା, ୧୫ ମଇ (ହି.ସ.)- ପଶ୍ଚିମବଙ୍ଗର ଆରଜି କର ମେଡିକାଲ କଲେଜରେ ଜଣେ ମହିଳା ଡାକ୍ତରଙ୍କ ବଳାତ୍କାର ଏବଂ ହତ୍ୟା ଘଟଣାରେ ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଭୂମିକାର ଏବେ ତଦନ୍ତ କରାଯିବ। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଏବଂ ଗୃହମନ୍ତ୍ରୀ ଶୁଭେନ୍ଦୁ ଅଧିକାରୀ ଶୁକ୍ରବାର ନବାନ୍ନାରେ ଏହା ଘୋଷଣା କରିଛନ୍ତି ଏବଂ ଏହି ମାମଲା ସହିତ ଜଡିତ ତିନି ଜଣ ଆଇପିଏସ୍ ଅଧିକାରୀଙ୍କୁ ତୁରନ୍ତ ପ୍ରଭାବରୁ ନିଲମ୍ବିତ କରିଛନ୍ତି। ପୀଡିତାଙ୍କ ମାଆ ଏବଂ ପାଣିହାଟିର ବିଜେପି ବିଧାୟକ ମୁଖ୍ୟମନ୍ତ୍ରୀଙ୍କ ନିଷ୍ପତିକୁ ସ୍ୱାଗତ କରିଛନ୍ତି।
ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ କହିଛନ୍ତି ଯେ ଆରଜି କର ମାମଲାର ଫାଇଲ୍ ପୁଣି ଖୋଲାଯାଉଛି ଏବଂ ସେତେବେଳେ ଦାୟିତ୍ୱରେ ଥିବା ଅଧିକାରୀଙ୍କ ଭୂମିକା ସମ୍ପର୍କରେ ବିଭାଗୀୟ ତଦନ୍ତ କରାଯିବ। ନିଲମ୍ବିତ ଅଧିକାରୀମାନଙ୍କ ମଧ୍ୟରେ ତତ୍କାଳୀନ କୋଲକାତା ପୋଲିସ କମିଶନର ବିନୀତ ଗୋୟଲ, ତତ୍କାଳୀନ ପୋଲିସ ଡେପୁଟି କମିଶନର (ଉତର) ଅଭିଷେକ ଗୁପ୍ତା ଏବଂ ତତ୍କାଳୀନ ପୋଲିସ ଡେପୁଟି କମିଶନର (କେନ୍ଦ୍ରୀୟ) ଇନ୍ଦିରା ମୁଖୋପାଧ୍ୟାୟ ଅନ୍ତର୍ଭୁକ୍ତ।
ମୁଖ୍ୟମନ୍ତ୍ରୀ କହିଛନ୍ତି ଯେ ଗୃହମନ୍ତ୍ରୀ ପଦ ଗ୍ରହଣ କରିବା ପରେ, ସେ ମୁଖ୍ୟ ସଚିବ ଏବଂ ଗୃହ ସଚିବଙ୍କଠାରୁ ଆରଜି କର ମାମଲା ଏବଂ ପରବର୍ତୀ ପରିସ୍ଥିତି ସମ୍ପର୍କରେ ଏକ ବିସ୍ତୃତ ରିପୋର୍ଟ ମାଗିଥିଲେ। ରିପୋର୍ଟ ଆଧାରରେ, ଏହି ନିଷ୍ପତି ପ୍ରାରମ୍ଭିକ ପ୍ରଶାସନିକ କାର୍ଯ୍ୟାନୁଷ୍ଠାନ ଭାବରେ ନିଆଯାଇଥିଲା। ସେ ଅଭିଯୋଗ କରିଥିଲେ ଯେ ମାମଲାକୁ ଭୁଲ ଭାବରେ ପରିଚାଳନା କରାଯାଇଥିଲା ଏବଂ ଏଫଆଇଆର ଦାଖଲ ଠାରୁ ଆରମ୍ଭ କରି ପ୍ରାରମ୍ଭିକ ତଦନ୍ତ ପର୍ଯ୍ୟନ୍ତ ବିଭିନ୍ନ ସ୍ତରରେ ଗୁରୁତର ତ୍ରୁଟି ଘଟିଛି।
ଶୁଭେନ୍ଦୁ ଅଧିକାରୀ କହିଛନ୍ତି ଯେ ବିଭିନ୍ନ ଗଣମାଧ୍ୟମ ରିପୋର୍ଟ କରିଛନ୍ତି ଯେ ରାଜ୍ୟ ସରକାର ପୀଡିତାଙ୍କ ମାଆଙ୍କୁ ଟଙ୍କା ପ୍ରଦାନ କରିବାକୁ ଚେଷ୍ଟା କରିଥିଲେ। ଏହା ଏକ ପ୍ରକାର ଲାଂଚ ପ୍ରୟାସ ଥିଲା ଏବଂ ଏହାର ତଦନ୍ତ କରାଯିବ। ସମ୍ପୃକ୍ତ ଅଧିକାରୀଙ୍କ କଲ୍ ରେକର୍ଡ ଏବଂ ହ୍ୱାଟ୍ସଆପ୍ ଚାଟ୍, ସେହି ସମୟରେ ସେମାନେ ଯେଉଁମାନଙ୍କ ସହିତ ଯୋଗାଯୋଗ କରିଥିଲେ, ସେମାନଙ୍କର ମଧ୍ୟ ଯାଂଚ କରାଯିବ। ତତ୍କାଳୀନ ମୁଖ୍ୟମନ୍ତ୍ରୀ କିମ୍ବା କୌଣସି ମନ୍ତ୍ରୀ କୌଣସି ନିର୍ଦ୍ଦେଶ ଦେଇଥିଲେ କି ନାହିଁ ତାହା ମଧ୍ୟ ଯାଂଚ କରାଯିବ।
-----------------
---------------
ହିନ୍ଦୁସ୍ଥାନ ସମାଚାର / ଗଗନ
