ତୁତିକୋରିନ, ଜୁନ ୨୦ (ହି.ସ.) - ତାମିଲନାଡୁର ମତ୍ସ୍ୟ ମନ୍ତ୍ରୀ ଶ୍ରୀନାଥ ଶନିବାର ଦିନ ଓମାନରେ ଏକ ଜାହାଜରେ ମୃତ୍ୟୁବରଣ କରିଥିବା ତୁତିକୋରିନର ନାବିକ ନିଶାନ୍ତଙ୍କ ପରିବାରକୁ ଭେଟି ସାନ୍ତ୍ୱନା ଦେଇଛନ୍ତି। ମନ୍ତ୍ରୀ ଶୋକସନ୍ତପ୍ତ ପରିବାରକୁ ଆଶ୍ୱାସନା ଦେଇଛନ୍ତି ଯେ ମୃତକଙ୍କ ଶବକୁ ଯଥାଶୀଘ୍ର ଭାରତ ଆଣିବା ପାଇଁ ରାଜ୍ୟ ସରକାର ସମସ୍ତ ସମ୍ଭାବ୍ୟ ପ୍ରୟାସ କରୁଛନ୍ତି ଏବଂ ପରିବାରର ଦାବିକୁ ମଧ୍ୟ ଗମ୍ଭୀରତାର ସହ ବିଚାର କରାଯିବ।
ତୁତିକୋରିନର ବାସିନ୍ଦା ନାବିକ ନିଶାନ୍ତ ଓମାନରେ ଏକ ଜାହାଜରେ ଡ୍ୟୁଟି କରୁଥିବାବେଳେ ତାଙ୍କ ସ୍ୱାସ୍ଥ୍ୟ ଖରାପ ହେବା ପରେ ଜୁନ ୧୧ ରେ ମୃତ୍ୟୁବରଣ କରିଥିଲେ। ମୃତ୍ୟୁ ପରେ ସ୍ଥାନୀୟ ଭାବରେ ପୋଷ୍ଟମର୍ଟମ ପ୍ରକ୍ରିୟା ସମାପ୍ତ ହୋଇଥିଲା ଏବଂ ତାଙ୍କ ମୃତଦେହ ବର୍ତମାନ ଓମାନର ରାଜଧାନୀ ମସ୍କଟରେ ରଖାଯାଇଛି। ଘଟଣା ପରଠାରୁ ପରିବାର ଲଗାତାର ମୃତଦେହକୁ ଭାରତକୁ ଆଣିବା ଏବଂ ମାମଲାର ନିରପେକ୍ଷ ତଦନ୍ତ ଦାବି କରିଆସୁଛନ୍ତି।
ନିଶାନ୍ତଙ୍କ ପତ୍ନୀ ସରୋବିନ୍ ଏବଂ ପରିବାରର ଅନ୍ୟ ସଦସ୍ୟମାନେ ଅଭିଯୋଗ କରିଛନ୍ତି ଯେ ଏହି ଘଟଣାରେ ଅବହେଳା ସନ୍ଦେହ କରାଯାଉଛି ଏବଂ ତାଙ୍କ ମୃତ୍ୟୁର ପରିସ୍ଥିତିର ବିସ୍ତୃତ ତଦନ୍ତ କରାଯିବା ଉଚିତ। ପରିବାର ଦାବି କରିଛନ୍ତି ଯେ ସମ୍ପୃକ୍ତ ସିପିଂ କମ୍ପାନୀର ଭୂମିକାର ତଦନ୍ତ କରାଯାଉ ଏବଂ ଯଦି ଅବହେଳା ପ୍ରମାଣିତ ହୁଏ ତେବେ କମ୍ପାନୀ ଦ୍ୱାରା ଏକ କୋଟି ଟଙ୍କା କ୍ଷତିପୂରଣ ପ୍ରଦାନ କରାଯାଉ। ଏହା ବ୍ୟତୀତ ମୃତଦେହକୁ ଯଥାଶୀଘ୍ର ନିଜ ସହରକୁ ପଠାଇବା ପାଇଁ ସେ କେନ୍ଦ୍ର ଏବଂ ରାଜ୍ୟ ସରକାରଙ୍କ ହସ୍ତକ୍ଷେପ ଲୋଡିଛନ୍ତି।
ପରିବାର ସଦସ୍ୟଙ୍କ ମଧ୍ୟରୁ ଜଣକୁ ତାମିଲନାଡ଼ୁ ସରକାରରେ ଚାକିରି ଦେବାକୁ ମଧ୍ୟ ପରିବାର ଅନୁରୋଧ କରିଛି ଯାହା ଦ୍ୱାରା ପରିବାରକୁ ଆର୍ôଥକ ସହାୟତା ମିଳିପାରିବ। ନିଶାନ୍ତ ତାଙ୍କ ପରିବାରର ମୁଖ୍ୟ ରୋଜଗାରକ୍ଷମ ସଦସ୍ୟ ଥିଲେ ଏବଂ ତାଙ୍କ ମୃତ୍ୟୁ ପରେ ପରିବାର ଏକ ଗଭୀର ଆର୍ôଥକ ଏବଂ ମାନସିକ ସଙ୍କଟ ଦେଇ ଗତି କରୁଛି।
ଶନିବାର ଦିନ ମନ୍ତ୍ରୀ ଶ୍ରୀନାଥ ନିଶାନ୍ତଙ୍କ ଘରକୁ ଯାଇଥିଲେ ଏବଂ ତାଙ୍କ ପତ୍ନୀ ସରୋବିନ୍ ଏବଂ ପରିବାରର ଅନ୍ୟ ସଦସ୍ୟମାନଙ୍କୁ ଭେଟିଥିଲେ। ତାଙ୍କ ପରିବାର ପ୍ରତି ସମବେଦନା ଜଣାଇ ସେ କହିଥିଲେ ଯେ ଏହି କଠିନ ସମୟରେ ତାମିଲନାଡ଼ୁ ସରକାର ସେମାନଙ୍କ ସହିତ ଠିଆ ହୋଇଛନ୍ତି ଏବଂ ଆବଶ୍ୟକ ସହାୟତା ପ୍ରଦାନ କରିବେ।
ହିନ୍ଦୁସ୍ଥାନ ସମାଚାର / ଭାନୁ ଚରଣ
23 Jun 2026