ବେଙ୍ଗାଲୁରୁ, ୩୦ ମେ (ହି.ସ) ରାଜ୍ୟର ପରବର୍ତ୍ତୀ ମୁଖ୍ୟମନ୍ତ୍ରୀ ଚୟନ ପ୍ରକ୍ରିୟାକୁ ଆନୁଷ୍ଠାନିକ ଭାବେ ଆଗକୁ ନେବା ପାଇଁ ଆଜି ବେଙ୍ଗାଲୁରୁରେ କର୍ଣ୍ଣାଟକ କଂଗ୍ରେସ ବିଧାୟକ ଦଳ (ସିଏଲପି) ର ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହେବ। ବର୍ତ୍ତମାନର ରାଜ୍ୟ କଂଗ୍ରେସ ସଭାପତି ତଥା ପୂର୍ବତନ ଉପମୁଖ୍ୟମନ୍ତ୍ରୀ ଡି. କେ. ଶିବକୁମାର ବିଧାୟକ ଦଳର ନୂତନ ନେତା ଭାବରେ ନିର୍ବାଚିତ ହେବା ପ୍ରାୟ ନିଶ୍ଚିତ।

ଆଜି ଅପରାହ୍ନ 4ଟାରେ ବିଧାନ ସୌଧର ତୃତୀୟ ମହଲାରେ ଥିବା ସମ୍ମିଳନୀ କକ୍ଷରେ ଏହି ବୈଠକ ଅନୁଷ୍ଠିତ ହେବ। ଏହି ବୈଠକରେ ସମସ୍ତ କଂଗ୍ରେସ ବିଧାୟକଙ୍କୁ ବାଧ୍ୟତାମୂଳକ ଭାବେ ଯୋଗଦେବାକୁ ବିଧାୟକ ଦଳ ସଚିବ ଆଲ୍ଲମପ୍ରଭୁ ପାଟିଲ ନିର୍ଦ୍ଦେଶ ଦେଇଛନ୍ତି।

ପୂର୍ବତନ ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କ ଇସ୍ତଫାକୁ ଶୁକ୍ରବାର କର୍ଣ୍ଣାଟକ ରାଜ୍ୟପାଳ ଥାୱର ଚାନ୍ଦ ଗେହଲଟ ଗ୍ରହଣ କରିଛନ୍ତି। ଏହା ସହିତ ରାଜ୍ୟ କ୍ୟାବିନେଟକୁ ମଧ୍ୟ ଭାଙ୍ଗି ଦିଆଯାଇଛି। ଏହି ପୃଷ୍ଠଭୂମିରେ କଂଗ୍ରେସ ବିଧାୟକ ଦଳର ଏକ ବୈଠକ ଡକାଯାଇଛି।

ସିଦ୍ଧରମୈୟା ଏହି ବୈଠକରେ ଅଧ୍ୟକ୍ଷତା କରିବେ। ଏହି ଅବସରରେ କଂଗ୍ରେସର କର୍ଣ୍ଣାଟକ ପ୍ରଭାରୀ ରଣଦୀପ ସିଂହ ସୁରଜେୱାଲା, ବିଧାନ ପରିଷଦରେ ଗୃହର ନେତା ଏନ୍. ଏସ୍. ଭୋସାରାଜୁ, ଡି. କେ. ଶିବକୁମାରଙ୍କ ସମେତ ଦଳର ବରିଷ୍ଠ ନେତା ଏବଂ ସମସ୍ତ କଂଗ୍ରେସ ବିଧାୟକ ଉପସ୍ଥିତ ରହିବେ।

--------

हिन्दुस्थान समाचार / Swagatika Muduli