ନୂଆଦିଲ୍ଲୀ, ଜୁଲାଇ ୩୧ (ହି.ସ.) - ଭାରତୀୟ ରେଳବାଇ ପ୍ରଥମ ଥର ପାଇଁ ବନ୍ଦେ ଭାରତ ଏକ୍ସପ୍ରେସ୍ ମାଧ୍ୟମରେ ସୁରଟରୁ ଅହମ୍ମଦାବାଦ ପର୍ୟ୍ୟନ୍ତ ଏକ ଜୀବନ୍ତ ହୃଦୟକୁ ସୁରକ୍ଷିତ ଭାବରେ ପରିବହନ କରି ଏକ ନୂତନ ଇତିହାସ ସୃଷ୍ଟି କରିଛି। ଅହମ୍ମଦାବାଦର ୟୁ. ଏନ୍. ମେହେଟ୍ଟା ଇନଷ୍ଟିଚ୍ୟୁଟ୍ ଅଫ୍ କାର୍ଡିଓଲୋଜି ଆଣ୍ଡ ରିସର୍ଚ୍ଚ ସେଂଟରରେ ହୃଦୟ ପ୍ରତିରୋପଣ କରାଯିବ। ଟ୍ରେନ ନମ୍ବର ୨୦୯୦୧ ମୁମ୍ବାଇ ସେଂଟ୍ରାଲ-ଗାନ୍ଧୀନଗର ରାଜଧାନୀ ବନ୍ଦେ ଭାରତ ଏକ୍ସପ୍ରେସ୍ ଦ୍ୱାରା ଜୀବନ୍ତ ହୃଦୟକୁ ଅହମ୍ମଦାବାଦ ଅଣାଯାଇଥିଲା।

ସମ୍ପୂର୍ଣ୍ଣ ଅସ୍ତ୍ରୋପଚାର ଅତ୍ୟନ୍ତ ସମୟ ସାପେକ୍ଷ ଥିଲା କାରଣ ନିର୍ଦ୍ଧାରିତ ସମୟ ମଧ୍ୟରେ ହୃଦୟକୁ ଡାକ୍ତରଖାନାକୁ ପହଂଚାଇବାକୁ ପଡ଼ିଥିଲା। ଅହମ୍ମଦାବାଦ ରେଳ ଷ୍ଟେସନରୁ ଡାକ୍ତରଖାନାକୁ ହୃଦୟ ପରିବହନ ପାଇଁ ରେଳବାଇ ସୁରକ୍ଷା ବାହିନୀ (ଆରପିଏଫ) ଏବଂ ଗୁଜରାଟ ପୋଲିସ ଏକ ସବୁଜ କରିଡର ସୃଷ୍ଟି କରିଥିଲେ। ଏହା ହୃଦୟକୁ ବିନା କୌଣସି ବାଧାରେ ସିଧାସଳଖ ଡାକ୍ତରଖାନାକୁ ପରିବହନ କରିବାକୁ ଅନୁମତି ଦେଇଥିଲା, ଯାହା ଦ୍ୱାରା ପ୍ରତିରୋପଣରେ ବିଳମ୍ବ ହେବ ନାହିଁ।

ଅହମ୍ମଦାବାଦ ଡିଭିଜନର ଡିଭିଜନାଲ ରେଲୱେ ମ୍ୟାନେଜର ବେଦ ପ୍ରକାଶ ଏହି ସଫଳତାକୁ ଭାରତୀୟ ରେଳବାଇ ପାଇଁ ଏକ ଗର୍ବର ମୁହୂର୍ତ ବୋଲି କହିଛନ୍ତି ଏବଂ କହିଛନ୍ତି ଯେ ଏହିପରି ଜୀବନ ରକ୍ଷାକାରୀ କାର୍ୟ୍ୟରେ ପ୍ରତ୍ୟେକ ମିନିଟ୍ ଗୁରୁତ୍ୱପୂର୍ଣ୍ଣ। ସେ କହିଥିଲେ ଯେ ଭାରତୀୟ ରେଳବାଇ, ଆରପିଏଫ, ଗୁଜରାଟ ପୁଲିସ ଏବଂ ଡାକ୍ତରୀ ଦଳ ମଧ୍ୟରେ ଉନ୍ନତ ସମନ୍ୱୟ କାରଣରୁ ଏହି ଅଭିଯାନ ସଫଳ ହୋଇଛି। ସେ କହିଥିଲେ ଯେ ଜଣେ ବ୍ୟକ୍ତିର ଜୀବନ ବଂଚାଇବାରେ ଭାରତୀୟ ରେଳବାଇର ଭୂମିକା ନିର୍ବାହ କରିବା କେବଳ ଏକ ଦାୟିତ୍ୱ ନୁହେଁ, ବରଂ ସେବା ଏବଂ ମାନବିକତା ପ୍ରତି ଏହା ଏକ ସର୍ବୋଚ୍ଚ ଦାୟିତ୍ୱ।

ରେଳବାଇ ଅନୁଯାୟୀ, ବନ୍ଦେ ଭାରତ ଏକ୍ସପ୍ରେସର ଗତି, ସମୟାନୁବର୍ତୀତା ଏବଂ ବିଶ୍ୱସନୀୟତା ଏହି ଅଭିଯାନକୁ ସଫଳ କରିବାରେ ପ୍ରମୁଖ ଭୂମିକା ଗ୍ରହଣ କରିଥିଲା। ଏହି ସଫଳତା ଦର୍ଶାଉଛି ଯେ ଭାରତୀୟ ରେଳବାଇ କେବଳ ଯାତ୍ରୀ ଏବଂ ପରିବହନ ମଧ୍ୟରେ ସୀମିତ ନୁହେଁ, ବରଂ ଜରୁରୀକାଳୀନ ପରିସ୍ଥିତିରେ ଜୀବନ ରକ୍ଷାକାରୀ ସ୍ୱାସ୍ଥ୍ୟ ସେବା ପାଇଁ ମଧ୍ୟ ଏକ ପ୍ରଭାବଶାଳୀ ମାଧ୍ୟମ ପାଲଟିଛି।

ଭାରତୀୟ ରେଳବାଇର ବିଭିନ୍ନ ବିଭାଗ, ରେଳବାଇ ସୁରକ୍ଷା ବାହିନୀ, ଗୁଜରାଟ ରାଜ୍ୟ ପୋଲିସ, ଡାକ୍ତର, ଅଙ୍ଗ ପ୍ରତିରୋପଣ ସଂଯୋଜକ ଏବଂ ଅନ୍ୟ ସମ୍ପୃକ୍ତ ଅଧିକାରୀ ଏବଂ କର୍ମଚାରୀମାନେ ଏହି ଅଭିଯାନର ସଫଳତାରେ ପ୍ରମୁଖ ଭୂମିକା ଗ୍ରହଣ କରିଥିଲେ। ରେଳବାଇ କହିଛି ଯେ ସମସ୍ତ ଏଜେନ୍ସି ମଧ୍ୟରେ ଦ୍ରୁତ ଏବଂ ପ୍ରଭାବଶାଳୀ ସମନ୍ୱୟ ହେତୁ ଏହି ଆହ୍ୱାନପୂର୍ଣ୍ଣ ମିଶନ ସଫଳତାର ସହ ସମ୍ପନ୍ନ ହୋଇଛି।

ହିନ୍ଦୁସ୍ଥାନ ସମାଚାର / ଭାନୁ ଚରଣ