କାଠମାଣ୍ଡୁ, ୨୬ ଜୁଲାଇ (ହି.ସ.)- ନେପାଳର ମୁଖ୍ୟ ବିରୋଧୀ ଦଳ ନେପାଳୀ କଂଗ୍ରେସ ଅଧ୍ୟକ୍ଷ ଗଗନ ଥାପାଙ୍କ ଭାରତ ଗସ୍ତକୁ ସ୍ଥଗିତ ରଖାଯାଇଛି । ଶନିବାର ଦିନ ହିଁ ସେ ଭାରତ ଅଭିମୁଖେ ଯାତ୍ରା କରିବାର ଥିଲା, ଯାହାକୁ ପରେ ରବିବାରକୁ ଘୁଂଚାଇ ଦିଆଯାଇଥିଲା । ତେବେ ରବିବାର ମଧ୍ୟ ସେ ଭାରତ ଯାଉନାହାନ୍ତି ।
ନୂଆଦିଲ୍ଲୀରେ ଦଳର ଜନସମ୍ପର୍କ କମିଟିର ଏକ ସମ୍ମିଳନୀ ଅନୁଷ୍ଠିତ ହୋଇଛି, ଯେଉଁଥିରେ ଥାପାଙ୍କୁ ମୁଖ୍ୟ ଅତିଥି ଭାବେ ନିମନ୍ତ୍ରଣ କରାଯାଇଥିଲା । ଥାପା ମଧ୍ୟ ଏହି କାର୍ଯ୍ୟକ୍ରମରେ ଯୋଗଦେବାକୁ ପ୍ରସ୍ତୁତ ଥିଲେ କିନ୍ତୁ ଶେଷ ମୁହୂର୍ତରେ ଭାରତ ନ ଯିବାକୁ ନିଷ୍ପତି ନେଇଥିଲେ ।
ଗ୍ରେସ୍ ମୁଖପାତ୍ର ଦେବରାଜ ଚାଲିସେ ସୂଚନା ଦେଇଛନ୍ତି ଯେ, ଅଧ୍ୟକ୍ଷ ଥାପାଙ୍କ ଭାରତ ଗସ୍ତ ବାତିଲ କରାଯାଇଛି । ତେବେ ଗସ୍ତ ବାତିଲ୍ ହେବାର କୌଣସି ନିର୍ଦ୍ଦିଷ୍ଟ କାରଣ ସେ ଦେଇନାହାଁନ୍ତି । କେବଳ ଆଭ୍ୟନ୍ତରୀଣ ଏବଂ ବୈଷୟିକ କାରଣରୁ ଦଳର ଅଧ୍ୟକ୍ଷ ତାଙ୍କ ଭାରତ ଗସ୍ତକୁ ସ୍ଥଗିତ ରଖିଛନ୍ତି ବୋଲି ଚାଲିସେ କହିଛନ୍ତି । ସେ ଏହା ମଧ୍ୟ ସୂଚନା ଦେଇଛନ୍ତି ଯେ, ତାଙ୍କ ଭାରତ ଗସ୍ତ ପାଇଁ ଏକ ନୂତନ ତାରିଖ ଏପର୍ଯ୍ୟନ୍ତ ଚୂଡ଼ାନ୍ତ ହୋଇନାହିଁ ।
ଗସ୍ତ ସ୍ଥଗିତ ରଖିବାର ଆନୁଷ୍ଠାନିକ କାରଣ କଂଗ୍ରେସ ଦ୍ୱାରା ପ୍ରକାଶ କରାଯାଇ ନଥିବାବେଳେ, ସୂତ୍ରରୁ ପ୍ରକାଶ ଯେ ଦଳର ଅନ୍ତର୍ଦ୍ୱନ୍ଦ୍ୱ ହେଉଛି ମୁଖ୍ୟ କାରଣ । ଗଗନ ଥାପା ସ୍ୱତନ୍ତ୍ର ଅଧିବେଶନର ଅଧ୍ୟକ୍ଷ ଭାବେ ନିର୍ବାଚିତ ହେବା ପରଠାରୁ ପ୍ରତିଷ୍ଠା ପକ୍ଷ ଏବଂ ଭିନ୍ନମତାବଲମ୍ବୀ ଗୋଷ୍ଠୀ ମଧ୍ୟରେ ବିବାଦ ତୀବ୍ର ହୋଇଛି । ଏହି ସମୟରେ, ଦଳର ସରକାରୀ ସ୍ଥିତିକୁ ନେଇ ଅସନ୍ତୁଷ୍ଟ ହୋଇ ଦଳ ସୁପ୍ରିମକୋର୍ଟରେ ଏକ ସମୀକ୍ଷା ପିଟିସନ୍ ଦାଖଲ କରିଛି, ଯାହାର ଶୁଣାଣି ସୋମବାର ହେବ ।
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ
