-ଛାତ୍ର ସଂଗଠନ ଏବଂ ରାଜନୈତିକ ଦଳଗୁଡ଼ିକର ବିରୋଧ ପରେ କଲେଜ ଶିକ୍ଷା ବିଭାଗ ଜାରି କଲା ଆଦେଶ
ଚେନ୍ନାଇ, ୧୯ ଅଗଷ୍ଟ (ହି.ସ.)- ତାମିଲନାଡୁ ସରକାର ସରକାରୀ କଳା ଏବଂ ବିଜ୍ଞାନ ମହାବିଦ୍ୟାଳୟ ତଥା ବିଶ୍ୱବିଦ୍ୟାଳୟଗୁଡ଼ିକରେ ଛାତ୍ରମାନଙ୍କୁ ବିରୋଧ ପ୍ରଦର୍ଶନ ଏବଂ ଆନ୍ଦୋଳନରେ ଭାଗ ନେବାରୁ ରୋକିବା ପାଇଁ ଜାରି କରାଯାଇଥିବା ବିବାଦୀୟ ପରିପତ୍ରକୁ ଫେରାଇ ନେଇଛି। ଛାତ୍ର ସଂଗଠନ, ରାଜନୈତିକ ଦଳ ଏବଂ ସାମାଜିକ କର୍ମୀମାନଙ୍କର କଡ଼ା ବିରୋଧ ପରେ କଲେଜ ଶିକ୍ଷା ବିଭାଗର ନିର୍ଦ୍ଦେଶିକା ସିନ୍ଧିଆ ସେଲ୍ଭୀ ବୁଧବାର ଆଦେଶ ଫେରାଇ ନେବାର ଘୋଷଣା କରିଛନ୍ତି।
ଏହା ପୂର୍ବରୁ କଲେଜ ଶିକ୍ଷା ବିଭାଗ ପକ୍ଷରୁ ମହାବିଦ୍ୟାଳୟ ଏବଂ ବିଶ୍ୱବିଦ୍ୟାଳୟଗୁଡ଼ିକରେ ଛାତ୍ର ବିରୋଧ ପ୍ରଦର୍ଶନକୁ ରୋକିବା ପାଇଁ ପୋଲିସ ଏବଂ କଲେଜ ପ୍ରଶାସନ ପକ୍ଷରୁ ନିଆଯାଇଥିବା ସତର୍କତାମୂଳକ ପଦକ୍ଷେପ ତଥା ଭବିଷ୍ୟତରେ ଏପରି ପ୍ରଦର୍ଶନକୁ ରୋକିବା ପାଇଁ ପ୍ରସ୍ତାବିତ ପଦକ୍ଷେପ ଉପରେ ବିସ୍ତୃତ ରିପୋର୍ଟ ମଗାଯାଇଥିଲା। ସମସ୍ତ କଲେଜକୁ ତୁରନ୍ତ ରିପୋର୍ଟ ପ୍ରସ୍ତୁତ କରି ପରଦିନ ସକାଳ ସୁଦ୍ଧା ପଠାଇବାକୁ ନିର୍ଦ୍ଦେଶ ଦିଆଯାଇଥିଲା। ଆଦେଶରେ କୁହାଯାଇଥିଲା ଯେ ଏହି କାର୍ଯ୍ୟ ମୁଖ୍ୟ ସଚିବଙ୍କ ନିର୍ଦ୍ଦେଶ ଆଧାରରେ କରାଯାଉଛି।
ପରିପତ୍ର ସାମ୍ନାକୁ ଆସିବା ପରେ ବିଭିନ୍ନ ଛାତ୍ର ସଂଗଠନ ଏବଂ ରାଜନୈତିକ ଦଳଗୁଡ଼ିକ ସରକାର ଉପରେ ଛାତ୍ରମାନଙ୍କର ଗଣତାନ୍ତ୍ରିକ ଏବଂ ବିରୋଧର ଅଧିକାରକୁ ସୀମିତ କରିବାର ଅଭିଯୋଗ ଲଗାଇଥିଲେ। ବାମପନ୍ଥୀ ଛାତ୍ର ସଂଗଠନ ସମେତ ଅନେକ ଗୋଷ୍ଠୀ ଆଦେଶକୁ ସମାଲୋଚନା କରି ବ୍ୟାପକ ବିରୋଧ ପ୍ରଦର୍ଶନର ଚେତାବନୀ ଦେଇଥିଲେ।
ବିରୋଧ ବଢ଼ିବା ପରେ ସରକାର ତୁରନ୍ତ ନିଜ ନିଷ୍ପତି ବଦଳାଇ ସମ୍ପର୍କିତ ରିପୋର୍ଟ ଏବଂ ପରିପତ୍ର ଫେରାଇ ନେବାର ଘୋଷଣା କରିଛି। କଲେଜ ଶିକ୍ଷା ବିଭାଗର ନିର୍ଦ୍ଦେଶିକା ସିନ୍ଧିଆ ସେଲ୍ଭୀଙ୍କ ପକ୍ଷରୁ ଜାରି ନୂଆ ପରିପତ୍ରରେ କୁହାଯାଇଛି ଯେ ଛାତ୍ରମାନଙ୍କୁ ବିରୋଧ ପ୍ରଦର୍ଶନରେ ସାମିଲ ହେବାରୁ ରୋକିବା ପାଇଁ ପ୍ରସ୍ତାବିତ ସମନ୍ୱିତ କାର୍ଯ୍ୟାନୁଷ୍ଠାନ ସମ୍ବନ୍ଧୀୟ ପୂର୍ବ ଆଦେଶକୁ ତୁରନ୍ତ ପ୍ରଭାବରୁ ଫେରାଇ ନିଆଯାଉଛି।
--------------
---------------
ହିନ୍ଦୁସ୍ଥାନ ସମାଚାର / ଗଗନ