ମାଲକାନଗିରି , ୨୮ ଜୁଲାଇ (ହି.ସ.) ମାଲକାନଗିରି ଜିଲ୍ଲା କାଲିମେଳା ବ୍ଲକ୍ ଅନ୍ତର୍ଗତ ଏମ୍ଭି-୭୯ ଅଂଚଳରେ ଦୀର୍ଘଦିନ ଧରି ଲାଗିରହିଥିବା ଡ୍ରେନେଜ୍ ଓ ପରିଷ୍କାର-ପରିଚ୍ଛନ୍ନତା ସମସ୍ୟା ଏବେ ସ୍ଥାନୀୟ ଲୋକଙ୍କ ପାଇଁ ମୁଣ୍ଡବ୍ୟଥାର କାରଣ ପାଲଟିଛି। ସାମାନ୍ୟ ବର୍ଷା ହେଲେ ମଧ୍ୟ ଅଂଚଳର ମୁଖ୍ୟ ରାସ୍ତା ସମେତ ବିଭିନ୍ନ ସ୍ଥାନରେ ଦୀର୍ଘ ସମୟ ଧରି ବର୍ଷାଜଳ ଜମି ରହୁଥିବାରୁ ଲୋକଙ୍କ ଯାତାୟାତ ଗୁରୁତର ଭାବେ ପ୍ରଭାବିତ ହେଉଛି। ଏହାକୁ ନେଇ ଅଂଚଳବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେବା ସହ ତୁରନ୍ତ ସମସ୍ୟାର ସମାଧାନ ଦାବି ଜୋର ଧରିଛି।

ସ୍ଥାନୀୟ ଲୋକଙ୍କ ଅଭିଯୋଗ ଅନୁଯାୟୀ, ଏମ୍ଭି-୭୯ ଅଂଚଳରେ ଥିବା ଡ୍ରେନଟି ଦୀର୍ଘ ସମୟ ଧରି ସଫା କରାଯାଉନଥିବାରୁ ସେଥିରେ ମାଟି, ଆବର୍ଜନା ଓ ଅନ୍ୟାନ୍ୟ ଅପରିଷ୍କାର ସାମଗ୍ରୀ ଜମି ରହିଛି। ଫଳରେ ବର୍ଷା ସମୟରେ ପାଣି ସ୍ୱାଭାବିକ ଭାବେ ନିଷ୍କାସିତ ହୋଇପାରୁନାହିଁ। ଅନେକ ସ୍ଥାନରେ ନାଳନର୍ଦ୍ଦମା ଜବରଦଖଲ ହେବା ଓ ଅବ୍ୟବସ୍ଥିତ ଭାବେ ନିର୍ମାଣ କାର୍ଯ୍ୟ ହୋଇଥିବାରୁ ଜଳ ନିଷ୍କାସନ ବ୍ୟବସ୍ଥା ଅଧିକ ବାଧାପ୍ରାପ୍ତ ହେଉଥିବା ମଧ୍ୟ ଅଭିଯୋଗ ହୋଇଛି।

ବର୍ଷା ହେବା ପରେ ରାସ୍ତା ଉପରେ ପାଣି ଜମି ରହିବା ସହ ଘର, ଦୋକାନ ଓ ବିଭିନ୍ନ ପ୍ରତିଷ୍ଠାନ ସମ୍ମୁଖରେ ମଧ୍ୟ ଜଳାବଦ୍ଧତା ସୃଷ୍ଟି ହେଉଛି। ଏହା ଯୋଗୁଁ ଲୋକମାନେ ରାସ୍ତାରେ ଯିବାଆସିବା ବେଳେ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି। ବର୍ଷାଜଳ ଜମି ରହିବା ଯୋଗୁଁ ରାସ୍ତାର ଅବସ୍ଥା ମଧ୍ୟ ଧୀରେ ଧୀରେ ଖରାପ ହେଉଥିବା ନେଇ ଅଂଚଳବାସୀ ଚିନ୍ତା ପ୍ରକଟ କରିଛନ୍ତି।

ଏମ୍ଭି-୭୯ ଅଂଚଳରେ ଏସବିଆଇ ବ୍ୟାଙ୍କ, ଓଡ଼ିଶା ଗ୍ରାମୀଣ ବ୍ୟାଙ୍କ ସମେତ ବିଭିନ୍ନ ସରକାରୀ ଓ ବେସରକାରୀ କାର୍ଯ୍ୟାଳୟ, ଦୋକାନ ବଜାର ଏବଂ ଶିକ୍ଷାନୁଷ୍ଠାନ ରହିଛି। ଏହି କାରଣରୁ ପ୍ରତିଦିନ ଶତାଧିକ ଲୋକ ଏହି ଅଂଚଳ ଦେଇ ଯାତାୟାତ କରୁଛନ୍ତି। ବିଶେଷକରି ବର୍ଷା ଦିନରେ ରାସ୍ତା ଉପରେ ପାଣି ଜମି ରହିବା ଯୋଗୁଁ ଛାତ୍ରଛାତ୍ରୀଙ୍କ ଯାତାୟାତ ବାଧାପ୍ରାପ୍ତ ହେବା ସହ ବ୍ୟବସାୟୀ ଓ ସାଧାରଣ ଲୋକେ ମଧ୍ୟ ନାନା ସମସ୍ୟା ଭୋଗୁଛନ୍ତି। ଏହି ନାଳ ର ପାଣି ରାସ୍ତା ସହ ଲୋକଙ୍କ ଘର ଭିତରେ ମଧ୍ୟ୍ୟ ପ୍ରବେଶ କରିଥିବାରୁ ଲୋକେ ନାନା ଅସୁବିଧା ର ସମ୍ମୁଖୀନ ହଉଛନ୍ତି । ଦୀର୍ଘ ୫ବର୍ଷ ଧରି ଲୋକେ ଏହି ଅସୁବିଧାର ସମ୍ମୁଖୀନ ହେଉଛନ୍ତି.....

ଅଂଚଳରେ ଜଳ ନିଷ୍କାସନ ବ୍ୟବସ୍ଥା ସୁଧାରିବା ପାଇଁ ଡ୍ରେନଗୁଡ଼ିକର ନିୟମିତ ସଫେଇ, ଅବରୋଧ ହୋଇଥିବା ନାଳନର୍ଦ୍ଦମାର ପୁନରୁଦ୍ଧାର ଏବଂ ଆବଶ୍ୟକ ସ୍ଥାନରେ ନୂତନ ଡ୍ରେନ୍ ସହ ବ୍ରିଜ ନିର୍ମାଣ କରିବାକୁ ସ୍ଥାନୀୟ ଲୋକେ ଦାବି କରିଛନ୍ତି। ଏଥିସହ ନାଳନର୍ଦ୍ଦମା ଜବରଦଖଲ ଓ ଅବ୍ୟବସ୍ଥିତ ନିର୍ମାଣ ଯୋଗୁଁ ଯଦି ଜଳ ନିଷ୍କାସନ ବାଧାପ୍ରାପ୍ତ ହେଉଥାଏ, ତେବେ ସମ୍ପୃକ୍ତ ବିଭାଗ ପକ୍ଷରୁ ଯାଂଚ କରାଯାଇ ଆବଶ୍ୟକ ପଦକ୍ଷେପ ନିଆଯିବାକୁ ମଧ୍ୟ ଦାବି ହୋଇଛି।

ଏହି ସମସ୍ୟାର ସ୍ଥାୟୀ ସମାଧାନ ନହେଲେ ଆଗାମୀ ଦିନରେ ବର୍ଷା ପରିମାଣ ବଢ଼ିଲେ ଜଳାବଦ୍ଧତା ଆହୁରି ଗୁରୁତର ହେବାର ଆଶଙ୍କା ରହିଛି। ତେଣୁ ସ୍ଥାନୀୟ ପ୍ରଶାସନ ଓ ସମ୍ପୃକ୍ତ ବିଭାଗ ତୁରନ୍ତ ଏମ୍ଭି-୭୯ ଅଂଚଳର ଡ୍ରେନେଜ୍ ବ୍ୟବସ୍ଥାର ସମୀକ୍ଷା କରି ଆବଶ୍ୟକ ପଦକ୍ଷେପ ନେବା ସହ ନିୟମିତ ସଫେଇ ଓ ଜଳ ନିଷ୍କାସନର ସୁବ୍ୟବସ୍ଥା କରିବାକୁ ଅଂଚଳବାସୀ ଦାବି କରିଛନ୍ତି।

---------------

ହିନ୍ଦୁସ୍ଥାନ ସମାଚାର / ଶିବବ୍ରତ