କୋଲକାତା, ୨୦ ଜୁନ୍ (ହି.ସ.)- ପୂର୍ବତନ ତୃଣମୂଳ କଂଗ୍ରେସ ବିଧାୟକ ଜାହାଙ୍ଗୀର ଖାନଙ୍କ ପତ୍ନୀ ରେଜିନା ବିବିଙ୍କୁ ଶନିବାର ସକାଳେ ପଶ୍ଚିମବଙ୍ଗର ଦକ୍ଷିଣ ୨୪ ପ୍ରଗଣା ଜିଲ୍ଲାର ଫଲତା ଅଂଚଳରେ ପୋଲିସ ଗିରଫ କରିଛି । ଗତ କିଛି ଦିନ ହେବ ରେଜିନା ବିବି ଫେରାର୍ ଥିଲେ । ସେ ତାଙ୍କ ସ୍ୱାମୀଙ୍କୁ ପୋଲିସ ଷ୍ଟେସନରୁ ମୁକ୍ତ କରିବା ପାଇଁ ଷଡ଼ଯନ୍ତ୍ରର ନେତୃତ୍ୱ ନେଇଥିଲେ ଏବଂ ଫଲତା ଥାନା ଘେରାଉ କରି ପୋଲିସ ଉପରେ ଆକ୍ରମଣ କରିବାକୁ ଚେଷ୍ଟା କରିଥିଲେ ବୋଲି ଅଭିଯୋଗ ହୋଇଛି ।

ପୋଲିସ ରେଜିନା ବିବିଙ୍କ ବିରୋଧରେ ଅସ୍ତ୍ରଶସ୍ତ୍ର ଅଧିନିୟମ ଏବଂ ବିସ୍ଫୋରକ ଅଧିନିୟମ ସମେତ ଅନେକ ଗୁରୁତର ଧାରା ଅଧୀନରେ ମାମଲା ରୁଜୁ କରିଛି । ପୋଲିସର କହିବା ଅନୁଯାୟୀ, ସମଗ୍ର ଘଟଣାଟି ପୂର୍ବ-ଯୋଜନାବଦ୍ଧ ଥିଲା ଏବଂ ଏଥିରେ ରେଜିନା ବିବିଙ୍କ ଭୂମିକା ପ୍ରମୁଖ ଥିଲା ।

ଜାହାଙ୍ଗୀର ଖାନ ୨୦୨୬ ବିଧାନସଭା ନିର୍ବାଚନରେ ଫଲତା ବିଧାନସଭା ଆସନରୁ ଟିଏମସି ପ୍ରାର୍ଥୀ ଥିଲେ । ନିର୍ବାଚନ ପ୍ରଚାର ସମୟରେ ସେ ନିଜକୁ 'ପୁଷ୍ପା' ବୋଲି ବର୍ଣ୍ଣନା କରିଥିଲେ ଏବଂ ଦାବି କରିଥିଲେ ଯେ ସେ କୌଣସି ପରିସ୍ଥିତିରେ ମୁଣ୍ଡ ନୁଆଁଇବେ ନାହିଁ । ତେବେ ବିଧାନସଭା ନିର୍ବାଚନରେ ସମଗ୍ର ରାଜ୍ୟରେ ତୃଣମୂଳ କଂଗ୍ରେସ ବିପୁଳ ପରାଜୟର ସମ୍ମୁଖୀନ ହୋଇଥିଲା । ଫଲତା ଆସନରେ ପୁନର୍ବାର ନିର୍ବାଚନ ଘୋଷଣା ହେବା ପରେ ଜାହାଙ୍ଗୀର ଖାନ ନିର୍ବାଚନ ପ୍ରତିଦ୍ୱନ୍ଦ୍ୱିତାରୁ ଓହରି ଯାଇଥିଲେ । ପରେ, ଏହି ଆସନରେ ଭାରତୀୟ ଜନତା ପାର୍ଟିର ଜଣେ ପ୍ରାର୍ଥୀ ବିପୁଳ ବ୍ୟବଧାନରେ ବିଜୟୀ ହୋଇଥିବା ବେଳେ ଜାହାଙ୍ଗୀର ଚତୁର୍ଥ ସ୍ଥାନରେ ରହିଥିଲେ ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ