ଚଣ୍ଡିଗଡ଼, ୪ ଅଗଷ୍ଟ (ହି.ସ.)- ପଞ୍ଜାବର ଅମୃତସର ପୋଲିସ ପାକିସ୍ତାନର ଗୁଇନ୍ଦା ସଂସ୍ଥା ଆଇ.ଏସ୍.ଆଇ. ସମର୍ଥନରେ କାର୍ଯ୍ୟ କରୁଥିବା ଦୁଇଟି ଆତଙ୍କବାଦୀ ମୋଡ୍ୟୁଲ ର ପର୍ଦାଫାଶ କରିଛି । ଏହି କାରବାରରେ ୪ ଜଣ ନାବାଳକଙ୍କ ସମେତ ମୋଟ୍ ୯ ଜଣ ଅଭିଯୁକ୍ତଙ୍କୁ ଗିରଫ କରାଯାଇଛି । ସେମାନଙ୍କ ଠାରୁ ୩ଟି ବେଆଇନ ପିସ୍ତଲ, ୯ଟି ଜୀବନ୍ତ କାଟ୍ରିଜ୍ ଏବଂ ପେଟ୍ରୋଲ ଭର୍ତି ୪ଟି ବୋତଲ ଜବତ କରାଯାଇଛି ।
ପଞ୍ଜାବ ପୋଲିସ ମହାନିର୍ଦ୍ଦେଶକ ଗୌରବ ଯାଦବ ମଙ୍ଗଳବାର କହିଛନ୍ତି ଯେ, ଗିରଫ ଅଭିଯୁକ୍ତମାନେ ବିଦେଶରେ ଅବସ୍ଥିତ ଆଇ. ଏସ୍. ଆଇ. ପରିଚାଳକମାନଙ୍କ ସହ ଯୋଗାଯୋଗରେ ଥିଲେ ଏବଂ ସେମାନଙ୍କ ନିର୍ଦ୍ଦେଶରେ କାର୍ଯ୍ୟ କରୁଥିଲେ । ଏହି ଯୁବକମାନଙ୍କୁ ଆତଙ୍କବାଦୀ କାର୍ଯ୍ୟକଳାପ ପାଇଁ ପ୍ରସ୍ତୁତ କରାଯାଉଥିଲା । ସେମାନଙ୍କୁ ସୁରକ୍ଷା ପ୍ରତିଷ୍ଠାନଗୁଡ଼ିକର ରେକି କରିବା, ବେଆଇନ ଅସ୍ତ୍ରଶସ୍ତ୍ର ସଂଗ୍ରହ କରିବା ଏବଂ ପଞ୍ଜାବରେ ଶାନ୍ତି ଓ ଆଇନ ଶୃଙ୍ଖଳା ପ୍ରଭାବିତ କରିବା ଭଳି କାର୍ଯ୍ୟ ଦିଆଯାଇଥିଲା । ପୋଲିସ ଜାଣିବାକୁ ପାଇଥିଲା ଯେ, ଅଭିଯୁକ୍ତମାନେ ରେଳ ଟ୍ରାକ୍ ନିକଟରେ ନଜର ରଖିବା ପାଇଁ ସିସିଟିଭି କ୍ୟାମେରା ଲଗାଇଥିଲେ । ଏହି କ୍ୟାମେରା ଦ୍ୱାରା ରେକର୍ଡ ହୋଇଥିବା ଫୁଟେଜ୍ ସମ୍ବେଦନଶୀଳ କାର୍ଯ୍ୟକଳାପ ଉପରେ ନଜର ରଖିବା ପାଇଁ ବିଦେଶୀ ଆଇ. ଏସ୍. ଆଇ. ପରିଚାଳକମାନଙ୍କୁ ପଠାଯାଉଥିଲା ବୋଲି ଅଭିଯୋଗ ହୋଇଥିଲା ।
ପ୍ରାୟ ଏକ ମାସ ପୂର୍ବରୁ, ଅମୃତସର-ଦିଲ୍ଲୀ ରେଳପଥରେ ଏକ ଓ.ଏଚ୍.ଇ. (ଓଭରହେଡ୍ ବିଦ୍ୟୁତକରଣ) ଖୁଂଟରେ ଏକ ସି. ସି. ଟି. ଭି. କ୍ୟାମେରା ମିଳିଥିଲା । କ୍ୟାମେରାକୁ ବିଦ୍ୟୁତ ଯୋଗାଣ ପାଇଁ ଏକ ସୌର ପ୍ୟାନେଲ ମଧ୍ୟ ସ୍ଥାପନ କରାଯାଇଥିଲା । ତଦନ୍ତ ସମୟରେ, ପୋଲିସ କ୍ୟାମେରାର ସିମ୍ ସ୍ଲଟ୍ ରୁ ଏକ ସିମ୍ କାର୍ଡ ପାଇଥିଲା, ଯାହା ଗୁରୁଦେବର ନାମରେ ପଞ୍ଜୀକୃତ ହୋଇଥିଲା । ଏହାକୁ ଆଧାର କରି ପୋଲିସ ଗୁରୁଦେବକୁ ଗିରଫ କରିଥିଲା ।
ହିନ୍ଦୁସ୍ଥାନ ସମାଚାର / ପ୍ରଦୀପ୍ତ
