ଚମ୍ପୁଆ, 02 ଜୁନ୍ (ହି.ସ.) ଚମ୍ପୁଆ ଉପଖଣ୍ଡସ୍ଥ ଯୋଡା ବ୍ଲକ୍ ଅନ୍ତର୍ଗତ ବଡ କାଳୀମାଟି ଗ୍ରାମ ପଞ୍ଚାୟତର ପୁରୁଣାଡ଼ିହି ଗ୍ରାମକୁ ମେଗା ପାନୀୟ ଜଳ ପ୍ରକଳ୍ପରୁ ଜଳ ଯୋଗାଣ ହେଉ ନାହିଁ । ଗତ ଦୁଇ ବର୍ଷ ହେବ ଉକ୍ତ ଗ୍ରାମରେ ପାଇପ ଲାଇନ୍ ଓ ଷ୍ଟାଣ୍ଡ ପୋଷ୍ଟ ଲଗା ଯାଇଛି । ମାତ୍ର ବିଭାଗୀୟ ଅବହେଳା ଯୋଗୁଁ ଗ୍ରାମବାସୀମାନେ ପାନୀୟ ଜଳରୁ ବଞ୍ଚିତ ହେଉଛନ୍ତି । ଗ୍ରାମ ବାସୀ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଗ୍ରାମାଞ୍ଚଳକୁ ଜଳ ନିମନ୍ତେ ବେଲଦା ସ୍ଥିତ ବୈତରଣୀ ନଦୀ ନିକଟରେ ଓଡ଼ିଶା ସରକାରଙ୍କ ପକ୍ଷରୁ ଡି ଏମ ଏଫ୍ ଅନୁଦାନରେ ଏକ ମେଗା ପ୍ରକଳ୍ପ କରାଯାଇଛି । ଘର କୁ ଘର ବିଶୁଦ୍ଧ ପାନୀୟ ଜଳ ଯୋଗାଣ କରିବା ପାଇଁ ପାଇପ ଲାଇନ୍ ସଂଯୋଗ କରାଯିବା ସହିତ ଷ୍ଟାଣ୍ଡ ପୋଷ୍ଟ ମଧ୍ୟ ଘରେ ଘରେ ଲଗା ଯାଇଛି । ହେଲେ ଏପର୍ଯ୍ୟନ୍ତ ଜଳ ଯୋଗାଣ ହୋଇ ପାରି ନାହିଁ । ଗ୍ରାମ ବାସୀ ମାନେ ଦୀର୍ଘ ବର୍ଷରୁ ନିର୍ଭର କରି ଆସୁଥିବା କିଛି ନଳକୂପ ଗୁଡ଼ିକର ପାଣି ପିଇବା ଅନୁପଯୋଗୀ ହୋଇଛି । ବାଧ୍ୟ ହୋଇ ଗ୍ରାମ ବାସୀ ମାନେ ଗ୍ରାମ ନିକଟରେ ବୋହି ଯାଇଥିବା କଟୁପାଲି ନାଳ ପାଣି ଉପରେ ଭରସା କରୁଛନ୍ତି । ଏ ନେଇ ଗ୍ରାମାଞ୍ଚଳ ଜଳ ଯୋଗାଣ ସଂସ୍ଥା ନିକଟରେ ବାରମ୍ବାର ଜଣାଇଲେ ମଧ୍ୟ କୌଣସି ପଦକ୍ଷେପ ନିଆ ଯାଉ ନାହିଁ । ବିଶୁଦ୍ଧ ପାନୀୟ ଜଳ ଯୋଗାଇ ଦେବା ପାଇଁ ସରକାର କୋଟି କୋଟି ଟଙ୍କା ର ପ୍ରକଳ୍ପ ନିର୍ମାଣ କରୁଛନ୍ତି ମାତ୍ର ଜିଲ୍ଲା ପ୍ରଶାସନ ଓ ବିଭାଗୀୟ ଅଧିକାରୀ ମାନଙ୍କର ଖାମଖିଆଲ ମନ ଭାବ ଯୋଗୁଁ ଗ୍ରାମାଞ୍ଚଳରେ ଏବେ ବି ପାନୀୟ ଜଳ ସଙ୍କଟ ଲାଗି ରହିଛି ।ଆଦିବାସୀ ଅଧ୍ୟୁଷିତ ଉକ୍ତ ଗ୍ରାମରେ ପାତ୍ର ସାହି, ମୁଣ୍ଡା ସାହି, ଗୋପାଳ ସାହି ଓ ନାଏକ ସାହିରେ ପ୍ରାୟ ଏକ ହଜାରରୁ ଉର୍ଦ୍ଧ୍ବ ଲୋକ ବସବାସ କରୁଛନ୍ତି । ଗ୍ରାମ ବାସୀ ମାନେ ସମସ୍ତେ ଖଟିଖିଆ, ଦିନ ମଜୁରିଆ, ଶ୍ରମିକ ଭାବେ କାମ କରନ୍ତି । ପାନୀୟ ଜଳ ଯୋଗାଣ ହେଉ ନ ଥିବାରୁ ଗ୍ରାମବାସୀ ମାନେ ବାଧ୍ୟ ହୋଇ ନାଳରୁ ଦୂଷିତ ଜଳ ବ୍ୟବହାର କରିବା ଅତ୍ୟନ୍ତ ଚିନ୍ତା ଜନକ ବିଷୟ ବୋଲି ସ୍ଥାନୀୟ ବୁଦ୍ଧିଜୀବୀ ମାନେ ମତ ଦେଇଛନ୍ତି । ତେବେ ଦେଖିବାକୁ ବାକି ରହିଲା କେଉଁଦିନ ଉକ୍ତ ଗ୍ରାମରେ ବିଶୁଦ୍ଧ ପାଣିର ଶୁଭାରମ୍ଭ ହେଉଛି।

---------------

ହିନ୍ଦୁସ୍ଥାନ ସମାଚାର / Trinath Mahanta