ନୂଆଦିଲ୍ଲୀ, ୧୮ ଅଗଷ୍ଟ (ହି.ସ.)- କେନ୍ଦ୍ରୀୟ ଅନୁସନ୍ଧାନ ବ୍ୟୁରୋ (ସିବିଆଇ) ଖଣି ମହାନିର୍ଦ୍ଦେଶାଳୟ (ଡିଜିଏମଏସ), ହାଇଦ୍ରାବାଦର ଉପ ନିର୍ଦ୍ଦେଶକ (ଖଣି) ୟୁ ଶିବ ଶଙ୍କରଙ୍କ ସମେତ ତିନି ଜଣଙ୍କୁ ସୋମବାର ରଙ୍ଗେହାତ ୨ ଲକ୍ଷ ଟଙ୍କା ଲାଂଚ ନେଉଥିବା ବେଳେ ଗିରଫ କରିଛି। ଆନ୍ଧ୍ର ପ୍ରଦେଶର ପ୍ରକାଶମ ଜିଲ୍ଲାରେ ଘଟିଥିବା ଖଣି ଦୁର୍ଘଟଣାର ତଦନ୍ତରେ ଅନୁକୂଳ ରିପୋର୍ଟ ଦେବା ବଦଳରେ ଏହି ଲାଂଚ ଟଙ୍କା ଦିଆଯିବାର ଥିଲା।
ସିବିଆଇ ଅନୁସାରେ, ୨୫ ଜୁନ ପ୍ରକାଶମ ଜିଲ୍ଲାର ଏକ ଖଣିରେ ଦୁର୍ଘଟଣା ଘଟିଥିଲା। ଅଭିଯୋଗ ଅଛି ଯେ, ସମ୍ପୃକ୍ତ ଖଣି ପ୍ରତିଷ୍ଠାନର ପ୍ରତିନିଧିମାନେ ଦୁର୍ଘଟଣାର ତଦନ୍ତରେ ଅନୁକୂଳ ରିପୋର୍ଟ ହାସଲ କରିବା ଏବଂ ପ୍ରତିଷ୍ଠାନର ମାଲିକମାନଙ୍କୁ ମାମଲାରେ ନ ଫସାଇବା ପାଇଁ ଜଣେ ପରାମର୍ଶଦାତା ଏବଂ ମଧ୍ୟସ୍ଥଙ୍କ ମାଧ୍ୟମରେ ଡିଜିଏମଏସର ଉପ ନିର୍ଦ୍ଦେଶକ (ଖଣି)ଙ୍କ ସହ ଯୋଗାଯୋଗ କରିଥିଲେ।
ତଦନ୍ତକାରୀ ସଂସ୍ଥା ଅନୁସାରେ ମଧ୍ୟସ୍ଥ ଜଣକ ପୂର୍ବରୁ ମଧ୍ୟ ଅନୁକୂଳ ରିପୋର୍ଟ ପାଇଁ ଉପ ନିର୍ଦ୍ଦେଶକଙ୍କୁ ଏକ ଲକ୍ଷ ଟଙ୍କା ଦେଇଥିଲେ। ଏହା ପରେ ୧୭ ଅଗଷ୍ଟରେ ଆଉ ଦୁଇ ଲକ୍ଷ ଟଙ୍କାର ଏକ ରାଶିର ବ୍ୟବସ୍ଥା କରାଯାଇଥିଲା। ଏହି ରାଶି ଅନୁକୂଳ ତଦନ୍ତ ରିପୋର୍ଟ ବ୍ୟତୀତ ସମ୍ପୃକ୍ତ ଖଣି ପ୍ରତିଷ୍ଠାନ ଏବଂ ଅନ୍ୟ ଖଣି ସହ ଜଡ଼ିତ କଥିତ ତ୍ରୈମାସିକ ଲାଂଚ ପ୍ରଦାନ ପାଇଁ ଦିଆଯିବାର ଥିଲା।
ସିବିଆଇ ୧୭ ଅଗଷ୍ଟରେ ଜାଲ ବିଛାଇ ଓଙ୍ଗୋଲରେ ଡିଜିଏମଏସର ଉପ ନିର୍ଦ୍ଦେଶକ (ଖଣି) ୟୁ ଶିବ ଶଙ୍କରଙ୍କୁ ଦୁଇ ଲକ୍ଷ ଟଙ୍କା ଲାଂଚ ନେଉଥିବା ବେଳେ ରଙ୍ଗେହାତ ଧରିଥିଲା। ଏହି ଟଙ୍କା ପରାମର୍ଶଦାତା ଏବଂ ମଧ୍ୟସ୍ଥ ଏ ଶୁଭାଷକର ରେଡ୍ଡୀ ଖଣି ପ୍ରତିଷ୍ଠାନର ପ୍ରତିନିଧିଙ୍କ ଉପସ୍ଥିତିରେ ଦେଇଥିଲେ। ସିବିଆଇ ଲାଂଚର ସମ୍ପୂର୍ଣ୍ଣ ରାଶି ଜବତ କରିଛି।
ସିବିଆଇ ଏହି ମାମଲାରେ ଡିଜିଏମଏସର ଉପ ନିର୍ଦ୍ଦେଶକ ୟୁ ଶିବ ଶଙ୍କର, ପ୍ରକାଶମ ଜିଲ୍ଲାର ଚିମାକୁର୍ତି ସ୍ଥିତ ମେସର୍ସ ବାସଭି ଗ୍ରାନାଇଟ୍ସର ପ୍ରତିନିଧି ସିଦ୍ଦା ୱେଙ୍କଟ ସୁରେଶ କୁମାର ଏବଂ ପରାମର୍ଶଦାତା ଓ ମଧ୍ୟସ୍ଥ ଏ. ଶୁଭାଷକର ରେଡ୍ଡୀଙ୍କୁ ଗିରଫ କରିଛି।
---------------------
---------------
ହିନ୍ଦୁସ୍ଥାନ ସମାଚାର / ଗଗନ