ନୂଆଦିଲ୍ଲୀ, ଜୁଲାଇ 30 (ହି.ସ) : ଭାରତୀୟ ଜନତା ପାର୍ଟି (ବିଜେପି) ଶାସିତ ତିନୋଟି ରାଜ୍ୟ ଗୁଜରାଟ, ବିହାର ଏବଂ ମଧ୍ୟପ୍ରଦେଶରେ ଉପ-ନିର୍ବାଚନ ପାଇଁ ଆଜି ସକାଳ 7ଟାରେ ମତଦାନ ଆରମ୍ଭ ହୋଇଛି। ଏଗୁଡ଼ିକ ମଧ୍ୟରେ ବିହାରର ବଙ୍କିପୁର, ମଧ୍ୟପ୍ରଦେଶର ଦତିଆ ଏବଂ ଗୁଜରାଟର ମଞ୍ଜଲପୁର ଅନ୍ତର୍ଭୁକ୍ତ। ଏପ୍ରିଲରେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ନିତିନ ନବୀନ ରାଜ୍ୟସଭାକୁ ନିର୍ବାଚିତ ହେବା ପରେ ବଙ୍କିପୁର ଆସନ ଖାଲି ପଡ଼ିଥିଲା। ବଙ୍କିପୁରକୁ ଭାରତୀୟ ଜନତା ପାର୍ଟିର ଏକ ଦୃଢ଼ ଗଡ଼ ବୋଲି ବିବେଚନା କରାଯାଏ। ଏହି ତିନୋଟି ଆସନର ଫଳାଫଳ ଅଗଷ୍ଟ 3 ତାରିଖରେ ପ୍ରକାଶ ପାଇବ।

କଂଗ୍ରେସ ବିଧାୟକ ରାଜେନ୍ଦ୍ର ଭାରତୀ ଦୋଷୀ ସାବ୍ୟସ୍ତ ହେବା ପରେ ଦତିଆ ଆସନ ଖାଲି ପଡ଼ିଥିଲା। ଦଣ୍ଡାଦେଶ କାରଣରୁ ଏପ୍ରିଲ ମାସରେ ତାଙ୍କ ବିଧାନସଭା ସଦସ୍ୟତା ସମାପ୍ତ ହୋଇଥିଲା। ବିଜେପିର ଆଠ ଥର ବିଧାୟକ ତଥା ପୂର୍ବତନ ମନ୍ତ୍ରୀ ଯୋଗୀଶ ପଟେଲଙ୍କ ଦେହାନ୍ତ ହେତୁ ମଞ୍ଜଲପୁରରେ ଉପନିର୍ବାଚନ ଅନୁଷ୍ଠିତ ହେଉଛି। ଦୀର୍ଘ ଦିନ ଧରି ଅସୁସ୍ଥ ରହିବା ପରେ ଜୁନ୍ 2 ତାରିଖରେ ତାଙ୍କର ଦେହାନ୍ତ ହୋଇଥିଲା। 2008 ରେ ସୀମା ନିର୍ଦ୍ଧାରଣ ପରେ ଅସ୍ତିତ୍ୱରେ ଆସିଥିବା ମଞ୍ଜଲପୁର ଆସନରେ ସର୍ବଦା ବିଜେପିର ପ୍ରାଧାନ୍ୟ ରହିଛି।

ଦତିଆ ଆସନରେ ବିଜେପି ପ୍ରାର୍ଥୀ ଆଶୁତୋଷ ତିୱାରୀ ଏବଂ କଂଗ୍ରେସର ଘନଶ୍ୟାମ ସିଂହଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିତା ହେଉଛି। ବଙ୍କିପୁରରୁ ବିଜେପିର ନୀରଜ କୁମାର ସିହ୍ନା ପ୍ରତିଦ୍ୱନ୍ଦ୍ୱିତା କରୁଛନ୍ତି। ଜନସୁରାଜରୁ ପ୍ରଶାନ୍ତ କିଶୋର ଏବଂ ଆର୍. ଜେ. ଡି. ରୁ ରେଖା ଗୁପ୍ତା ମଧ୍ୟ ଭାଗ୍ୟ ପରୀକ୍ଷା କରୁଛନ୍ତି। ମଞ୍ଜଲପୁରରୁ ବିଜେପି ସତୀଶ ପଟେଲଙ୍କୁ ପ୍ରାର୍ଥୀ କରିଛି। କଂଗ୍ରେସ ଭିଖାଭାଇ ରବାରୀଙ୍କୁ ଟିକେଟ୍ ଦେଇଛି। ନିର୍ବାଚନ ଆୟୋଗ ସମସ୍ତ ମତଦାନ କେନ୍ଦ୍ରରେ ଇଲେକ୍ଟ୍ରୋନିକ୍ ଭୋଟିଂ ମେସିନ୍ (ଇଭିଏମ୍) ଏବଂ ଭିଭିପିଏଟି ବ୍ୟବସ୍ଥା କରିଛନ୍ତି।

--------

ହିନ୍ଦୁସ୍ଥାନ ସମାଚାର / ସ୍ୱାଗତିକା