ନୂଆଦିଲ୍ଲୀ, ୧୮ ଅଗଷ୍ଟ (ହି.ସ.)- ଦିଲ୍ଲୀ ଉଚ୍ଚ ନ୍ୟାୟାଳୟର ଜଷ୍ଟିସ ପ୍ରତିଭା ସିଂହଙ୍କ ଅଧ୍ୟକ୍ଷତାରେ ଥିବା ବେଂଚ ଲାଲ କିଲ୍ଲା ବିସ୍ଫୋରଣ ମାମଲାର ଅଭିଯୁକ୍ତ ଜସୀର ବିଲାଲ ୱାନୀ ଓରଫ ଦାନିଶଙ୍କ ଜାମିନ ଆବେଦନ ଖାରଜ କରିଛନ୍ତି। ଜସୀର ବିଲାଲ ୱାନୀ ଓରଫ ଦାନିଶଙ୍କୁ ଶ୍ରୀନଗରରୁ ଗିରଫ କରାଯାଇଥିଲା।
ଜାତୀୟ ତଦନ୍ତ ଏଜେନ୍ସି (ଏନଆଇଏ) ଅନୁସାରେ ଦାନିଶ ଡ୍ରୋନରେ ବୈଷୟିକ ପରିବର୍ତନ କରିଥିଲା ଏବଂ କାର ବୋମା ବିସ୍ଫୋରଣ ପୂର୍ବରୁ ରକେଟ୍ ପ୍ରସ୍ତୁତ କରିବାକୁ ଚେଷ୍ଟା କରିଥିଲା। ଦାନିଶ ଉମର ଉନ ନବୀଙ୍କ ସହ ମିଶି ସମଗ୍ର ଷଡ଼ଯନ୍ତ୍ରକୁ କାର୍ଯ୍ୟକାରୀ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ନେଇଥିଲା। ଏନଆଇଏ ଅନୁସାରେ ରାଜନୀତି ବିଜ୍ଞାନରେ ସ୍ନାତକ ଦାନିଶଙ୍କୁ ଆତ୍ମଘାତୀ ଆକ୍ରମଣକାରୀ କରିବା ପାଇଁ ଉମର ତାଙ୍କର ବ୍ରେନୱାଶ କରିଥିଲା। ସେ ଅକ୍ଟୋବର, ୨୦୨୪ରେ କୁଲଗାମର ଏକ ମସଜିଦରେ ଡାକ୍ତର ମଡ୍ୟୁଲ ସହ ଭେଟିବାକୁ ରାଜି ହୋଇଥିଲା, ଯେଉଁଠାରୁ ତାଙ୍କୁ ହରିୟାଣାର ଫରିଦାବାଦରେ ଅଲ ଫଲାହ ବିଶ୍ୱବିଦ୍ୟାଳୟରେ ରହିବା ପାଇଁ ନିଆଯାଇଥିଲା।
ଏନଆଇଏ ଅନୁସାରେ ଦାନିଶଙ୍କୁ ପ୍ରଥମେ ଜମ୍ମୁ-କଶ୍ମୀର ପୁଲିସ ହାଜତରେ ନେଇଥିଲା ଏବଂ ପଚରାଉଚରାରେ ସେ ପ୍ରକାଶ କରିଥିଲା ଯେ ମଡ୍ୟୁଲର ଅନ୍ୟ ଲୋକମାନେ ତାଙ୍କୁ ନିଷିଦ୍ଧ ଜୈଶ-ଏ-ମହମ୍ମଦ ପାଇଁ ଓଭର-ଗ୍ରାଉଣ୍ଡ ୱର୍କର (ଓଜିଡବ୍ଲ୍ୟୁ) କରିବାକୁ ଚାହୁଁଥିଲେ, ଯେତେବେଳେ ଉମର ଅନେକ ମାସ ଧରି ତାଙ୍କର ବ୍ରେନୱାଶ କରି ଆତ୍ମଘାତୀ ଆକ୍ରମଣକାରୀ ହେବା ପାଇଁ ପ୍ରସ୍ତୁତ କରୁଥିଲା। ଉମରଙ୍କ ଏହି ପ୍ରୟାସ ଏପ୍ରିଲ, ୨୦୨୫ରେ ସେତେବେଳେ ବିଫଳ ହୋଇଥିଲା, ଯେତେବେଳେ ଦାନିଶ ନିଜର ଖରାପ ଆର୍ôଥକ ସ୍ଥିତି ଏବଂ ଇସଲାମରେ ଆତ୍ମହତ୍ୟାକୁ ଭୁଲ ବୋଲି ଦର୍ଶାଇ ଏଥିରୁ ଇନକାର କରିଥିଲା।
ଲାଲ କିଲ୍ଲା ନିକଟରେ ୧୦ ନଭେମ୍ବର, ୨୦୨୫ରେ ଆଇ-୧୦ କାରରେ ବିସ୍ଫୋରଣ ହୋଇଥିଲା। ଏହି କାର ଆମିର ରଶିଦ ଅଲୀଙ୍କ ନାମରେ ଥିଲା। ଏହି ବିସ୍ଫୋରଣରେ ୧୩ ଜଣଙ୍କ ମୃତ୍ୟୁ ହୋଇଥିଲା ଏବଂ ୩୨ ଜଣ ଆହତ ହୋଇଥିଲେ।
-------------------
---------------
ହିନ୍ଦୁସ୍ଥାନ ସମାଚାର / ଗଗନ