ନୂଆଦିଲ୍ଲୀ, ୦୪ ଅଗଷ୍ଟ (ହି.ସ.)- ସଂସଦ ଭବନରେ ମଙ୍ଗଳବାର ଲୋକସଭା ଅଧ୍ୟକ୍ଷ ଓମ ବିର୍ଲା ଏବଂ ଉଜବେକିସ୍ତାନର ବିଦେଶ ମନ୍ତ୍ରୀ ବଖ୍ତିୟାର ସାଇଦୋଭଙ୍କ ମଧ୍ୟରେ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଥିଲା। ଏହି ସାକ୍ଷାତକାରରେ ଉଭୟ ନେତା ଭାରତ-ଉଜବେକିସ୍ତାନ ଦ୍ୱିପକ୍ଷୀୟ ସମ୍ପର୍କକୁ ନେଇ ବିସ୍ତୃତ ଆଲୋଚନା କରିଥିଲେ।
ଲୋକସଭା ସଚିବାଳୟ ଅନୁସାରେ, ଏହି ବୈଠକରେ ସଂସଦୀୟ ସହଯୋଗ, ବାଣିଜ୍ୟ, ନିବେଶ, ଶିକ୍ଷା, ସଂସ୍କୃତି ଏବଂ ପାରସ୍ପରିକ ଆଂଚଳିକ ଓ ବିଶ୍ୱସ୍ତରୀୟ ଗୁରୁତ୍ୱର ବିଷୟଗୁଡ଼ିକ ଉପରେ ବିଶେଷ ଜୋର ଦିଆଯାଇଥିଲା। ଏହି ଅବସରରେ ବଖ୍ତିୟାର ସାଇଦୋଭ ଓମ ବିର୍ଲାଙ୍କୁ ଏକ ବିଶେଷ ସ୍ମାରକ ପ୍ରକାଶନ ଉପହାର ଦେଇଥିଲେ, ଯେଉଁଥିରେ ଉଜବେକିସ୍ତାନ ଦ୍ୱାରା ଆୟୋଜିତ ଇଂଟର-ପାର୍ଲିଆମେଂଟାରୀ ୟୁନିଅନର ୧୫୦ତମ ଆସେମ୍ବଲି ସମ୍ବନ୍ଧୀୟ ସୂଚନା ରହିଛି।
ଏହି ଅବସରରେ ବିର୍ଲା କହିଥିଲେ, “ଉଭୟ ଦେଶ ଶତାବ୍ଦୀ ପୁରୁଣା ଐତିହାସିକ, ସାଂସ୍କୃତିକ ଏବଂ ସଭ୍ୟତାଗତ ସମ୍ପର୍କରେ ବନ୍ଧା, ଯାହା ସେମାନଙ୍କର ସ୍ଥାୟୀ ମିତ୍ରତା ପାଇଁ ଏକ ଦୃଢ଼ ଭିତି ପ୍ରଦାନ କରେ। ସେ ବିଶ୍ୱାସ ବ୍ୟକ୍ତ କରିଥିଲେ ଯେ ବଢ଼ୁଥିବା ରାଜନୈତିକ ବିଶ୍ୱାସ, ବାଣିଜ୍ୟ ଓ ନିବେଶର ବିସ୍ତାର ଏବଂ ଲୋକଙ୍କ ମଧ୍ୟରେ ପାରସ୍ପରିକ ଆଦାନ-ପ୍ରଦାନ ଆଗାମୀ ବର୍ଷଗୁଡ଼ିକରେ ଦ୍ୱିପକ୍ଷୀୟ ଭାଗୀଦାରିକୁ ଆହୁରି ସୁଦୃଢ଼ କରିବ।
ଭାରତର ଗଣତାନ୍ତ୍ରିକ ପରମ୍ପରା ବିଷୟରେ କହି ବିର୍ଲା କହିଥିଲେ ଯେ ବିଶ୍ୱର ସବୁଠାରୁ ବଡ଼ ଗଣତନ୍ତ୍ର ଭାବେ ଭାରତରେ ଏକ ସଜୀବ ସଂସଦୀୟ ବ୍ୟବସ୍ଥା ରହିଛି, ଯାହା ନିଜ ଜନତାଙ୍କର ଆକାଙ୍କ୍ଷା ଏବଂ ବିବିଧତାକୁ ପ୍ରଭାବଶାଳୀ ଭାବରେ ପ୍ରତିଫଳିତ କରେ।
ବିର୍ଲା ଭିତିଭୂମି ବିକାଶ, ଡିଜିଟାଲ ନବୀନତା, ପ୍ରଯୁକ୍ତି, ସଂଯୋଗ, ନିବେଶ ଏବଂ ବାଣିଜ୍ୟ କ୍ଷେତ୍ରରେ ଭାରତର ଗୁରୁତ୍ୱପୂର୍ଣ୍ଣ ସଫଳତା ଉପରେ ଆଲୋକପାତ କରିଥିଲେ। ସେ କହିଥିଲେ ଯେ ଭାରତର ଯୁବପିଢ଼ି ସମଗ୍ର ବିଶ୍ୱରେ ନେତୃତ୍ୱର ଭୂମିକା ନିଭାଉଛନ୍ତି ଏବଂ ପ୍ରମୁଖ ବିଶ୍ୱବିଦ୍ୟାଳୟ ଓ ଆନ୍ତର୍ଜାତୀୟ ସଂସ୍ଥାଗୁଡ଼ିକ ସହ ସହଯୋଗ ବଢ଼ୁଛି।
----------------------
---------------
ହିନ୍ଦୁସ୍ଥାନ ସମାଚାର / ଗଗନ