ନୂଆଦିଲ୍ଲୀ, ଜୁଲାଇ ୩ (ହି.ସ.) - ଭାରତୀୟ ଜନତା ପାର୍ଟି (ବିଜେପି) ସାଂସଦ ସୁଧାଂଶୁ ତ୍ରିବେଦୀ ବିରୋଧୀ ଦଳଗୁଡ଼ିକ ଦ୍ୱାରା ପ୍ରଧାନ ବିଚାରପତିଙ୍କୁ ଲେଖାଯାଇଥିବା ଚିଠି ଏବଂ ଭୋଟର ତାଲିକାର ସ୍ୱତନ୍ତ୍ର ଇଂଟେନସିଭ୍ ରିଭିଜନ୍ (ଏସ୍. ଆଇ. ଆର) ଉପରେ ଉଠାଯାଇଥିବା ପ୍ରଶ୍ନ ଉପରେ ତୀବ୍ର ଆକ୍ରମଣ କରିଛନ୍ତି। ଗଣତନ୍ତ୍ରକୁ ଦୁର୍ବଳ କରିବାର ପ୍ରୟାସ ବୋଲି ସେ ନିନ୍ଦା କରିଛନ୍ତି।
ଶୁକ୍ରବାର ଦିନ ବିଜେପି ମୁଖ୍ୟାଳୟରେ ଗଣମାଧ୍ୟମ ସହ କଥାବାର୍ତା କରି ସୁଧାଂଶୁ ତ୍ରିବେଦୀ କହିଛନ୍ତି ଯେ କିଛି ରାଜନୈତିକ ଦଳ ଘରୋଇ ଏବଂ ଜାତିଗତ ସମ୍ପତି ପରି ସେମାନଙ୍କ ଦଳ ଚଳାଉଛନ୍ତି ଏବଂ ଜନସାଧାରଣଙ୍କ ଭାବନା ପ୍ରତି ନିରନ୍ତର ଅବହେଳା ଏବଂ ଅସମ୍ମାନ ହେତୁ ବାରମ୍ବାର ଜନସାଧାରଣଙ୍କ ସମର୍ଥନ ହରାଉଛନ୍ତି।
ସୁଧାଂଶୁ ତ୍ରିବେଦୀ ଆଇନଗତ ପକ୍ଷକୁ ଦର୍ଶାଇ ଦାବି କରିଛନ୍ତି ଯେ ସ୍ୱତନ୍ତ୍ର ଇଂଟେନ୍ସିଭ୍ ରିଭ୍ୟୁ (ଏସ୍. ଆଇ. ଆର) ବିଭିନ୍ନ ଅଦାଲତ ଦ୍ୱାରା ସମ୍ପୂର୍ଣ୍ଣ ନ୍ୟାୟସଙ୍ଗତ ଏବଂ ବୈଧ ବୋଲି ଜଣାପଡିଛି। ସେ କହିଛନ୍ତି ଯେ ନିର୍ବାଚନ ଆୟୋଗ ଏବଂ ଭାରତ ସରକାର ସମୟ ସମୟରେ ଏହିପରି ଭୋଟର ତାଲିକା ସଂଶୋଧନ ଅଭିଯାନ ଚଳାଇଛନ୍ତି, ତେଣୁ ଏହାକୁ ଏକ ଅସାଧାରଣ କିମ୍ବା ବିବାଦୀୟ ପ୍ରକ୍ରିୟା ଭାବରେ ଉପସ୍ଥାପିତ କରିବା ଉଚିତ ନୁହେଁ।
ସେ କହିଥିଲେ ଯେ ସାମ୍ବିଧାନିକ ଭାବେ ବିରୋଧୀ ଦଳଗୁଡ଼ିକ ଥରେ ମଧ୍ୟ ଅଦାଲତରେ କୌଣସି ବାସ୍ତବ ପ୍ରସଙ୍ଗ ଉପସ୍ଥାପନ କରିବାରେ ବିଫଳ ହୋଇଛନ୍ତି ଏବଂ ସନ୍ଦିଗ୍ଧ ଭୋଟରଙ୍କ ବଳରେ ରାଜ୍ୟଗୁଡ଼ିକର କ୍ଷମତା ଦଖଲ କରିବାର ସ୍ୱପ୍ନ ଏବେ ଧୂଳିସାତ ହୋଇଛି।
କଂଗ୍ରେସ ଏବଂ ଅନ୍ୟ ବିରୋଧୀ ଦଳମାନଙ୍କୁ ପ୍ରଶ୍ନ କରି ସେ କହିଛନ୍ତି ଯେ ଯେଉଁ ଭାଷାରେ ସୁପ୍ରିମକୋର୍ଟଙ୍କୁ ଚିଠି ଲେଖାଯାଇଛି ତାହା ଜରୁରୀକାଳୀନ ପରିସ୍ଥିତିରେ ଦେଖାଯାଇଥିବା ଅହଙ୍କାରୀ ଭାଷା ପରି ଜଣାପଡୁଛି। କେରଳର ଜଣେ ବିଶିଷ୍ଟ କଂଗ୍ରେସ ନେତା ଶଶି ଥରୁର ଟିଭି କାର୍ଯ୍ୟକ୍ରମରେ କହିଛନ୍ତି ଯେ ଏସ୍. ଆଇ. ଆର ଦ୍ୱାରା କରାଯାଇଥିବା ମତଦାନ ସଂଶୋଧନ କଂଗ୍ରେସକୁ ଉପକୃତ କରିଛି।
ହିନ୍ଦୁସ୍ଥାନ ସମାଚାର / ଭାନୁ ଚରଣ