ଜୟପୁର, 22 ଜୁଲାଇ (ହି.ସ.) କୋରାପୁଟ ଜିଲାରେ ପ୍ରକୃତିର ଅନନ୍ୟ ଆକର୍ଷଣ, ଅପରୁପ ସୌନ୍ଦର୍ଯ୍ୟର ଅଧିକାରୀ, ଲାଲ ଟୁକୁଟୁକୁ ସାଧବବୋହୁ ଭାବେ ସର୍ବତ୍ର ପରିଚିତ ଥିବା ପାଟପୋକ ଆଉ ଆଗଭଳି ଗାଁଗହଳିର ଘାସ ଗାଲିଚାରେ ଧୀରେ ଧୀରେ ଚାଲିବାର ଦେଖିବାକୁ ମିଳୁନାହିଁ । ବର୍ଷାମାଟିକୁ ସ୍ପର୍ଶ କରିବା ପରେ ଧରଣୀରାଣୀର କୋଳରୁ ଏହି ପାଟପୋକ ଜନ୍ମ ନେଇଥାନ୍ତି ଓ ବର୍ଷାଭିଜା ନରମ ମାଟିକୁ ଫଟାଇ ତାରି ଭିତରୁ ପଦାକୁ ଆସି ଧୀରେ ଧୀରେ ଚାଲୁଥିବା ଏହି ପାଟପୋକଙ୍କ ସୌନ୍ଦର୍ଯ୍ୟ ଦେଖିଲେ ଲାଗେ ସତେ ଯେମିତି ପ୍ରକୃତିରାଣୀ ତାର ସମସ୍ତ ଗାଢ ରଙ୍ଗକୁ ଏହି ଛୋଟିଆ କୀଟ ଉପରେ ଢାଳିଦେଇଛି ଓ ଉର୍ବର ଜମିରେ ପ୍ରଥମ ବର୍ଷା ପାଣି ପଡିଲେ ଏହି ପାଟପୋକ ଜନ୍ମ ନେଇଥାନ୍ତି । ମାଟି ଭିତରେ ବର୍ଷାଜଳ ପହଞ୍ଚି ଅନୁକୂଳ ତାପମାତ୍ରା ପାଇଲେ ଏହି ପୋକର ଅଣ୍ଡାରୁ ଛୁଆ ଜନ୍ମ ହୋଇଥାଏ । ଏହାପରେ ମାଟିରୁ ଜନ୍ମ ନେଇଥାନ୍ତି ଏହି କ୍ଷୁଦ୍ର ତଥା ଅତି ସୁନ୍ଦର ପାଟପୋକ । ଅତୀତରେ ଗ୍ରାମାଞ୍ଚଳ ଠାରୁ ଆରମ୍ଭକରି ସହରାଞ୍ଚଳର ଚାଷଜମିରେ ଏହି ପାଟପୋକ ପ୍ରଚୁର ମାତ୍ରାରେ ଦେଖିବାକୁ ମିଳୁଥିଲା । ଛୋଟ ଛୋଟ ପିଲାମାନେ ଏହି ପାଟପୋକକୁ ହାତରେ ଧରି ଆଦର କରିବା ସହ ବେଶ ମଜା ନେଉଥିଲା ବେଳେ ଏହି ପୋକ ଜମିରୁ ପଦାକୁ ବାହାରିଲା ମାତ୍ରେ ଚାଷୀ ସମାଜ ବି ସେମାନଙ୍କ ଜମି ବେଶ ଉର୍ବ ର ଅଛି ବୋଲି ନିଶ୍ଚିତ ହୋଇଯାଉ ଥିଲା । କିନ୍ତୁ ବିଗତ କିଛି ବର୍ଷ ହେଲା ଏହି ପାଟପୋକ ପ୍ରାୟତଃ ଆଉ ଦେଖିବାକୁ ମିଳୁନାହିଁ । ବିଶ୍ୱ ତାପାୟନ ସାଙ୍ଗକୁ ଅଧିକକାଂଶ ଚାଷଜମିରେ

ମାତ୍ରାଧିକ ରାସାୟନିକ ସାର ଓ କୀଟନାଶକ ପ୍ରୟୋଗ ଯୋଗୁଁ ମାଟିର ଉର୍ବରତା ହ୍ରାସ ପାଉଥିବା ଯୋଗୁଁ ଆଉ ପାଟପୋକ ଜନ୍ମ ହେଉନଥିବା ବିଭିନ୍ନ ମହଲରେ ଚର୍ଚ୍ଚା ହେଉଛି । ଏହି ପାଟପୋକ ବର୍ଷକୁ ଥରେ ମାତ୍ର ଅଣ୍ଡା ଦେଇଥାନ୍ତି ଓ ଯଦି ଅନୁକୂଳ ପାଗ ସୃଷ୍ଟି ନହୁଏ ତେବେ ଜମିରେ ହିଁ ଏହା ନଷ୍ଟ ହୋଇଯାଇଥାଏ । ଜୈବବିବିଧତା ରକ୍ଷା ଦିଗରେ ପଦକ୍ଷେପ ନିଆନଗଲେ

ଆଗାମୀ କିଛି ବର୍ଷ ପରେ ଏହି ପାଟପୋକ ଇତିହାସ ପାଲଟିଯିବା ସମ୍ଭାବନାକୁ ଏଡାଇ ହେବ ନାହିଁ ବୋଲି ମତ ପ୍ରକାଶ ପାଉଛି । ଲାଲ ଟୁକୁଟୁକୁ ସାଧବବୋହୁର ନାଁ ଶୁଣିଲେ ମନରେ ଆନନ୍ଦ ଆସିଯାଇଥାଏ । ପାଟପୋକ ଛୋଟିଆ କୀଟଟିଏ ହୋଇଥିଲେ ବି ଏହାର ଅପୂର୍ବ ସୌନ୍ଦର୍ଯ୍ୟରେ ପିଲାଠୁ

ଆରମ୍ଭ କରି ବୟସ୍କଙ୍କ ପର୍ଯ୍ୟନ୍ତ ବିମୋହିତ ହୋଇ ପଡି ଥାନ୍ତି ।ପ୍ରକୃତିରାଣୀର ସୌନ୍ଦର୍ଯ୍ୟମୟ ସୃଷ୍ଟି ପାଟପୋକ ସାଂପ୍ରତିକ ପରିସ୍ଥିତିରେ ବିଲୁପ୍ତର ଦ୍ୱାରଦେଶରେ ପହଞ୍ଚିସାରିଛି । ସାଂପ୍ରତିକ ପରିସ୍ଥିତିରେ ପ୍ରଦୂଷିତ ପରିବେଶ ରେ ଏହି ପାଟପୋକର ବଂଶ ଲୋପ ପାଇବାକୁ ବସିଥିବା ବେଳେ ଆଧୁନିକତାର ଚାଦର ତଳେ ଚାପି ହୋଇଗଲାଣି ଏହି ସୁନ୍ଦର ଜୀବ । ଆଉ ପୂର୍ବ ପରି ସବୁଜ ଗାଲିଚାରେ ପାଟପୋକ ଧୀରେ ଧୀରେ ବୁଲାବୁଲି କରୁଥିବାର ଆଉ ଦେଖିବାକୁ ମିଳୁନାହିଁ । ଲାଲ ଟୁକୁ ଟୁକୁ ସାଧବବୋହୁ ଏବି ନାଁଟି ଶୁଣିଲେ ଆଖି ଆଗରେ ନାଚି ଉଠିଥାଏ ସେହି ଭାରି ସୁନ୍ଦରିଆ ପୋକଟିଏ । ଭେଲବେଟ ଭଳି ଭାରି କୋମଳ । ବିଷେଶ କରି

ବର୍ଷା ଦିନରେ ଚାଷଜମି, ଖୋଲଓ ପଡିଆ, ବିଲହୁଡାରେ ଏହି ସୁନ୍ଦରିଆ ଛୋଟିଆ ପାଟପୋକ ବା ସାଧବବୋହୁ ମାନଙ୍କୁ ଦେଖିବାକୁ ମିଳିଥାଏ । ବର୍ଷର ଅଧିକାଂଶ ସମୟ ଏହି ସୁନ୍ଦରିଆ ଜୀବ ପାଟପୋକ ମାଟି ତଳେ ରୁହନ୍ତି ଓ ବର୍ଷା ହେଲେ ବାହାରକୁ ଆସି ଖାଦ୍ୟ ଖୋଜିଥାନ୍ତି ଓ ପ୍ରଜନନ ମଧ୍ୟ କରିଥାନ୍ତି । ବର୍ଷକୁ ଥରେ ମାତ୍ର ଅଣ୍ଡା ଦେଇ ବଂଶ ବିସ୍ତାର କରିଥାନ୍ତି ଓ ତେବେ କୃଷିକାର୍ଯ୍ୟରେ ରାସାୟନିକ ସାରର ଅତ୍ୟଧିକ ବ୍ୟବହାର ଯୋଗୁଁ

ଏହି ସୁନ୍ଦରିଆ ଜୀବର ସଂଖ୍ୟା ଦିନକୁ ଦିନ ହ୍ରାସ ପାଇବାରେ ଲାଗିଛି । ଆଗାମୀ କିଛି ବର୍ଷ ପରେ ଆମର ପରବର୍ତ୍ତୀ ପିଢୀ ପାଇଁ ଏହି ସୁନ୍ଦର ପାଟପୋକ ବିଷୟରେ ଜାଣିବା କେବଳ ପାଠ୍ୟପୁସ୍ତକରେ ସୀମିତ ରହିଯିବ ବୋଲି ବିଭିନ୍ନ ମହଲରେ ମତ ପ୍ରକାଶ ପାଉଥିବା ଦେଖିବାକୁ ମିଳୁଛି ।

---------------

ହିନ୍ଦୁସ୍ଥାନ ସମାଚାର / ପିକେପି