ସାନା/ରିୟାଦ, ଅଗଷ୍ଟ ୧୯ (ହି.ସ) ୟେମେନର ଇରାନ ସମର୍ଥିତ ହୁଥି ବିଦ୍ରୋହୀମାନେ ସାଉଦି ଆରବର ଦକ୍ଷିଣ ଲୋହିତ ସାଗର ଉପକୂଳରେ ଥିବା ଜିଜାନରେ ଥିବା ସାଉଦି ଆରାମକୋର ତୈଳ ବିଶୋଧନାଗାରକୁ ଏକ ଡ୍ରୋନ୍ ଦ୍ୱାରା ଟାର୍ଗେଟ କରିଥିବା ଦାବି କରିଛନ୍ତି। ହୁଥି ଗଣମାଧ୍ୟମ ଅନୁଯାୟୀ, ୟେମେନର ସାଦା ଏବଂ ହାଜାହ ପ୍ରଦେଶରେ କଥିତ ଆକାଶସୀମା ଉଲ୍ଲଙ୍ଘନ ପ୍ରତିକ୍ରିୟାରେ ଏହି ଆକ୍ରମଣ କରାଯାଇଥିଲା।
ହୁଥି ନ୍ୟୁଜ୍ ଏଜେନ୍ସି ସବା ଏକ ସାମରିକ ସୂତ୍ରକୁ ଉଦ୍ଧୃତ କରି କହିଛି ଯେ ଏହି ଗୋଷ୍ଠୀ ଜିଜାନର ଆରାମକୋ ବିଶୋଧନାଗାରକୁ ଅନେକ ଡ୍ରୋନ୍ ଦ୍ୱାରା ଟାର୍ଗେଟ କରିଥିଲା। ତେବେ ଏପର୍ଯ୍ୟନ୍ତ କେହି ଆହତ କିମ୍ବା ମୃତାହତ ହୋଇନଥିବା ସୂଚନା ମିଳିଛି।
ହୁଥିମାନେ ସାଉଦି ଆରବ ବିରୋଧରେ ଆକ୍ରମଣକୁ ଜୋରଦାର କରିବା ସହ ସାମୁଦ୍ରିକ ଅବରୋଧ ଘୋଷଣା କରିବା ପରେ ଏହି ଆକ୍ରମଣ ହୋଇଛି। ସାଉଦି ଆରବ ଦୀର୍ଘ ଦିନ ଧରି ୟେମେନର ଆନ୍ତର୍ଜାତୀୟ ସ୍ତରରେ ସ୍ୱୀକୃତିପ୍ରାପ୍ତ ସରକାରଙ୍କୁ ସମର୍ଥନ କରିଆସିଛି ଏବଂ ଅତୀତରେ ହୁଥି ପଦବୀ ବିରୁଦ୍ଧରେ ସାମରିକ କାର୍ଯ୍ୟାନୁଷ୍ଠାନ ଗ୍ରହଣ କରିଛି।
ହୁଥିମାନେ ଗତ କିଛି ଦିନ ମଧ୍ୟରେ ସାଉଦି ତୈଳ ଟ୍ୟାଙ୍କର ଏବଂ ୟେମେନି ସରକାରୀ ବାହିନୀକୁ ମଧ୍ୟ ଟାର୍ଗେଟ କରିଛନ୍ତି। ଏହି ଗୋଷ୍ଠୀ ପୂର୍ବରୁ ସାଉଦି ଆରବର ତୈଳ ପ୍ରତିଷ୍ଠାନ ଏବଂ ବିମାନବନ୍ଦର ଉପରେ ଅନେକ ଆକ୍ରମଣ କରିଛି।
ଜାତିସଂଘର ଉଦବେଗ
ମିଳିତ ଜାତିସଂଘର ମହାସଚିବ ଆଣ୍ଟୋନିଓ ଗୁଟେରସଙ୍କ ମୁଖପାତ୍ର ଏହି ଆକ୍ରମଣ ରିପୋର୍ଟ ଉପରେ ଗଭୀର ଚିନ୍ତା ବ୍ୟକ୍ତ କରିଛନ୍ତି। ସେ କହିଛନ୍ତି ଯେ ଏଭଳି ଆକ୍ରମଣ ୟେମେନକୁ ଏକ ବ୍ୟାପକ ଆଞ୍ଚଳିକ ସଂଘର୍ଷରେ ଆହୁରି ଫସାଇ ଦେଇପାରେ।
ଜାତିସଂଘ ଚେତାବନୀ ଦେଇଛି ଯେ ଏହି ଅଞ୍ଚଳରେ ପୂର୍ବରୁ ଚାଲିଥିବା ଉତ୍ତେଜନା ମଧ୍ୟରେ ଏଭଳି ଆକ୍ରମଣ ଆଞ୍ଚଳିକ ବାଣିଜ୍ୟ ଏବଂ ଶକ୍ତି ଯୋଗାଣକୁ ପ୍ରଭାବିତ କରିବାର ବିପଦକୁ ବଢ଼ାଇପାରେ।
ଉଲ୍ଲେଖନୀୟ କଥା ହେଉଛି, ହୁଥି ବିଦ୍ରୋହୀମାନେ ମଧ୍ୟ ଗତ ମାସରେ ୟେମେନର ରାଜଧାନୀ ସାନାରେ ଏକ ଇରାନୀୟ ବିମାନ ଅବତରଣକୁ ସ୍ୱାଗତ କରିଥିଲେ। ସେବେଠାରୁ ଏହି ଅଞ୍ଚଳରେ ପରସ୍ପର ବିରୋଧରେ ଆକ୍ରମଣ ତୀବ୍ର ହୋଇଛି।
---------
ହିନ୍ଦୁସ୍ଥାନ ସମାଚାର / ସ୍ୱାଗତିକା