ନୂଆଦିଲ୍ଲୀ, ୩୦ ମଇ (ହି.ସ.)- କେନ୍ଦ୍ର କୃଷି ଏବଂ କୃଷକ କଲ୍ୟାଣ ତଥା ଗ୍ରାମୀଣ ବିକାଶ ମନ୍ତ୍ରଣାଳୟର ତତ୍ୱାବଧାନରେ, ଜୁନ୍ ୧ ତାରିଖ ଠାରୁ ସାରା ଦେଶରେ ବିଲ ବଚାଓ ଅଭିଯାନ ଆରମ୍ଭ କରାଯାଉଛି । ଏହି ପରିପ୍ରେକ୍ଷୀରେ କେନ୍ଦ୍ର ମନ୍ତ୍ରୀ ଶିବରାଜ ସିଂହ ଚୌହାନ ଶନିବାର ଏକ ଉଚ୍ଚସ୍ତରୀୟ ବୈଠକ କରି କହିଛନ୍ତି ଯେ, ଏହି ଅଭିଯାନର ଲକ୍ଷ୍ୟ ସାରର ସନ୍ତୁଳିତ ଏବଂ ବିବେକପୂର୍ଣ୍ଣ ବ୍ୟବହାର, ପାଣିପାଗ ଆହ୍ୱାନକୁ ଦୃଷ୍ଟିରେ ରଖି କୃଷକମାନଙ୍କୁ ସମୟୋଚିତ ପରାମର୍ଶ, ପଂଚାୟତ ସ୍ତରରେ ସକ୍ରିୟ ଅଂଶଗ୍ରହଣ ଏବଂ ଯୋଜନାର ଲାଭ ସିଧାସଳଖ ଗ୍ରାମରେ ପହଂଚିବା ଉପରେ ରହିବା ଉଚିତ୍ । ବୈଠକରେ ଶ୍ରୀ ଚୌହାନ ସବୁଠାରୁ ଗୁରୁତ୍ୱପୂର୍ଣ୍ଣ ବିଷୟ ଉପରେ ଗୁରୁତ୍ୱାରୋପ କରିଥିଲେ ଯେ, ରାସାୟନିକ ସାର, ବିଶେଷ କରି ଅସନ୍ତୁଳିତ ସାରର ବ୍ୟବହାରକୁ ସର୍ବନିମ୍ନ କରିବା ଏହି ଅଭିଯାନର ମୁଖ୍ୟ ଉଦ୍ଦେଶ୍ୟ ହେବ । ଏହାର ଲକ୍ଷ୍ୟ ହେଉଛି ମୃତିକା ପରୀକ୍ଷଣ ଆଧାରିତ, ସନ୍ତୁଳିତ ଏବଂ ସଠିକ୍ ପରିମାଣର ସାର ଏବଂ ଅନ୍ୟାନ୍ୟ କୃଷି ଉପକରଣର ବ୍ୟବହାର ବିଷୟରେ କୃଷକମାନଙ୍କୁ ସଚେତନ କରିବା, ସବୁଜ ସାର, ଜୈବିକ ଏବଂ ଜୈବ ଉତ୍ପାଦଗୁଡ଼ିକର ବ୍ୟବହାର ବୃଦ୍ଧି କରିବା ଏବଂ ସମନ୍ୱିତ ପୋଷକ ତତ୍ୱ ପରିଚାଳନାର ପ୍ରଦର୍ଶନ ଆୟୋଜନ କରିବା ।
ବୈଠକ ପରେ ଗଣମାଧ୍ୟମ ସହ କଥାବାର୍ତା କରି କୃଷି ମନ୍ତ୍ରୀ କହିଛନ୍ତି ଯେ, ଆଗାମୀ ସମୟକୁ ନେଇ ଉଠୁଥିବା ପାଣିପାଗ ଚିନ୍ତାକୁ ଦୃଷ୍ଟିରେ ରଖି କୃଷକମାନଙ୍କୁ କ'ଣ କରିବେ, କ'ଣ କରିବେ ନାହିଁ, କେଉଁ ଫସଲ ନେବେ, କେଉଁଠି ଫସଲ ବିବିଧକରଣ ଗ୍ରହଣ କରିବେ ଏବଂ କମ୍ ପାଣି କିମ୍ବା ବିପଦ କ୍ଷେତ୍ରରେ କେଉଁ ବିକଳ୍ପ ଭଲ ହେବ ସେ ବିଷୟରେ ବ୍ୟବହାରିକ ପରାମର୍ଶ ଦିଆଯିବ । ଏହି ଅଭିଯାନର ଉଦ୍ଦେଶ୍ୟ କେବଳ ଏକ ବାର୍ତା ଦେବା ନୁହେଁ, ବରଂ କୃଷି ସ୍ତରରେ କୃଷକମାନଙ୍କୁ ପରିସ୍ଥିତି-ବିଶେଷ ପରାମର୍ଶ ଦେବା ହେବ ।
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ
