ଭୁବନେଶ୍ୱର, 14 ଅଗଷ୍ଟ (ହି.ସ.)- ବିଭାଜନ ବିଭୀଷିକା ସ୍ମୃତି ଦିବସରେ ପ୍ରାଣ ହରାଇଥିବା
ସମସ୍ତ ନାଗରିକଙ୍କୁ ଶ୍ରଦ୍ଧାଂଜଳି ଜ୍ଞାପନ କରିଛନ୍ତି ଦୁଇ ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ
ସିଂହଦେଓ, ପ୍ରଭାତି ପରିଡା ଓ ସ୍ୱାସ୍ଥ୍ୟମନ୍ତ୍ରୀ ଡ.ମୁକେଶ ମହାଲିଙ୍ଗ ।
ଏନେଇ ସୋସିଆଲ ମିଡିଆ ଏକ୍ସରେ ଏକ ବାର୍ତ୍ତା ଜାରି କରି
ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓ କହିଛନ୍ତି ଯେ, ବିଭାଜନ ବିଭୀଷିକା ସ୍ମୃତି ଦିବସ
୧୯୪୭ ମସିହାର ଦେଶ ବିଭାଜନ ଛାଡ଼ିଯାଇଥିବା ଗଭୀର କ୍ଷତଗୁଡ଼ିକ ଉପରେ ଗମ୍ଭୀର ଭାବେ ଚିନ୍ତନ
କରିବାକୁ ଆହ୍ୱାନ କରେ—ବିଭାଜନ ଯୋଗୁଁ ଅସଂଖ୍ୟ ଜୀବନ ବିପର୍ଯ୍ୟସ୍ତ ହୋଇଥିଲା, ଲୋକମାନେ ନିଜ ଘର
ଛାଡ଼ିବାକୁ ବାଧ୍ୟ ହୋଇଥିଲେ ଏବଂ ଅନେକ ପରିବାର ବିଚ୍ଛିନ୍ନ ହୋଇଯାଇଥିଲେ।ଏହି ଯନ୍ତ୍ରଣାଦାୟକ
ଅଧ୍ୟାୟକୁ ସ୍ମରଣ କରିବା ହେଉଛି ସେହି ସମସ୍ତଙ୍କ ପ୍ରତି ଏକ ଶ୍ରଦ୍ଧାଞ୍ଜଳି, ଯେଉଁମାନେ ଏହି
ଦୁଃଖଦ ସମୟକୁ ସହିଥିଲେ। ଏହା ଆମକୁ ଏହି କଥା ମଧ୍ୟ ମନେ ପକାଇଦିଏ ଯେ, ଭାରତର ଶକ୍ତି ଏହାର
ଏକତା, ସଦ୍ଭାବନା ଓ
ସାମୂହିକ ଭାବନାରେ ନିହିତ।
ପ୍ରଭାତି ପରିଡା କହିଛନ୍ତି ଯେ, ବିଭାଜନର ବିଭୀଷିକା ଆମ ଇତିହାସର ଏକ
ଦୁଃଖଦ ଅଧ୍ୟାୟ। ଆଜି ୧୪ ଅଗଷ୍ଟ, ବିଭାଜନ ବିଭୀଷିକା ସ୍ମୃତି ଦିବସ ଅବସରରେ ବିଭାଜନର ଯନ୍ତ୍ରଣା ଓ
ସଂଘର୍ଷ ସହିଥିବା ଏବଂ ବଳିଦାନ ଦେଇଥିବା ଲକ୍ଷ ଲକ୍ଷ ଭାରତୀୟଙ୍କୁ ଶ୍ରଦ୍ଧାଞ୍ଜଳି ଜଣାଉଛି ।
ସ୍ୱାସ୍ଥ୍ୟମନ୍ତ୍ରୀ ଡ.ମୁକେଶ ମହାଲିଙ୍ଗ କହିଛନ୍ତି ଯେ, 'ବିଭାଜନ ବିଭୀଷିକା ସ୍ମୃତି ଦିବସ'ରେ ବିଭାଜନ କାରଣରୁ
ପ୍ରାଣ ହରାଇଥିବା ସମସ୍ତ ଭାରତୀୟ ନାଗରିକଙ୍କ ପ୍ରତି ବିନମ୍ର ଶ୍ରଦ୍ଧାଞ୍ଜଳି ଜଣାଉଛି। ଆସନ୍ତୁ
ଆଜିର ଦିନରେ ସେମାନଙ୍କ ବଳିଦାନକୁ ସ୍ମରଣ କରିବା ସହ ଦେଶର ଏକତା ଓ ଅଖଣ୍ଡତାକୁ ଅକ୍ଷୁର୍ଣ୍ଣ
ରଖିବା ପାଇଁ ଶପଥ ନେବା।
---------------
ହିନ୍ଦୁସ୍ଥାନ ସମାଚାର / ସ୍ୱାଗତିକା
