ଜାମ୍ମୁ, ଜୁଲାଇ 30 (ହି.ସ)। ଅମରନାଥ ଯାତ୍ରା ପାଇଁ ୧,୭୯୫ ଜଣ ତୀର୍ଥଯାତ୍ରୀ ଗୁରୁବାର ଭୋରୁ ଜମ୍ମୁରୁ ବାଲଟାଲ ଅଭିମୁଖେ ଯାତ୍ରା କରିଛନ୍ତି। ଏହି ସମୟରେ ବାଲଟାଲରୁ ୧,୯୪୩ ଜଣ ତୀର୍ଥଯାତ୍ରୀ ଜମ୍ମୁକୁ ଫେରିଛନ୍ତି। ଅଧିକାରୀମାନଙ୍କ ସୂଚନା ଅନୁସାରେ, କଡ଼ା ସୁରକ୍ଷା ବ୍ୟବସ୍ଥା ମଧ୍ୟରେ ୧,୭୯୫ ଜଣ ତୀର୍ଥଯାତ୍ରୀଙ୍କୁ ଭଗବତୀ ନଗର ଯାତ୍ରୀ ନିବାସରୁ ବାଲଟାଲ ବେସ୍ କ୍ୟାମ୍ପ ଅଭିମୁଖେ ପ୍ରସ୍ଥାନ କରାଯାଇଛି। ଆଜି ପହଲଗାମ ମାର୍ଗ ଦେଇ କୌଣସି ତୀର୍ଥଯାତ୍ରୀଙ୍କ ଯାତ୍ରା କାର୍ଯ୍ୟକ୍ରମ ନାହିଁ।

ଜମ୍ମୁର ମିଳିତ ପୁଲିସ ନିୟନ୍ତ୍ରଣ କକ୍ଷର ସୂଚନା ଅନୁଯାୟୀ, ୨୩ତମ ତୀର୍ଥଯାତ୍ରୀ ଦଳ ଭୋର ୨ଟା ୪୪ ମିନିଟରେ ୮୩ଟି ଗାଡ଼ିରେ ରବାନା ହୋଇଥିଲା। ଏଥିରେ ୪୧ଟି ବସ୍, ୧୧ଟି ମଧ୍ୟମ ମୋଟର ଯାନ, ୩୦ଟି ହାଲୁକା ମୋଟର ଯାନ ଏବଂ ଗୋଟିଏ ଦୁଇଚକିଆ ଯାନ ସାମିଲ ଥିଲା। ଏହି ଦଳରେ ୧,୪୦୬ ଜଣ ପୁରୁଷ ଓ ୩୮୯ ଜଣ ମହିଳା ତୀର୍ଥଯାତ୍ରୀ ଅଛନ୍ତି। ତୀର୍ଥଯାତ୍ରୀମାନଙ୍କ ସହ ଏସ୍କର୍ଟ ଗାଡ଼ି ଏବଂ ଏକ ଆମ୍ବୁଲାନ୍ସ ମଧ୍ୟ ଯାଉଛି।

ଅଧିକାରୀମାନଙ୍କ କହିବା ଅନୁଯାୟୀ, ଏହି ଦଳ ରବାନା ହେବା ସହିତ ବାର୍ଷିକ ଅମରନାଥ ଯାତ୍ରା ପାଇଁ ଜମ୍ମୁର ଭଗବତୀ ନଗର ବେସ୍ କ୍ୟାମ୍ପରୁ ଯାତ୍ରା କରିଥିବା ମୋଟ ତୀର୍ଥଯାତ୍ରୀଙ୍କ ସଂଖ୍ୟା ୧,୩୪,୨୦୧ରେ ପହଞ୍ଚିଛି। ଏପଟେ ୧,୯୪୩ ଜଣ ତୀର୍ଥଯାତ୍ରୀଙ୍କୁ ନେଇ ଫେରୁଥିବା ୨୨ତମ ଦଳ ଗୁରୁବାର ବାଲଟାଲ ବେସ୍ କ୍ୟାମ୍ପରୁ ଜମ୍ମୁ ଅଭିମୁଖେ ପ୍ରସ୍ଥାନ କରିଛି। ଏହି ଦଳରେ ୧,୪୧୩ ଜଣ ପୁରୁଷ ତୀର୍ଥଯାତ୍ରୀ, ୩୯୨ ଜଣ ମହିଳା ତୀର୍ଥଯାତ୍ରୀ, ୧୨ ଜଣ ଶିଶୁ, ୯୭ ଜଣ ସାଧୁ ଏବଂ ୨୯ ଜଣ ସାଧ୍ୱୀ ସାମିଲ ଅଛନ୍ତି। ପବିତ୍ର ଅମରନାଥ ଗୁମ୍ଫା ମନ୍ଦିରର ବାର୍ଷିକ ତୀର୍ଥଯାତ୍ରା ସୁଚାରୁରୂପେ ଚାଲିଛି। ଜମ୍ମୁ–ଶ୍ରୀନଗର ଜାତୀୟ ରାଜପଥ ଏବଂ ବାଲଟାଲ ମାର୍ଗରେ ସୁରକ୍ଷା ଓ ଟ୍ରାଫିକ ପରିଚାଳନା ପାଇଁ କଡ଼ା ବ୍ୟବସ୍ଥା କରାଯାଇଛି।

--------

ହିନ୍ଦୁସ୍ଥାନ ସମାଚାର / ସ୍ୱାଗତିକା