କାଠମାଣ୍ଡୁ, ୩୧ ଅଗଷ୍ଟ (ହି.ସ.)- କାଠମାଣ୍ଡୁରେ ଥିବା ଆମେରିକୀୟ ଦୂତାବାସ ନେପାଳ ଯାତ୍ରା ସମ୍ବନ୍ଧରେ ନିଜର ଟ୍ରାଭେଲ ଆଡଭାଇଜରୀକୁ ଅପଡେଟ୍ କରିଛି, ଯେଉଁଥିରେ ରସୁୱା ଜିଲ୍ଲାର ରାସୁୱାଗଢ଼ି-ଟିମୁର-ସ୍ୟାଫ୍ରୁବେଂସି ଅଂଚଳ ଏବଂ ନେପାଳ-ଚୀନ୍ ସୀମା ଚେକପଏଂଟକୁ କୌଣସି ମତେ ଯାତ୍ରା ନକରିବାକୁ ପରାମର୍ଶ ଦିଆଯାଇଛି ।
ଆମେରିକୀୟ ଦୂତାବାସ ଅନୁଯାୟୀ, ଅଗଷ୍ଟ ୨୬ ତାରିଖରେ ଆସିଥିବା ଭୟଙ୍କର ବନ୍ୟା ପରେ ଏହି ଅଂଚଳରେ ସଡ଼କ, ଟ୍ରାଫିକ୍ ଏବଂ ଯୋଗାଯୋଗ ସେବା ପ୍ରଭାବିତ ହୋଇଛି । ପ୍ରଭାବିତ ଅଂଚଳରେ ଖୋଜାଖୋଜି, ଉଦ୍ଧାର ଏବଂ ପୁନରୁଦ୍ଧାର କାର୍ଯ୍ୟ ଜାରି ରହିଛି, ଯେଉଁ କାରଣରୁ ବିପଦ ସ୍ତର ଯଥେଷ୍ଟ ଅଧିକ ରହିଛି । ଆଗକୁ ଆହୁରି ବନ୍ୟା ଏବଂ ଭୂସ୍ଖଳନ ହେବାର ଆଶଙ୍କା ରହିଛି ।
ଆମେରିକା ପ୍ରଭାବିତ ଅଂଚଳକୁ ଲେବଲ୍-୪: ଡୁ ନଟ୍ ଟ୍ରାଭେଲ୍' ବର୍ଗରେ ରଖିଛି । ଏଥିରେ ଭୋଟେକୋଶି, ତ୍ରିଶୁଲି ଏବଂ ନାରାୟଣୀ ନଦୀର ଆଖପାଖ ଅଂଚଳ ମଧ୍ୟ ଅନ୍ତର୍ଭୁକ୍ତ । ଆମେରିକା ଦୂତାବାସ ଏହାର ନାଗରିକମାନଙ୍କୁ ନଦୀ କୂଳ, ତଳିଆ ଅଂଚଳ, କ୍ଷତିଗ୍ରସ୍ତ ସେତୁ ଏବଂ ଅସ୍ଥିର ପାହାଡ଼ିଆ ଢାଲୁଠାରୁ ଦୂରରେ ରହିବାକୁ ପରାମର୍ଶ ଦେଇଛି । ନେପାଳ କର୍ତୃପକ୍ଷଙ୍କ ଦ୍ୱାରା ଜାରି କରାଯାଇଥିବା କୌଣସି ସୁରକ୍ଷିତ ସ୍ଥାନକୁ ଯିବା ପାଇଁ କୌଣସି ଉଦ୍ଧାର ଆଦେଶ କିମ୍ବା ନିର୍ଦ୍ଦେଶ ପାଳନ କରିବାକୁ ମଧ୍ୟ ସେମାନଙ୍କୁ କୁହାଯାଇଛି । ନିଖୋଜ ଲୋକଙ୍କୁ ଖୋଜିବା ପାଇଁ ବିପର୍ଯ୍ୟୟ ପ୍ରଭାବିତ ଅଂଚଳରେ ନିଜେ ପ୍ରବେଶ ନକରିବାକୁ ଏବଂ କୌଣସି କାରଣରୁ ଏହି ଅଂଚଳକୁ ଯାତ୍ରା ନକରିବାକୁ ଆମେରିକାର ନାଗରିକମାନଙ୍କୁ ଚେତାବନୀ ଦିଆଯାଇଛି ।
ସମଗ୍ର ନେପାଳ ପାଇଁ ଲେବଲ-୨ ପରାମର୍ଶ ଆମେରିକୀୟ ଦୂତାବାସ ସମଗ୍ର ନେପାଳକୁ ସ୍ତର-୨: ଅଧିକ ସତର୍କତା ଅବଲମ୍ବନ' ବର୍ଗରେ ରଖିଛି । ଏହାର ମୁଖ୍ୟ କାରଣ ନାଗରିକ ଅଶାନ୍ତି ବୋଲି କୁହାଯାଇଛି । ଆମେରିକାର ଆକଳନ ଅନୁଯାୟୀ, ସେପ୍ଟେମ୍ବର ୨୦୨୫ରେ ଆରମ୍ଭ ହୋଇଥିବା ଦେଶବ୍ୟାପୀ ବିକ୍ଷୋଭ ବର୍ତମାନ ପାଇଁ ବନ୍ଦ ହୋଇଯାଇଛି ଏବଂ ବର୍ତମାନର ସୁରକ୍ଷା ପରିସ୍ଥିତି ସ୍ଥିର ରହିଛି । ତେବେ, ସହରରେ ବିକ୍ଷୋଭ ଏବଂ ସ୍ଥାନୀୟ ସ୍ତରରେ ଅଶାନ୍ତିର ପୁନରାବୃତି ହେବାର ଆଶଙ୍କା ରହିଛି । ଆମେରିକା ଚେତାବନୀ ଦେଇଛି ଯେ, ବିକ୍ଷୋଭ ସ୍ୱଳ୍ପ ସୂଚନାରେ ଆରମ୍ଭ ହୋଇପାରେ ଏବଂ କେତେକ ପରିସ୍ଥିତିରେ ହିଂସାତ୍ମକ ହୋଇପାରେ । ତେଣୁ, ଆମେରିକୀୟ ନାଗରିକମାନଙ୍କୁ ବିପୁଳ ଜନସମାଗମ ଏବଂ ବିକ୍ଷୋଭରୁ ଦୂରେଇ ରହିବାକୁ ଏବଂ ସ୍ଥାନୀୟ କର୍ତୃପକ୍ଷଙ୍କ ନିର୍ଦ୍ଦେଶ ପାଳନ କରିବାକୁ ପରାମର୍ଶ ଦିଆଯାଇଛି ।
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ
