ଚେନ୍ନାଇ, ୩୧ ଜୁଲାଇ (ହି.ସ.)- ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀ ଅଗଷ୍ଟ ୧ ତାରିଖରେ ତାମିଲନାଡ଼ୁ ଗସ୍ତ କରିବେ । ଏହି ସମୟରେ ସେ କଂଗ୍ରେସର ଏକ ସାଂଗଠନିକ ପ୍ରଶିକ୍ଷଣ ଶିବିରରେ ଯୋଗଦେବେ ଏବଂ ଦଳର ପଦାଧିକାରୀମାନଙ୍କୁ ସମ୍ବୋଧିତ କରିବେ । ଏଥି ସହିତ ତାମିଲନାଡ଼ୁ ମୁଖ୍ୟମନ୍ତ୍ରୀ ବିଜୟଙ୍କୁ ମଧ୍ୟ ଭେଟିବାର କାର୍ଯ୍ୟକ୍ରମ ରହିଛି । ରାଜନୈତିକ କ୍ଷେତ୍ରରେ ଏହି ବୈଠକକୁ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି ।

କଂଗ୍ରେସର ସାଂଗଠନିକ ପୁର୍ନଗଠନ ଅଭିଯାନର ଅଂଶବିଶେଷ ସ୍ୱରୂପ ଜୁଲାଇ ୨୩ ତାରିଖ ଠାରୁ ଅଗଷ୍ଟ ୧ ତାରିଖ ପର୍ଯ୍ୟନ୍ତ ତାମିଲନାଡ଼ୁରେ ଦଳର ପଦାଧିକାରୀମାନଙ୍କ ପାଇଁ ଏକ ପ୍ରଶିକ୍ଷଣ ଶିବିର ଆୟୋଜନ କରାଯାଇଛି । ମନିକମ୍ ଟାଗୋର ତାମିଲନାଡ଼ୁ କଂଗ୍ରେସ ଅଧ୍ୟକ୍ଷ ଭାବେ ଦାୟିତ୍ୱ ଗ୍ରହଣ କରିବା ପରେ ଆୟୋଜିତ ଏହି ଶିବିରର ଉଦ୍ଦେଶ୍ୟ ହେଉଛି ସଂଗଠନକୁ ସୁଦୃଢ଼ କରିବା ଏବଂ ଆଗାମୀ ନିର୍ବାଚନ ପାଇଁ ରଣନୀତି ପ୍ରସ୍ତୁତ କରିବା ।

ପ୍ରାୟ ଏକ କୋଟି ଟଙ୍କା ବ୍ୟୟରେ ଚେନ୍ନାଇ ନିକଟସ୍ଥ ମହାବଳୀପୁରମ ଠାରେ ଆୟୋଜିତ ଏହି ପ୍ରଶିକ୍ଷଣ ଶିବିରରେ ଜିଲ୍ଲା କଂଗ୍ରେସ ଅଧ୍ୟକ୍ଷ ଏବଂ ଅନ୍ୟ ପଦାଧିକାରୀମାନଙ୍କୁ ସଂଗଠନ ସମ୍ପ୍ରସାରଣ, ଆଗାମୀ ଉପ-ନିର୍ବାଚନ, ସ୍ଥାନୀୟ ପ୍ରଶାସନ ନିର୍ବାଚନ ଏବଂ ଭବିଷ୍ୟତରେ ଲୋକସଭା ନିର୍ବାଚନ ପାଇଁ ପ୍ରସ୍ତୁତି ସମ୍ବନ୍ଧୀୟ ବିଭିନ୍ନ ବିଷୟ ଉପରେ ତାଲିମ୍ ଦିଆଯାଉଛି । ଏହି ଶିବିରରେ ବୁଥ୍ ସ୍ତର ପର୍ଯ୍ୟନ୍ତ ଦଳକୁ ସୁଦୃଢ଼ କରିବା ଏବଂ ଜନସମ୍ପର୍କ ଅଭିଯାନକୁ ପ୍ରଭାବୀ କରିବା ଉପରେ ବିଶେଷ ଗୁରୁତ୍ୱ ଦିଆଯାଇଛି ।

ପ୍ରଶିକ୍ଷଣ ଶିବିରର ଶେଷ ଦିନରେ ରାହୁଲ ଗାନ୍ଧୀ ଏଥିରେ ଯୋଗଦେବେ ଏବଂ ଦଳର ପଦାଧିକାରୀମାନଙ୍କୁ ସମ୍ବୋଧିତ କରିବେ । ଏହା ବ୍ୟତୀତ ସେ ସଂଗଠନକୁ ସୁଦୃଢ଼ କରିବା ପାଇଁ ରଣନୀତି ଉପରେ ବରିଷ୍ଠ ନେତା ଏବଂ ପଦାଧିକାରୀଙ୍କ ସହ ବିସ୍ତୃତ ବିଚାରବିମର୍ଶ କରିବେ ।

କଂଗ୍ରେସ ପକ୍ଷରୁ ଦିଆଯାଇଥିବା ସୂଚନା ଅନୁସାରେ, ପ୍ରଶିକ୍ଷଣ କାର୍ଯ୍ୟକ୍ରମ ସମୟରେ କୃଷକ, ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା (ମନରେଗା)ର ଶ୍ରମିକ ତଥା ସମାଜର ବିଭିନ୍ନ ବର୍ଗର ଲୋକଙ୍କ ସହ ଭାବ ବିନିମୟ ଏବଂ କ୍ଷେତ୍ର ପ୍ରଶିକ୍ଷଣ କାର୍ଯ୍ୟକ୍ରମ ମଧ୍ୟ ଆୟୋଜିତ ହୋଇଥିଲା । ତୃଣମୂଳ ସ୍ତରରେ ଜନସମ୍ପର୍କ ଏବଂ ସାଂଗଠନିକ କାର୍ଯ୍ୟକଳାପ ପାଇଁ ଦଳର କାର୍ଯ୍ୟକର୍ତାଙ୍କୁ ପ୍ରସ୍ତୁତ କରିବା ଏହାର ମୁଖ୍ୟ ଉଦ୍ଦେଶ୍ୟ ।

ହିନ୍ଦୁସ୍ଥାନ ସମାଚାର / ପ୍ରଦୀପ୍ତ