ନୂଆଦିଲ୍ଲୀ, ୦୫ ଅଗଷ୍ଟ (ହି.ସ.)- ବାରାଣସୀରେ ୧୪,୪୪୭.୬୪ କୋଟି ଟଙ୍କା ବ୍ୟୟରେ ନିର୍ମିତ ହେବାକୁ ଥିବା ୪୬.୦୩୯ କିଲୋମିଟର ଲମ୍ବା ଛଅ ଲେନର ଗ୍ରିନଫିଲ୍ଡ ଗଙ୍ଗା ଏଲିଭେଟେଡ୍ କରିଡୋର ଦ୍ୱାରା ଜାତୀୟ ରାଜପଥ-୧୯ (ଏନଏଚ-୧୯) ଠାରୁ ବାରାଣସୀ ରିଙ୍ଗ ରୋଡ୍ ପର୍ଯ୍ୟନ୍ତ ଦ୍ରୁତ ଯାନବାହନର ନିରବଚ୍ଛିନ୍ନ ଚଳାଚଳ ହେବ। ଏହା ସହିତ କାଶୀ ବିଶ୍ୱନାଥ ମନ୍ଦିର, ଗଙ୍ଗା ଘାଟ, ବିଏଚୟୁ, ରାମନଗର ଏବଂ କାଶୀ ରେଳବାଇ ଷ୍ଟେସନ ଭଳି ପ୍ରମୁଖ ସ୍ଥାନଗୁଡ଼ିକୁ ପହଂଚିବା ମଧ୍ୟ ସହଜ ହୋଇଯିବ। ଏହି କରିଡୋରରେ ଯାନବାହନ ୮୦ ରୁ ୧୦୦ କିଲୋମିଟର ପ୍ରତି ଘଂଟା ବେଗରେ ଚାଲିପାରିବ, ଯାହା ଫଳରେ ସହରରେ ହାରାହାରି ଯାତ୍ରା ସମୟ ୬୦ ମିନିଟରୁ କମି ୨୦ ମିନିଟ ହୋଇଯିବ।
ସଡ଼କ ପରିବହନ ଏବଂ ରାଜପଥ ମନ୍ତ୍ରାଳୟ ବୁଧବାର ପ୍ରକଳ୍ପର ପ୍ରମୁଖ ବିଶେଷତା ବିଷୟରେ କହିଛି ଯେ କେନ୍ଦ୍ରୀୟ ମନ୍ତ୍ରିମଣ୍ଡଳ ଗତ ମାସରେ ଏହି କରିଡୋରକୁ ଅନୁମୋଦନ କରିଥିଲା। ପ୍ରକଳ୍ପର ଉଦ୍ଦେଶ୍ୟ ବାରାଣସୀ ଏବଂ ଚନ୍ଦୌଳୀରେ ବଢ଼ୁଥିବା ଯାତାୟାତ ଚାପକୁ କମାଇବା, ତୀର୍ଥଯାତ୍ରୀମାନଙ୍କର ଯାତ୍ରାକୁ ସୁଗମ କରିବା ଏବଂ ସହରକୁ ଆଧୁନିକ ପରିବହନ ସୁବିଧା ସହିତ ସଂଯୋଗ କରିବା।
ମନ୍ତ୍ରାଳୟଙ୍କ ଅନୁସାରେ, ଏହି ଆକ୍ସେସ କଂଟ୍ରୋଲ ଛଅ ଲେନ ଏଲିଭେଟେଡ୍ କରିଡୋର ଏନଏଚ-୧୯, ବାରାଣସୀ ରିଙ୍ଗ ରୋଡ୍ (ଏନଏଚ-୧୩୫ବି), ରାମନଗର ଏବଂ ବିଏଚୟୁକୁ ପରସ୍ପର ସହିତ ସଂଯୋଗ କରିବ। କରିଡୋରରେ ଯାନବାହନର ପରିଚାଳନ ବେଗ ୮୦ ରୁ ୧୦୦ କିଲୋମିଟର ପ୍ରତି ଘଂଟା ହେବ। ଏହା ନିର୍ମାଣ ହେବା ପରେ ପ୍ରକଳ୍ପ କ୍ଷେତ୍ରରେ ହାରାହାରି ଯାତ୍ରା ସମୟ ପ୍ରାୟ ୬୦ ମିନିଟରୁ କମି ୨୦ ମିନିଟ ହୋଇଯିବ, ଯେତେବେଳେ କି ଏନଏଚ-୧୯ ଠାରୁ କାଶୀ ରେଳବାଇ ଷ୍ଟେସନ ପର୍ଯ୍ୟନ୍ତ ପହଂଚିବାରେ ଲାଗୁଥିବା ସମୟ ପ୍ରାୟ ୫୦ ମିନିଟରୁ କମି ୨୫ ମିନିଟ ହୋଇଯିବ।
ପ୍ରକଳ୍ପରେ ଗଙ୍ଗା ନଦୀ ଉପରେ ୯୧୦ ମିଟର ଲମ୍ବା କେବଲ-ଷ୍ଟେ ପୁଲ ନିର୍ମାଣ କରାଯିବ। ଏହା ବ୍ୟତୀତ ୧.୩୨ କିଲୋମିଟର ଲମ୍ବା ଏକ୍ସଟ୍ରାଡୋଜ୍ଡ ଫୁଟ ଓଭର ବ୍ରିଜ ନିର୍ମାଣ କରାଯିବ, ଯେଉଁଥିରେ ଟ୍ରାଭେଲେଟରର ସୁବିଧା ରହିବ। ଏହା ଫଳରେ ପଦଯାତ୍ରୀମାନଙ୍କୁ କାଶୀ ବିଶ୍ୱନାଥ ମନ୍ଦିର ପର୍ଯ୍ୟନ୍ତ ସୁରକ୍ଷିତ ଏବଂ ସହଜ ମିଳିବ। ପ୍ରକଳ୍ପରେ ବର୍ତମାନ ଏବଂ ପ୍ରସ୍ତାବିତ ମାଳବୀୟ ପୁଲ ଉପରେ ରେଳ ଓଭର ବ୍ରିଜ ମଧ୍ୟ ନିର୍ମାଣ କରାଯିବ।
ଯାତାୟାତକୁ ସୁଚାରୁ ରଖିବା ପାଇଁ ବିଏଚୟୁ-ଲଙ୍କାରୁ ସାମ୍ନେ ଘାଟ ପର୍ଯ୍ୟନ୍ତ ଏଲିଭେଟେଡ୍ ସ୍ପର ପ୍ରସ୍ତୁତ କରାଯିବ, ଯାହା ଫଳରେ ଲଙ୍କା ଛକରେ ଜାମ ସମସ୍ୟା କମିବ। ପ୍ରକଳ୍ପରେ ଜରୁରୀକାଳୀନ ପାର୍କିଂ ବେ, ଶବ୍ଦ କମାଇବା ପାଇଁ ନଏଜ ବ୍ୟାରିୟର, ଆକର୍ଷଣୀୟ ଫସାଡ୍ ଲାଇଟିଂ ତଥା ବାରାଣସୀର ସାଂସ୍କୃତିକ ଐତିହ୍ୟରୁ ପ୍ରେରିତ ସ୍ଥାପତ୍ୟ ଡିଜାଇନ ମଧ୍ୟ ସାମିଲ କରାଯାଇଛି।
-------------------------
---------------
ହିନ୍ଦୁସ୍ଥାନ ସମାଚାର / ଗଗନ